Kwamamaza

Aho guhindura amazina ateye ipfunwe y’ahantu nka Bannyahe bigeze

Yanditswe kuya 2-09-2016 saa 09:17' na Thamimu Hakizimana


Hashize amezi 10 Minisitiri w’Ubutegetsi bw’Igihugu Francis Kaboneka asabye ubuyobozi bw’Umujyi wa Kigali, na ba Guverineri bose, kumugezaho imbibi nshya z’Utugari n’Imidugudu, bifite amazina adahesha agaciro umuco Nyarwanda kugira ngo ahindurwe.

Ni nyuma y’uko bamwe mu baturage bakomeje kuvuga ko baterwa ipfunwe no gutura ahantu hitwa ayo mazina ndetse bagasaba ko aramutse ahinduwe byaba ari ugukomeza kwihesha agaciro.

Muri icyo gihe havugwagwa amazina nka Bannyahe, Mukobo, Kabatwa, Dobandi, Karabaye, Nyirantarengwa, mu gashyushya ngutiya, mu Gahenerezo, mu Kazarusenya n’andi menshi.

Abaturage batandukanye batuye muri utwo duce baganiriye na IGIHE bavuga ko babangamirwa n’ayo mazina bitewe n’uko atiza umurindi ibikorwa bifitanye isano na yo, ngo kuko usanga nk’ahitwa muri Bannyahe ari ahantu hakunda kurangwa umwanda mwinshi, Dobandi ho hakarangwa ubujura.

Munezero Ramazani utuye mu Kazarusenya, mu Murenge wa Kamembe, mu Karere ka Rusizi yagize ati “ Rwose ubuyobozi buzadufashe buduhindurire aya mazina pe! Uzi ko njye hari n’igihe nanirwa kubwira umuntu ko nibera ahitwa mu Kazarusenya kubera uburyo iri zina rikunda kwibazwaho na benshi.”

Kalisa Olivier utuye muri Bannyahe, mu mu Murenge wa Remera we yagize ati “Bayahinduye byadufasha rwose bitewe n’uko izina ryokamye ahantu kuko hari n’igihe umuntu agusuzugura gusa kubera ko yumvise ko utuye ahantu hitwa muri Bannyahe.”

Yakomeje avuga ko hari umwana we wigeze kumubaza impamvu agace batuyemo kiswe izina rya Bannyahe abiburira igisubizo.

Minisiteri y’ubutegetsi bw’igihugu ibivugaho iki?

Umuvugizi wa Minisiteri y’Ubutegetsi bw’Igihugu, Ngendahimana Ladislas , na we yemeza ko Minisiteri y’Ubutegetsi bw’Igihugu ifite gahunda yo guhindura aya mazina ariko ko bisaba ubushishozi bwinshi bitewe n’ingaruka bishora gutera.

Yagize ati “ Ni byo arateganywa kuzahindurwa uretse ko bikurikiza icyo amategeko asaba, ntabwo waryamye uyu munsi hanyuma nubyuka uvuge ngo amazina y’ahantu arahindutse kubera ko hari n’ibyo amategeko asaba cyane cyane ko hari n’ingaruka bigira mu rwego rw’imitegekere y’igihugu no mu buzima bw’igihugu.”

Yakomeje agira ati “ Niba guhindura izina ry’ahantu hamwe bigira ingaruka ku byangombwa by’indangamuntu by’umuntu uhatuye, ku nzego z’ubucamanza zigomba gukoresha izo mbibi n’ayo mazina, ku rwego rw’abagomba gucunga ibyangombwa by’ubutaka cyangwa se abashinzwe kugenzura za pasiporo ziba zaratanzwe zirimo ayo mazina , biba bisaba ko ibyo byose bigomba kubanza gusuzumwa.”

Gusa uyu muyobozi avuga ko nka Minisiteri y’Ubutegetsi bw’Igihugu bashingira ku nyito z’ubutegetsi aho kugendera ku byo abantu batandukanye baba batekereza mu mutwe wabo.

Abatuye ahitwa Bannyahe ngo baterwa ipfunwe n'iri zina

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved