EUCL yasobanuye ibya sosiyete yayijyanye mu nkiko ku isoko rya miliyoni 850 Frw

Yanditswe na IGIHE
Kuya 16 Nzeri 2018 saa 08:06
Yasuwe :
0 0

Ku wa 11 Nyakanga 2016 ni bwo Sosiyete Micon Real Line Ltd ya Gacinya Chance Denis n’iya Bhavani Electrical Ltd zasinye amasezerano n’Ikigo gishinzwe gukwirakwiza Umuriro w’Amashanyarazi (EUCL) yo gusimbuza “transformateur” iherereye Mont Kigali.

Iyi mashini itanga amashanyarazi yagombaga kwifashishwa mu kongera umuriro ukoreshwa n’inganda ziri i Gahanga na Bugesera.

Ibikubiye mu masezerano y’iri soko ry’agaciro k’ibihumbi bisaga $947 (asaga miliyoni 850 Frw) ntibyubahirijwe. Byatumye hitabazwa inkiko.

Izi sosiyete zivuga ko zananijwe mu isohozwa ry’amasezerano bituma arangira ibyemeranyijwe bidakozwe.

Umunyamategeko wa EUCL, Ngirinshuti Jean Bosco, yatangarije IGIHE ko mu mwaka ushize mu rubanza rw’iremezo, ikirego cyashyikirijwe inkiko na Gacinya cyagaragajwe nk’ikidafite ishingiro.

Yagize ati “Amasezerano yarangiye izi sosiyete zirimo niya Gacinya zidakoze inshingano zahawe. Aho kwemera amakosa, Gacinya yashoye EUCL mu manza bitari ngombwa. Gacinya yaje no gutanga n’ikirego cyihutirwa gisaba guhagarika imishyikirano hagati ya EUCL n’Ikigo cyo mu Buhinde cya IMP powers cyakoraga “transformateur.’’ Urukiko rusanga nta shingiro gifite baratsindwa, barajurira barongera baratsindwa".

"Urubanza rw’iremezo narwo yareze asaba kwishyurwa agaciro kose k’isoko narwo bararutsinzwe, ariko Gacinya ntiyanyuzwe arajurira nubwo urukiko rwemeje yuko ibyo yaburanaga ntashingiro byari bifite ko ahubwo ibyo biyemeje niyo sosiyete yo mubuhinde byo kuzana iyo “transformer” ntabyo bakoze".

Maître Ngirinshuti akomeza avuga ko mu nama Gacinya yagiranye na EUCL yababwiraga ko iyo “transformer” iri mu nyanja iza mu Rwanda; nyuma EUCL igasanga ibyo yabemezaga nta kuri kurimo.

Amafaranga y’ibanze (avance) yahawe Gacinya n’iyo sosiyete ye, kandi amasezerano ateganya ko yagombaga kunyuzwa muri Ecobank.

Aho kubikora nk’uko babyumvikanye na EUCL bakoze amanyanga aho gukurikiza amasezerano yateganyaga ko ayo mafaranga azakurwa kuri konti ya EUCL iri muri GT Bank ajyanwa muri Ecobank kuri konti ya micon real line; bafunguje indi konti muri GT bank mu mazina ya Gacinya abifashijwemo n’umukozi wa GT bank, bahindura amabwiriza yari yatanzwe n’Umuyobozi Mukuru wa EUCL.

Ibi bakoze, byabagizeho ingaruka kuko bari gukurikiranwaho icyaha cy’inyandiko mpimbano mu rundi rubanza nshinjabyaha mu rukiko rwisumbuye rwa Nyarugenge .

Ngirinshuti ati “Nyuma yo kumva imiburanire n’ibimenyetso by’impande zombi urukiko rw’ubucuruzi rwanzuye ko iyo sosiyete ya Gacinya itsinzwe, inategekwa kwishyura EUCL miliyoni ebyiri y’igihembo cy’umwavoka no kuyishora mu manza z’amaherere.”

Gacinya ntiyanyuzwe n’icyemezo cy’Urukiko rw’Ubucuruzi, yongeye kujurira mu rukiko rukuru rw’ubucuruzi, ubujurire bwaburanishijwe taliki 12/09/2018, ruzasomwa taliki 05/10/2018.

Gacinya aheruka gutangariza IGIHE ko kugira ngo iyo mashini izanwe, EUCL yagombaga gutanga uburenganzira, banki igatanga amafaranga bakajya kwishyura sosiyete IMP yayikoze ariko Maître Ngirinshuti yemeza yuko ibyo Gacinya avuga ataribyo kuko bidateganijwe mumasezerano yagiranye na EUCL.

Me Ngirinshuti yongeyeho kandi ko nta mpamvu nimwe yari gutuma EUCL inaniza Gacinya kubera ko iyo “transformateur” yari ikenewe cyane.

Transformateur iri kuri Mont Kigali ari yo yari mu masezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza