Gasabo: Abana babiri bapfiriye mu nzu itwitswe na buji

Yanditswe na Evariste Nsengimana
Kuya 3 Nyakanga 2019 saa 10:05
Yasuwe :
0 0

Ngabonziza Ganza Christian w’imyaka itatu n’igice na Ngabonziza Iranzi Blessing w’imyaka ibiri, bapfuye bahiriye mu nzu iherereye mu Mudugudu w’Amahoro, Akagari ka Kibaza, Umurenge wa Kacyiru mu Karere Gasabo.

Ahagana saa yine z’ijoro ryo ku wa 02 Nyakanga 2019 nibwo inkongi yibasiye iyo nzu, itwitswe na buji yakongeje matela n’inzitiramubu, ibiyirimo byose birakongoka n’abana babiri bari baryamye barashya.

Umuvugizi wa Polisi mu Mujyi wa Kigali, CIP Umutesi Marie Gorette, yabwiye IGIHE ko yatwitswe na buji umwana w’umukobwa babanaga uri mu kigero cy’imyaka 18, yasize acanye agiye kugura indi kuko nta muriro w’amashanyarazi bafite.

Ati “Niby0 ni abana babiri bato, ababyeyi babo ntabwo bari bahari. Bari babasigiye umukobwa w’imyaka 18, acana buji ajya kugura indi, asiga abana mu nzu agarutse asanga inzu yafashwe yahiye.”

Ababyeyi babo bana aribo Ngabonziza Norbert na Bantegeye Kayitesi ntabwo bari bahari, umugabo yari akiri ku kazi ariko umugore we nta kazi agira.

CIP Umutesi yasobanuye ko Polisi ishami rishinzwe kuzimya inkongi n’abaturage batabaye, bazimya umuriro ariko basanga abana abana bitabye Imana n’ibikoresho byose byarangije gushya.

Ati “Nta bushake umukobwa yabigizemo, ni n’uwo mu muryango wabo. Ni bwa burangare bwo gusiga buji yaka, urumva yagiye aratinda.”

Yakomeje agira inama abaturage yo kwirinda gusiga bacanye buji cyangwa ibindi bicanwa mu nzu, cyane iryamyemo abantu bakigendera kuko byongera ibyago byo guhiramo.

Imirambo y’aba bana bombi yahise ijyanwa ku bitaro by’Akarere bya Kacyiru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza