Gakenke: “Nyirakabuye” yavukije abahinzi gukomeza gukirigita ifaranga

Yanditswe na Kanamugire Emmanuel
Kuya 2 Ugushyingo 2016 saa 02:19
Yasuwe :
0 0

Benshi mu bahinzi bo mu murenge wa Muzo mu karere ka Gakenke bahamya ko babonaga amafaranga bakuye mu buhinzi bw’amatunda(maracuja), nyamara ngo ubu bararira ayo kwarika nyuma y’aho umusaruro wabo ugabanutse cyane kubera indwara ya “nyirakabuye” yayirayemo ikayangiza cyane.

Inzu nziza, inka, amasambu, kwishyurira abana amafaranga mu mashuri yisumbuye... ni bimwe mu bikorwa by’iterambere abahinzi b’amatunda bo muri Muzo bari baragezeho babikesha umusaruro bakuraga mu matunda.

Ubu bararira ayo kwarika kuko uwo musaruro utakiboneka, nyuma y’aho indwara ya “nyirakabuye” yiraye mu matunda yabo ikayangiza.

Bizimana Theoneste ni umwe mu bahinzi b’amatunda, uvuga ko amatunda yahingaga yari yaramukijije.

Agira ati “Inaha nta kindi gihingwa cyadutezaga imbere uretse amatunda, ku buryo wasangaga umuntu afite amafaranga atari munsi y’ibihumbi 30 buri cyumweru. Ubu turi abakene nta muntu ugikora ku ifaranga kubera ‘nyirakabuye’.”

Ndindiriyimana Esron na we agira ati “Hashize imyaka amatunda atangiye kurwara. Urubuto iyo rujeho ruhita rutangira kwicunja, uko rukura rukagenda rukomera ku buryo imbere hazamo ikintu cy’urutare.”

Abahinzi batakaje isoko

Aba bahinzi b’amatunda bavuga ko atararwara abacuruzi bavaga i Kigali no mu bindi bice bitandukanye by’igihugu bakaza i Muzo kurangura amatunda.

Uwiduhaye Beatha agira ati “Amatunda yacu ni yo Nyirangarama yakoragamo umutobe, abacuruzi bavaga i Kigali no mu bindi bice bitandukanye by’igihugu bazaga kurangura ino, hari n’abandi baturukaga Uganda ndetse no muri Congo. Ubu nta n’umwe wabona kubera ko ‘nyirakabuye’ yayarumbije.”

Abo bahinzi bavuga ko bibagiranye ku buryo nubwo indwara yazabonerwa umuti byazagorana kongera kubona amasoko.

Hagati aho ariko, abo bahinzi barifuza ko ikibazo cy’indwara yazonze amatunda yabo yashakirwa igisubizo mu buryo bwihuta kuko byadindije imibereho yabo.

Barifuza imbuto nshya

Abo bahinzi batangaza ko bifuza guhabwa indi mbuto y’amatunda ishoboye ubutaka, bakayihinga bityo bakongera kwiteza imbere nk’uko byahoze mu myaka yashize.

Umunyamabanga Nshingwabikorwa w’uyu Murenge, Evergiste Gasasa, avuga ko iki kibazo kizwi n’ubuyobozi kandi ko hari ikiri gukorwa ngo gikemuke.
Yagize ati “Minagri yakoze ubushakashatsi isanga imbuto y’amatunda yahingwaga itajyanye n’ubutaka, hafatwa ingamba zo kubuza abaturage kuyahinga kuva mu mwaka wa 2010 kugira ngo ubutaka buruhuke.”

Akomeza avuga ko ubu hari imbuto yatuburiwe mu karere ka Kirehe, hakaba hari abahinzi babiri bagiye kuyigerageza, nishima ubutaka ikazahabwa n’abandi.

Imbuto z’amatunda zitararwara , mu Murenge wa Muzo heraga umusaruro w’amatunda ushimishije, dore ko kuri metero kare 50 hasarurwaga amatunda yagurishwaga amafaranga ibihumbi 100 mu cyumweru. Abahinzi bavuga ko aho bakuraga ako kayabo ubu amatunda ahavuye agurishwa amafaranga ibihumbi bitanu gusa.

JPEG - 96.4 kb
Ubuhinzi bw’amatunda ntibukibona umusaruro kubera indwara yiswe Nyirakabuye
JPEG - 172.4 kb
Abaturage bavuga ko iyi ndwara yababujije gukomeza gukirigita ifaranga
JPEG - 243.1 kb
Abahinzi b’amatunda barasaba ko bahabwa indi mbuto nziza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza