Gakenke:Bashinja rwiyemezamirimo ubagurira umusaruro ‘kububikaho urusyo’

Yanditswe na Kanamugire Emmanuel
Kuya 5 Ugushyingo 2016 saa 02:07
Yasuwe :
0 0

Abahinzi bo mu Murenge wa Muzo bavuga ko Rwiyemezamirimo ucuruza inyongeramusaruro n’imbuto, ari na we ugura umusaruro wabo w’ibigori, abubikaho urusyo, abagurira ku giciro gito.

Uwingabiye Felix, ufite isoko ry’ubucuruzi bw’imbuto n’inyongeramusaruro ndetse no kugura umusaruro w’ibigori bivugwa ko aryihariye ikaba ari yo mpamvu ituma ahenda abaturage.

Mukabatsinda Clementine ni umwe mu bahinzi uvuga ko bahendwa ku musaruro bejeje. Yagize ati “Ibigori abigura amafaranga 120 iyo byeze, kandi twebwe iyo tugiye kubigura abiduhera amafaranga 500 cyangwa 600 ku kiro kimwe. Atwubikaho urusyo tukanuma.”

Mutarutinya Benjamin na we ati “Ubuhinzi bw’ibigori ntaho buva nta n’aho bujya kubera ko tutagira isoko. Umucuruzi umwe ino aha ni we ugurisha imbuto n’inyongeramusaruro, akaba ari na we ugura umusaruro wacu w’ibigori, ugasanga rero araduhenda uko yishakiye.”

Uwingabiye Felix avuga ko adahenda abahinzi nk’uko babivuga, ahubwo ngo bamuzanira umusaruro wabo udatunganyije neza, akongeraho igiciro gihwanye n’imirimo iba isigaye kugira ngo ibigori bibe bitunganyijwe neza.

Yagize ati “Ibigori byera mu gihe cy’imvura, abahinzi babizana bigitose ku buryo binsaba kubyanika. Igiciro cyashyizweho na Minagri ni amafaranga 140 ku bigori byumye, njye kubera akandi kazi mba ndi bukore mbagurira ku mafaranga 120.”

Akomeza avuga ko kuba ibigori byera mu gihe cy’ubukonje ari imwe mu mbogamizi. Ati “Ibigori byera dufite ubuhehere buri kuri 18 mu gihe Minagri ishaka ubuhehere buri hagati ya 13 na 14. Icyo gihe rero bituma tubigura ku mafaranga atabashimishije.”

Aba bahinzi bakomeza bavuga ko bahangayikishijwe no kutagira isoko ryagutse bagurishirizaho umusaruro wabo w’ibigori, ndetse ngo n’isoko rusange bafite riri ku birometero bisaga 20 uvuye mu Murenge wa Muzo, ibi bigatuma bemera guhendwa n’umucuruzi ufite ubushobozi bwo kugura umusaruro wabo.

Icyifuzo cyabo ni uko bajya bagurirwa ku mafaranga 200 ku kiro aho kuba 120, kandi ubuyobozi bukabafasha kubona aho bahunika umusaruro wabo aho kuwugurisha huti huti kugira ngo utangirika.

Umunyamabanga Nshingwabikorwa w’Umurenge wa Muzo, Evergiste Gasasa, avuga ko bafite ikibazo cyo kutagira aho bahunika umusaruro w’ibigori.

Yagize ati “Iyo tuvuga ngo umusaruro w’ibigori wabonetse ari muke ntabwo tujya hasi ya toni 40, igitangaje rero numvise ni igiciro[…]igiciro ni ubwumvikane hagati y’ugura n’ugurisha, ariko ku bicuruzwa bimwe nk’ibigori, Minagri ishyiraho igiciro fatizo ariko na cyo kigira imbogamizi y’uburyo bahunguye, banahunitse wa musaruro.”

Ibigori byerera rimwe kandi bikera ari byinshi, ikibazo gikomereye abaturage kikaba icyo kubihunika kugira ngo bitangirika.

Abaturage bo mu Murenge wa Muzo bavuga ko bahendwa ku musaruro w'ibigori

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza