Kwamamaza

Gahunda ziteza imbere abatishoboye tutazihuje n’ubuhinzi ntaho twagera-Minaloc

Yanditswe kuya 29-11-2016 saa 20:39' na Rabbi Malo Umucunguzi


Minisiteri y’Ubutegetsi bw’Igihugu n’imibereho y’abaturage (MINALOC) yatangije uburyo bwo gukurikirana uko abatishoboye bafashwa muri gahunda zitandukanye, hagamije kuzamura miliyoni 1.3 bakiri mu bukene bukabije, bitarenze 2020.

Inzego zitandukanye mu miyoborere y’igihugu n’abafatanyabikorwa bazo, kuri uyu wa Kabiri zagize ikiganiro nyunguranabitekerezo cyabereye mu Ngoro y’Inteko Ishinga amategeko, ku isano iri hagati y’ubuhinzi na gahunda yo kurengera abatishoboye.

Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza no kurengera abaturage, Dr Mukabaramba Alvera, yavuze ko ibigaragara byerekana ko gahunda zigenewe guteza imbere abatishoboye zidahujwe n’ubuhinzi nta cyagerwaho.

Ati ‘‘Ntabwo byakunda, ntaho twagera. Ubuhinzi ngira ngo byagaragaye ko 60% by’abantu bavuye mu bukene bashingiye ku buhinzi, mu gihe ubuhinzi butanga 30% by’umusaruro mbumbe w’Igihugu.’’

‘‘Ngarutse kuri gahunda ziteza imbere baturage twahoze tuvuga, ari gahunda za VUP uko ari eshatu, burya n’inkunga y’ingoboka nubwo tuyiha abantu batishoboye batakibasha no guhinga, iyo umubashije uti amafaranga y’ingoboka uyakoresha iki, aravuga ati nayikenuyemo ariko mpa n’umuhinzi, amfasha guhinga ka karima.’’

Imibare igaragaza ko Abanyarwanda bari bakennye cyane mu myaka itanu ishize bari miliyoni ebyiri bakaba bageze kuri miliyoni 1.3, kuko ubukene bukabije bwari 24.5% ariko mu mwaka ushize bukaba bwarageze kuri 16.3%.

Mukabaramba ati “Tudafatanyije ngo gahunda ziteza imbere abatishoboye ziri muri MINALOC duhurize hamwe n’iziri muri Minagri (Minisiteri y’Ubuhinzi n’Ubworozi), rwose ntabwo bariya bantu ibarurishamibare ryerekana, Miliyoni imwe yavuye mu bukene, ibihumbi 650 mu myaka yakurikiyeho, ntabwo byakunda.’’

Gahunda nshya y’Ubufasha bukomatanije

Minisitiri w’Ubutegetsi bw’Igihugu, Francis Kaboneka, yavuze ko gahunda y’Ubufasha bukomatanije buhurizwa ku mugenerwabikorwa kugira ngo yikure mu bukene (Minimum Package), buri gufasha benshi guhindura imyumvire, bagatinyuka gukoresha ibigo by’imari no kwizigamira.

Yavuze ko ikintu cya mbere cyo kwishimira ari uko ingamba zo kurengera abatishoboye zikorera mu gihugu cyose, ariko kuba inkunga nyinshi y’abatishoboye ikoreshwa mu kugura ibyo kurya, birushaho kugaragaza ko hakenewe cyane guhuza gahunda ziteza imbere abatishoboye n’iz’ubuhinzi zikunganirana.

Mukabaramba yavuze ko imirimo abatishoboye bakora bagahembwa muri VUP, yaba itangwa n’Akarere cyangwa Minagri yose ihurira ku buhinzi, haba mu materasi y’indinganire, imirwanyasuri, imihanda y’imigenderano n’ibindi.

Ati “Kuri gahunda y’Ubufasha bukomatanije, twifuje gushyiramo imbaraga, duhuza na gahunda za Minagri, kuko abenshi dushaka kugeraho hariya ni abantu bari mu mirimo ibyara inyungu. Ni ukuvuga ngo amafaranga twahaga abantu wenda muri ya mirimo bakora bagahembwa, turashaka ngo turebe Minagri aho yatanze amatungo, ntituzongere kuvuga ngo turafata abantu tubahe amafaranga kandi twongereho amatungo na Minagri irimo kuyatanga hariya.”

“Tukavuga ngo aho abaterankunga bari naho Minagri iri, twebwe ntitujyeyo, tujye ahandi, cyangwa dutange ikintu kimwe kidatangwa na bariya bandi. Igisigaye ni ihuzabikorwa rizima hanyuma hakabaho gukurikirana uko bikorwa.’’

Aho niho uburyo buzafasha mu gukurikirana uko abaturage bava mu bukene hashingiwe ku makuru afatika (Management Information System, MIS) buzitabazwa, kandi abagenerwabikorwa bakazagirana amasezerano n’inzego zibafasha.

Abanyarwanda bari munsi y’umurongo w’ubukene bagiye bagabanuka mu myaka ishize, bava kuri 58.9% mu 2000/01 bagera kuri 39.1 % mu 2013/14, abari mu bukene bukabije bava kuri 40% mu 2000/01 bagera kuri 16.3% mu 2013/14.

Abayobozi mu nzego zitandukanye mu kiganiro nyunguranabitekerezo mu Nteko Ishinga Amategeko
Minisitiri w'Ubuhinzi n'Ubworozi, Gerardine Mukeshimana(wa mbere ibumoso) yari muri iki kiganiro
Minisitiri w'Ubutegetsi bw'Igihugu, Francis Kaboneka yavuze ko gahunda y’Ubufasha bukomatanije buhurizwa ku mugenerwabikorwa kugira ngo yikure mu bukene

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved