Gakenke: Abaturage bagera kuri 41, 7% banenga uruhare bagira mu bibakorerwa

Yanditswe na Ishimwe Israel
Kuya 16 Ugushyingo 2016 saa 08:20
Yasuwe : XX
0

Mu bushakashatsi bwakozwe n’Ikigo cy’Igihugu cy’Imiyoborere (RGB) ku buryo abaturage babona imiyoborere n’imitangire ya serivisi mu Ntara y’Amajyaruguru, bugaragaza ko abaturage bagera kuri 41,7 % mu Karere ka Gakenke banenga uruhare bagira mu bibakorerwa.

Ubu bushashatsi bwashyizwe ahagaragara kuri uyu wa Kabiri taliki 15 Ugushyingo 2016 bwakozwe hakurikijwe inkingi enye za Guverinoma zirimo Umutekano, Ubutabera, Imiyoborere myiza n’Imibereho myiza y’abaturage.

Umuyobozi Mukuru ushinzwe imirimo rusange muri RGB, Kalisa Edouard, avuga ko n’ubwo hari ahagaragara ibipimo bikiri hasi bidasobanuye ko nta kiba cyakozwe ahubwo ari uko imyumvire y’abaturage igenda izamuka bityo bakaba bakeneye byinshi.

Yagize ati “Sinavuga ko kuba biri hasi ari ikibazo gikomeye cyangwa nta gikorwa, ahubwo ibiba byakozwe bituma bagira imyumvire iteye imbere, bakagenda bakenera ibindi byiyongereye. Icyo bivuze ni ugukomeza gushyiramo ingufu.”

Akomeza asaba abayobozi b’inzego z’ibanze kurushaho gufatanya n’abaturage bakarebera hamwe ahakenewe kongerwa ingufu no kongera ibikorwa n’imibare y’umusaruro ubibonekamo.

Umuyobozi w’Akarere ka Gakenke, Nzamwita Déogratias, atangaza ko ubu bushakashatsi bugiye kubafasha kwegera abaturage.

Yagize ati “Twe nk’abayobozi tugomba kurushaho kwegera abaturage kuko byagaragaye ko ibikorwa bagizemo uruhare cyangwa batanzemo ibitekerezo ni byo biramba, iki nicyo tugiye kongeramo imbaraga.”

Umuyobozi w’Intara y’Amajyaruguru, Musabyimana Jean Claude we avuga ko ubu bushakashatsi bugaragaza ubutumwa abaturage baba bageneye ubuyobozi mu nzego zitandukanye kandi ko aho ibipimo bikiri hasi hagiye gukorwa ubukangurambaga no gushishikariza abaturage kurushaho kugira uruhare mu bibakorerwa.

Ati “Ubu butumwa babuhaye twe b’abayobozi mu nzego za Leta ndetse n’abikorera, ikigiye gukorwa ni ubukangurambaga mu kwegera abaturage no kubashishikariza kugira uruhare mu bibakorerwa.”

Ubushakashatsi bwakozwe ku ngingo 14 zirimo uburezi, ubuhinzi, ubworozi, serivisi zitangwa n’inzego z’ibanze, ubutabera, iyubahirizwa ry’amahame y’imiyoborere n’icyizere ku nzego z’ubuyobozi, ubuzima, isuku n’isukura, imibereho myiza y’abaturage, ibikorwaremezo, ubutaka, umutekano, umudendezo w’abaturage n’ibibazo by’ihohoterwa, uruhare rw’abaturage mu bibakorerwa.

Mu gihugu hose, imibare igaragaza ko impuzandengo y’ubushakashatsi yagabanutseho 2,6% kuko yavuye kuri 71,1% mu mwaka wa 2015 ikagera kuri 67,7% muri uyu mwaka.

Uko abaturage bishimira uruhare rwabo mu bibakorerwa mu Ntara y'Amajyaruguru

bazatsinda@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza