Gakenke: Abantu bane bafatanywe amabuye y’agaciro bibye mu kirombe

Yanditswe na IGIHE
Kuya 23 Kamena 2019 saa 08:26
Yasuwe :
0 0

Polisi y’Igihugu yataye muri yombi abasore bamaze kwiba ibiro 20 by’amabuye y’agaciro azwi nka “coltan’’ bibye mu kirombe gicukurwamo amabuye y’agaciro giherereye mu Murenge wa Ruli mu Karere ka Gakenke.

Aba basore bane bafashwe ku wa Kane, tariki ya 20 Kamena 2019. Bafashwe mu mukwabu wo gushaka abihishe inyuma y’ubujura bw’amabuye y’agaciro nyuma y’ikirego cyatanzwe na n’imwe muri sosiyete zikorera mu Murenge wa Ruli.

Umuvugizi wa Polisi mu Ntara y’Amajyaruguru, CIP Rugigana Alexis, yavuze ko “Tumaze kumenya ko kompanyi yitwa Eprocomi Limited icukura amabuye y’agaciro mu Karere ka Gakenke yibwa amabuye y’agaciro cyane ayo mu bwoko bwa Coltan; twahise dutangira ibikorwa byo gushakisha abantu bihishe inyuma y’ibi bikorwa by’ubujura. Twahise tubafata tubasangana ibiro 20 by’amabuye y’agaciro ya coltan, tuyasubiza ba nyirayo.”

CIP Rugigana yashimiye abaturage bagize uruhare rwo guha amakuru Polisi yatumye aba bajura bafatwa bagashyikirizwa ubutabera.

Ati “Turashimira abaturage batanze amakuru, buri muntu wese agize uruhare rwo gutanga amakuru ku gihe yabakora ibyaha, byabasha gukumirwa bitaraba. Uyu muco rero wo gutanga amakuru no kuba buri wese ijisho rya mugenzi we bikwiye kuranga buri muturage wese.”

Yakomeje avuga ko Polisi itazahwema kurwanya abacukura ndetse bakanacuruza amabuye y’agaciro mu buryo bunyuranyije n’amategeko kimwe n’abandi bose bakora ibyaha bitandukanye.

U Rwanda ni kimwe mu bihugu bitanga umusaruro mwinshi ku isoko rya Coltan, aho rucukura 60% by’umusaruro wayo wose ku Isi.

Hagati ya Nyakanga 2017 na Kamena 2018 rwagurishije mu mahanga toni zirenga 2000.

Coltan ikorwamo ibikoresho bitandukanye birimo iby’ikoranabuhanga nka telefoni, mudasobwa, ibikoresho by’imodoka, moteri z’indege n’ibindi bitanga ingufu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza