Gasabo: Abarimu n’abanyeshuri bahejejwe mu kigo no kubona ikizamini cya leta imburagihe

Yanditswe na Kanamugire Emmanuel
Kuya 14 Ugushyingo 2016 saa 10:20
Yasuwe : XX
0

Minisiteri y’uburezi, akarere na polisi bategetse ko abarimu bakoreshaga ibizamini bya leta n’abanyeshuri babikoreraga kuri ES Bumbogo mu Karere ka Gasabo, ntawe usohoka mu kigo bitewe n’uburangare bw’abarimu batanze ikizamini cya leta cyagombaga gukorwa undi munsi.

Ubu burangare bwabaye kuri uyu wa mbere tariki 14 Ugushyingo 2016, ubwo abarimu bahagarikiye ibizamini bya leta bisoza icyiciro rusange ( Tronc Commun), batangaga ikizamini cy’Ubumenyi bw’Isi (Geography) cyagombaga gukorwa kuwa kabiri bagisimbuje Ubutabire (Chemistry).

Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Isaac Munyakazi yemeje ko ibyabaye ari uburangare bwahereye ku bahagarariye ahakorerwa ibizamini bukagera ku barimu babihagarikiye, kuko bose nta wabonye iryo kosa uretse abanyeshuri bari batangiye gukora.

Yagize ati “Habayeho uburangare abahagarariye ibizamini basohora ikizamini batarebye ku cyo bahaye abana icyo ari cyo. Abashinzwe ahakorerwa ibizamini nibo binjira aho ibizamini biba bibitse kandi baba bafite ingengabihe bazi ibizamini biri bukorwe, biba bifunze bashobora kurebaho bakamenya icyo bagiye gutanga.”

Munyakazi akomeza avuga ko abanyeshuri bakoze ikizamini cyari cyagaragaye bityo ubwo ibyo abandi bakoze igihe bakoraga icyo ngicyo, bakazabikora ejo kuwa kabiri.

Yongeyeho ko mu rwego rwo kwirinda ko bagikopeza bagenzi babo nabo bakababwira icyo batakoze, hafashwe icyemezo cy’uko abarimu n’abanyeshuri babuzwa gusohoka mu kigo bagashakirwa ibyangombwa byose hirindwa ko bahura n’abandi.

Minisiteri y’uburezi yasabye inzego zibishinzwe yaba akarere, polisi kubikurikiranira hafi kugirango hamenyekane niba byakozwe ku bwende.

Umuyobozi w’Akarere ka Gasabo, Rwamurangwa Stephen, yabwiye IGIHE ko abaraye mu kigo bambuwe ibikoresho nk’amatelefoni kugirango hatabaho guteza ikibazo mu gihugu hose binyuze mu gukopezanya.

Yagize ati “Abanyeshuri n’abarimu twabagumishije kuri iryo shuri ntabwo bahava, n’abigaga bataha byabaye ngombwa ko baharara tubashakira ibyangombwa byose kugirango batavugana n’abandi banyeshuri cyangwa abandi bantu. Bose twabambuye n’ibikoresho nka telefoni kugira ngo bitagira ingaruka mu gihugu bose.”

Rwamurangwa yemeza ko abarimu bagize uburangare bakibeshya ku kizamini n’itariki ariko nta wundi mutima mubi babikoranye. Icyakora akarere ngo kazabafatira ibyemezo byo mu rwego rw’ubuyobozi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza