Kwamamaza

Gasabo: Abantu barindwi batawe muri yombi bazira gukubita abayobozi

Yanditswe kuya 1-09-2016 saa 08:30' na Ezechiel Mbananabo


Abaturage barindwi bo mu Kagari ka Musave, mu Murenge wa Bumbogo, mu Karere ka Gasabo, batawe muri yombi n’inzego z’umutekano bakekwaho gukubita abayobozi n’abashinzwe umutekano.

Mu gitondo cyo ku wa kabiri tariki ya 30 Kanama 2016, abayobozi n’abashinzwe umutekano bagiye muri ako gace mu Mudugudu wa Kagarama gusenyera abaturage bubaka mu buryo bw’akajagari nta byangombwa bafite kandi butajyanye n’igishushanyo mbonera cy’umujyi wa Kigali.

Bamwe mu baturage basenyerwaga ngo umujinya warabishe baza barakaye cyane maze batangira gukubita abayobozi bari baje gusenya izo nzu.

Umwe mu baturage baganiriye na TV1 yagize ati “Inzu imwe bagiye kuyishyira hasi, abaturage barimo abasenyerwaga baza ikivunge bafata inkoni maze bakubita wa muntu wasenyaga, imvururu ziba zirabaye kugera ubwo bahamagara polisi n’abasirikare baraza.”

Undi ati “Nababonye bafite inkoni. Abayobozi ni bo bakubitwaga hari n’uwo bakubise ajya kwa muganga.”

Amakuru y’urugomo rw’abo baturage yemejwe n’Umunyamabanga Nshingwabikorwa w’Akagari ka Musave, Mukakimenyi Christine uvuga ko mu bo bakubiswe harimo n’ushinzwe umutekano wo mu rwego rwa DASSO.

Yagize ati “Twagiye gusenya izo nzu abasore bamwe bafata ibibando bashaka gukubita inzego z’umutekano twari kumwe ku buryo banakubise umu-DASSO umwe, ariko twahise twitabaza inzego z’umutekano ziradufasha. Nta kibazo cyabayemo kirekire ni uwakubise umu-DASSO umwe inkoni ku kuboko, bigaragara ko ari abasore b’abanyarugomo bari bashatse kwigumura ngo barwanye gahunda yo gusenya.”

Uyu muyobozi yakomeje avuga ko barindwi mu bakekwaho urwo rugomo bafashwe bagashyikirizwa polisi mu gihe hari n’abandi bacitse bagishakishwa kuko ngo ibyo bakoze ari urugomo rudashobora kwihaganganirwa.

Abajijwe niba na we yaba ari mu bakubiswe nk’uko byavugwaga n’abaturage, Mukakimenyi yabihakanye avuga ko we atigeze akubitwa.

Mu nama y’igitaraganya yahuje abaturage bo mu Kagari ka Musave n’inzego zitandukanye, babwiwe ko batagomba kwigomeka ku buyobozi, kandi ko bagomba gukurikiza amabwiriza n’amategeko bigenga Umujyi wa Kigali.

Si ubwa mbere ibyo gusenyera abaturage bubaka mu kajagari bikuruye ibibazo mu Mujyi wa Kigali kuko hari abajya kubikorerwa bakavuga ko barengana.

Muri Kanama umwaka ushize hari abaturage bo mu kagari ka Gatunga, mu Murenge wa Nduba, mu Karere ka Gasabo bahanganye n’abayobozi bashakaga kubasenyera inzu bavuga ko yubatswe nta byangombwa, icyo gihe bari bitwaje imyase n’imihini babuza ubuyobozi kubakorera ku mazu.

Icyo gihe abo baturage bavugaga ko harimo akarengane bitewe n’uko ngo hatoranywa bamwe bagasenyerwa kandi hari n’abandi baba barubatse mu buryo butemewe n’amategeko ariko ntibasenyerwe.

Muri Nyakanga umwaka ushize na bwo umuturage wo mu Murenge wa Kanyinya mu Karere ka Nyarugenge wasenyewe inzu n’ubuyobozi bw’Akarere yabanje kwanga kuyivamo aza kuyikurwamo ku ngufu.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved