Kwamamaza

Ese Itangazamakuru ni ishoramari rishoboka mu Rwanda?

Yanditswe kuya 17-08-2016 saa 15:31' na Mukaneza M.Ange


Hashize imyaka 12 itangazamakuru ryo mu Rwanda rihinduye isura, radiyo na televiziyo byigenga biravuka, ndetse n’irikorera kuri internet ryari rimenyerewe mu mahanga rishinga imizi mu rwa Gasabo.

Radiyo yari imwe rukumbi ubu ziragera kuri 35 zirimo umunani za Leta, Televiziyo zimaze kuba icyenda zikora harimo imwe ya Leta, ibinyamakuru byandika ku mpapuro bibarirwa muri 45, mu gihe ibikorera kuri internet birenga 100.

Gusa nta byera ngo de! Ibitangazamakuru bishya biravuka ariko gushinga imizi bikaba ingorabahizi udacunze neza agafunga imiryango, abaheruka bakaba ari Radiyo KFM, Exalto TV na Yego TV.

Ibyo byatuma umuntu yibaza niba itangazamakuru ryo mu Rwanda rwa 2016 ari ubushabitsi bushoboka nk’uko umukanishi ashinga igaraji cyangwa umudozi agashinga atoliye (Atelier), agatera imbere, agakira n’abakozi bagateza imbere imiryango yabo.

Mu Kiganiro Debate 411 cyatambutse kuri Royal TV mu cyumweru gishize, bamwe mu bafite aho bahuriye n’itangazamakuru bagaragaje ibitekerezo binyuraye kuri urwo ruganda ruzwiho kumenyekanisha ibyo abandi bakora, bombi inyungu ikabageraho.

Eugene Anangwe utegura iki kiganiro yatumiyemo Albert Rudatsimburwa usanzwe ari nyiri Radiyo na Televiziyo Contact ; Emmanuel Mugisha, Umunyamabanga Nshingwabikorwa w’Urwego rw’abanyamakuru bigenzura (RMC) na Eliud Kagema wari ushinzwe ibiganiro kuri KFM iheruka guhagarika imirimo.

Rudatsimburwa umaze imyaka irenga 10 mu itangazamakuru ryo mu Rwanda, yavuze ko kuri ubu ntawe yagira inama yo kurishoramo imari kuko rikimeze nk’umugati ukiri mu ifuru.

Ati “Iyo uvuze itangazamakuru bisobanuye itangazamakuru ryigenga; Itangazamakuru ryigenga riri mu maboko y’abikorera. Icyiciro cy’abikorera kiracyari hasi cyane ntabwo wakwitega kubona igice cy’umugati kinini.”

Ni ikibazo Mugisha yavuze ko atahakana ko gihari mu bijyanye n’amikoro cyane cyane mu itangazamakuru ryandika, ariko ko iyo ubonye umubare w’abashya baryinjiramo bituma ubigiraho ibitekerezo bitandukanye.

Albert Rudatsimburwa yavuze ko ubu ntawe yagira inama yo gushora imari mu itangazamakuru

Hari ababona ko n’isoko ubwaryo rifite ikibazo

Eliud Kagema yabihuje no kuvuga ko icyo kibazo kirimo ibice bibiri aho avuga ko itangazamakuru rishobora kubyara inyungu ku mushoramari ariko ngo iyo bigeze mu Rwanda biragorana cyane.

Ati “Hari impamvu nyinshi. Iya mbere ni ingano y’isoko, iya kabiri ni umubare w’abari muri iri soko. Ubushabitsi mu itangazamakuru rya radiyo, TV n’ibinyamakuru byandika ni umubare w’ababona ibyo ukora.”

Ibyo umuntu yabihuza no kuvuga ko u Rwanda nk’igihugu gifite abaturage bake ndetse ibitangazamakuru ntibikwire igihugu hose, bishobora kuba ubwabyo ari indi mbogamizi ku mikorere y’itangazamakuru.

Urugero nka Radiyo Rwanda, Radio Maria na Flash FM nizo zonyine zishobora kumvikana hejuru ya 70% by’ubuso bw’igihugu, ndetse n’ibitangazamakuru byandika ku mpapuro ntibigezwa mu gihugu cyose, ndetse hari n’aho byagezwa ntibibone ubigura, kuko nk’uko ubushakashatsi bw’Ikigo cy’Igihugu cy’Imiyoborere, RGB, bwerekanye ko 41% basoma ibi binyamakuru babisanze mu biro, mu gihe ababyigurira ari 32%.

Ku binyamakuru bikoresha internet naho byaba bisobanuye ko itangazamakuru ryo mu Rwanda ritabyara inyungu nk’iryo muri Kenya, mu gihe rufite miliyoni zisaga 11.8 z’abaturage barimo 35% bakoresha internet, Kenya ikagira miliyoni 45 barimo abafite internet 74.2 %.

Albert Rudatsimburwa yunzemo ati “Itangazamakuru riba ubushabitsi igihe abantu batangiye gusobanukirwa ko kugira ngo ibyo bakora bibashe gutera imbere ari uko babimenyekanisha. Iki ni cyo kibura; nta muntu hano wamamaza, ntabwo babyitayeho.”

“Uramutse urebye mu binyamakuru mpuzamahanga abamamaza cyane ni amabanki n’ibigo by’ubwishingizi. Ibi bivuze ko ugomba kujya kubareba aho bakorera kandi ari bo bagakwiye kugushaka. Umukiliya wa mbere ari we Leta nayo ntabwo yamamaza ibyo ikora.”

Basabye impinduka mu kigo cy’Igihugu cy’Itangazamakuru, RBA

Mugisha uyobora muri RMC yavuga ko RBA nayo ikwiye guhangana n’ibindi bitangazamakuru byigenga kandi ko icyo leta yifuza ndetse ishyizemo imbaraga ari ukubona icyo kigo gikora kidakeneye ubufasha buyiturutseho.

Ibi bishingirwa ku kuba leta ifata ingengo y’imari yagakwiye kugenerwa itangazamakuru ryingenga ikayisubiza mu mufuka binyuze mu bitangazamakuru byayo, Televiziyo na Radiyo by’igihugu.

Kagema yahise yungamo ati “Nshimye ibi bisobanuro ko leta yifuza kubona RBA ikorera amafaranga yayo. Ariko se kuki RBA ikwiye kugira radiyo 35 zose, kuki itagira radiyo imwe, ikaba ariyo ishyiramo imbaraga ubundi igaha umwanya n’abandi?”

Mu rwego rwo gusaranganya ubushobozi, Albert Rudatsimburwa avuga ko hakwiye kugenwa amatangazo ahabwa RBA, igasagurira n’abikorera ariko na none ikibazo akaba ari uko abamamaza ari bake.

Abashoramari mu itangazamakuru mu Rwanda kandi ngo bakwiye gutangira gutekereza ku isoko ryagutse no kujyana ibyo bakora mu bihugu byo mu karere, ariko bakabanza gutekereza icyo bazajyanayo kuko ari cyo gikurura abantu.

Emmanuel Mugisha, Umunyamabanga Nshingwabikorwa w’Urwego rw’abanyamakuru bigenzura (RMC)

Bakomoje ku kibazo KFM yahuye na cyo

Nyuma yo kwibaza impamvu Nation Media Group ibarizwamo KFM yahisemo gufunga imiryango mu Rwanda kandi nyamara itabuze ubushobozi, Kagema yavuze ko nubwo adashaka kuba umuvugizi wayo, ikibazo yagize ari uko amafaranga yashoye mu gushaka abakozi beza no kwishyura ibindi bintu bitandukanye ariko nyuma igasanga ayinjiye ari make kuyasohotse.

Ati “Aha ni ho bikomerera, byagera ku mpera z’ukwezi ugatangira kubwira abakozi uti nimwihangane turebe ko hari uwatwishyura ubundi tubahembe.”

Yakomeje avuga ko kandi ikibazo kiri ku bakiliya baba barasinyanye n’ikinyamakuru amasezerano runaka bakumvikana igihe bazishyurirwa ariko ugasanga cya gihe kirarenze.

Yanagarutse kandi ku mafaranga yishyurwa n’ibitangazamakuru hagendewe ku byo bikenera birimo n’umunara aho buri mwaka hishyurwa atari munsi ya miliyoni 18 z’amafaranga y’u Rwanda waba wungutse cyangwa utungutse.

Kuri ibi bibazo Mugisha yavuze ko hari kwigwa uburyo itangazamakuru ryigenga ryajya ryoroherezwa ku kijyanye n’ibikorwaremezo ndetse na RBA ikaba yakwamburwa inshingano zo kugenzura no kwishyuza iminara kandi hari icyizere ko bizakorwa.

Yanakomoje kandi ku cyo kuba ibitangazamakuru bito byajya byishira hamwe bigakora nk’ikinyamakuru kimwe kugira ngo bibashe kugeza ku bantu ibintu bifatika.

Kimwe n’ibindi bibazo byugarije ibinyamakuru bitari iby’umwuga usanga byemera kwamamaza ku giciro cyo hasi bigafungira abandi inzira, Emmanuel Mugisha yavuze ko abafite ibinyamakuru byose bakwiye kwicara hamwe, bakagaragaza amategeko n’amabwiriza bifuza kugenderaho ku buryo ntawayarengaho.

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved