Kwamamaza

Gakenke:Inyubako zatwaye asaga miliyoni 200 zatangiye kwangirika zitarakoreshwa

Yanditswe kuya 20-11-2016 saa 08:19' na Jean Claude Bazatsinda


Inyubako zari ziteganyijwe gukorerwamo n’Akarere ka Bugarura zatangiye kwangirika zitabyajwe umusaruro, nyuma y’imyaka 10 zujujwe.

Izi nyubako ziherereye mu Murenge wa Cyabingo akagari ka Muhororo, kuva zubakwa mu 2006 zitwaye akayabo ka miliyoni 200, ntizigeze zikoreshwa.

Nyuma y’aho hahujwe icyahoze ari komine Ruhondo na Cyabingo nibwo izi nyubako zifite ibyumba 42 zatangiye kubakwa ngo zikorerwemo n’akarere ka Bugarura kari gahuje ayo makomine.

Mu yandi mavugurura yabayeho nyuma akarere ka Bugarura na ko kavuyeho habaho aka Gakenke bituma n’Ibiro byako bishyirwa aho biri kugeza n’ubu.

Hatagize igikorwa mu maguru mashya izi nyubako zishobora gusenyuka kuko zangizwa n’amazi aturuka mu gisenge yinjira mu nkuta ku buryo yamaze kuzihinguranya ndetse bimwe mu bice byazo bikaba byaratonzeho urubobi.

Bamwe mu baturage batuye muri aka gace bavuga ko bababazwa no kubona leta itakaza amafaranga menshi mu bikorwa nk’ibi ariko bikangirika ntacyo bikoreshejwe.

Ndagijimana Faustin yagize ati “Iyi nzu amafaranga yatwaye ni menshi cyane, twumva ngo akarere kagiye kuyikora ariko urabona ko yangiritse cyane kandi ni igihombo.”

Nkurikiyimana Félicien na we yagize ati “Twe twabumbye amatafari dutanga n’amafaranga 3000 y’umusanzu ndetse hari n’abatangaga ibiti byo gutwikisha amatafari ariko urabona ko yangirika umunsi ku munsi.”

Umuyobozi w’akarere ka Gakenke Nzamwita Déogratias aganira na IGIHE yemera ko iyi nyubako yatangiye kwangirika ariko ko bamaze kuyegurira ikigo cya leta gishinzwe guteza imbere amashuri y’imyuga n’ubumenyingiro(WDA) ngo kihakoreshe nubwo imirimo yo kuhatunganya itaratangira.

Ati “Iyi nyubako twamaze kuyiha WDA ni yo izayikoresha nubwo itaratangira kuhatunganya.”

Umuzamu w’iyi nyubako avuga ko kuva mu 2013 atarahembwa kandi ararira ibikoresho bihenze cyane.

Ati “Kuva mu 2013 na n’ubu sinari nahembwa sinzi neza ayo bandimo ariko ku kwezi mpembwa ibihumbi 40, urumva ko agera kuri miliyoni.”

Meya Nzamwita yavuze ko uyu muzamu yatangiye akorera rwiyemezamirimo wahubakishaga nyuma akomeza kurarira izi yubako bakaba barimo bategura kumwishyura.

Hatagize igikorwa izi nzu zishobora kwangirika kubera amazi yinjira mu nkuta
Inkuta z'imbere zamaze kwangizwa n'amazi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved