Fazil, Nsanganira, Bosenibamwe, Imena na Mukandasira bavuye ku myanya bariho

Yanditswe na Ishimwe Israel
Kuya 5 Ukwakira 2016 saa 12:03
Yasuwe :
0 0

Mu mpinduka zakozwe muri Guverinoma y’u Rwanda, iyari Minisiteri ishinzwe Umuryango w’Ibihugu bya Afurika y’Iburasirazuba yakomatanyijwe na Minisiteri y’Ubucuruzi n’Inganda bibyara Minisiteri y’Ubucuruzi n’Inganda n’Umuryango w’Ibihugu bya Afurika y’Iburasirazuba naho Minisiteri y’Umutekano ivanwaho.

Muri iyi guverinoma hagaragaramo amaraso mashya arimo Minisitiri umwe n’Abanyamabanga ba leta bane. Umwe muri bane bari basanzwe bayobora Intara bavuye kuri iyi myanya basimbuzwa abandi.

Abavuye muri Guverinoma barimo Sheikh Musa Fazil Harerimana wari Minisitiri w’Umutekano mu gihugu aho Minisiteri yayoboraga yasheshwe naho Tony Nsanganira wari Umunyamabanga wa Leta muri Minisiteri y’Ubuhinzi n’Ubworozi ushinzwe Ubuhinzi asimburwa na Nsengiyumva Fulgence.

Imena Evode wari Umunyamabanga wa Leta Ushinzwe ubucukuzi ntabwo akigaragara mu bagize Guverinoma kuko uyu mwanya utari mu mishya yatangajwe.

Valentine Rugwabiza wari Minisitiri ushinzwe Umuryango w’Ibihugu bya Afurika y’Iburasirazuba na we yavanywe muri iyi mirimo, Minisiteri yayoboraga ikomatanywa n’Iy’Ubucuruzi bw’Inganda iyoborwa na Kanimba Francois. Rugwabiza yagizwe Ambasaderi w’u Rwanda muri Loni.

Mu bashya binjiye muri Guverinoma harimo Minisitiri w’Uburinganire n’Iterambere ry’Umuryango, Nyirasafari Esperance; Umunyamabanga wa Leta muri Minisiteri y’Ubutabera ushinzwe ibyerekeye Itegeko Nshinga n’andi mategeko, Uwizeyimana Evode; Munyeshyaka Vincent wari Umunyamabanga Uhoraho muri Minisiteri y’Ubutegetsi bw’Igihugu aho yagumye ariko ari Umunyamabanga wa Leta ushinzwe iterambere ry’abaturage.

Muri Minisiteri y’Uburezi, Munyakazi Isaac, Umunyamabanga wa Leta ushinzwe amashuri abanza n’ayisumbuye asimbuye Rwamukwaya Oliver wagizwe Umunyamabanga wa Leta muri Minisiteri y’Uburezi Ushinzwe amashuri y’Imyuga n’Ubumenyi ngiro.

Ku rwego rw’Intara, usibye Munyantwari Alphonse usanzwe ari Guverineri w’Intara y’Amajyepfo; abandi bose basimbuwe.

Bosenibamwe Aimé wari Guverineri w’Intara y’Amajyarugu yasimbuwe na Musabyimana Claude wari Meya w’Akarere ka Musanze; Kazayire Judith, wari Umuyobozi w’Umujyi wa Kigali Wungirije Ushinzwe Imibereho myiza y’Abaturage agirwa Guverineri w’Intara y’Iburasirazuba asimbuye Odette Uwamariya wagizwe Umunyamabanga Uhoraho muri Minisiteri y’Ubutegetsi bw’Igihugu.

Mukandasira Caritas wari Guverineri w’Intara y’Iburengerazuba yasimbuwe na Mureshyankwano Marie Rose wari umudepite.

Sheikh Musa Fazil Harerimana yari Minisitiri w'Umutekano
Tony Nsanganira yari Umunyamabanga wa Leta muri Minisiteri y'Ubuhinzi n'Ubworozi ushinzwe ubuhinzi
Evode Imena ntakiri Umunyamabanga wa Leta ushinzwe ubucukuzi
Bosenibamwe Aime yari Guverineri w'Intara y'Amajyaruguru
Mukandasira Caritas yari Guverineri w'Intara y'Iburengerazuba
Mureshyankwano Marie Rose yagizwe Guverineri w'Intara y'Iburengerazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza