EPD yaratiye Ethiopia uko ubufatanye bwatumye ingufu za biogaz zigera mu byaro

Yanditswe na Kanamugire Emmanuel
Kuya 7 Ugushyingo 2016 saa 07:52
Yasuwe : XX
0

Ihuriro ry’Abikorera mu bijyanye n’ingufu z’amashanyarazi mu Rwanda (Energy Private Developers) baratiye itsinda riturutse muri Ethiopia uburyo ubufatanye bwa Leta y’u Rwanda n’abikorera bwatumye ingufu za biogaz n’izikomoka ku mirasire y’izuba zigezwa mu byaro mu buryo bwihuse.

Mu rugendoshuri rw’iminsi itatu itsinda ry’abantu 10 riturutse muri Ethiopia rirangajwe imbere n’Umunyamabanga wa Leta muri Minisiteri ishinzwe amazi, amashyanyarazi no kuhira imyaka, Wondimu Tekle, basuye EPD berekwa aho u Rwanda rugeze mu guteza imbere biogaz n’ingufu zikomoka ku mirasire y’izuba.

Umuyobozi wa EPD, Dr Ivan Twagirashema yatangaje ko ibyo beretswe babishimye ndetse bakaba bafashe umwanzuro wo kubyigiraho.

Ati” Mu rugendoshuri rwabo icy’ingenzi kwari ukuganira natwe nk’abikorera tukabereka uko abikorera bafatanya na Leta mu guteza imbere porogaramu z’ingufu za biogaz n’imirasire y’izuba bikagera mu byaro.Bashimye urwego tugezeho ndetse banafata umwanzuro ko nibagera iwabo bazashishikariza abikorera babo gukorana na leta.”

Umunyamabanga wa Leta muri Minisiteri ishinzwe amazi, amashyanyarazi no kuhira imyaka muri Ethiopia Wondimu Tekle yashimye urwego u Rwanda rugezeho atangaza ko isomo rya mbere bigiye mu Rwanda ari uburyo abikorera na Leta buzuzanya mu iterambere ry’igihugu.

Ati” Isomo tuzajyana ni uburyo Leta ikorana bya hafi n’abikorera bityo ibikorwa bafite bikagerwaho vuba. Tuzabishishikariza abikorera bacu bashyire hamwe kuko bitari bihari.”

Jean Claude uwizeye, Umuyobozi w’ikompanyi Recons Ltd ikora ibijyanye no gutanga ingufu ziva mu bishingwe n’ingufu z’amashyanyarazi zo ku ngomero ntoya yatangaje ko bishimiye uru rugendoshuri kuko bamwe bigira ku bandi ibyo badafite.

Kugeza ubu ingo 9163 zikoresha biogaz mu guteka no gucana ndetse ibigo by’amashuri na za gereza bigera kuri 85 bakoresha biogaz bakarengera amashyamba yatemwaga.

Uwizeye yagaragaje ko kuba Leta ifata iya mbere ikorohereza abikorera, igatera inkunga abashaka kubakisha ibigega bya biogaz ari kimwe mu bituma iyi gahunda yihuta.

Phomolo Maphosa, umuyobozi w’Umuryango w’Abaholandi ushinzwe iterambere mu Rwanda (NSV) ari na wo wagize uruhare ku bufatanye na Minisiteri y’Ibikorwaremezo kugira ngo iri tsinda rize mu Rwanda,yatangaje ko impamvu bahisemo gusura ibijyanye na biogaz ndetse n’ingufu zikomoka ku mirasire y’izuba ari uko usanga iwabo bisa nk’ibidakoreshwa cyane.

Iri tsinda rizamara mu Rwanda iminsi itatu bakaba bazasura uturere dutandukanye aho biogaz zikoreshwa mu guteka n’aho ingufu zikomoka ku mirasire y’izuba zikoreshwa mu gucana ndetse banasure n’inzego zitandukanye za Leta bagirane ibiganiro.

Impande zombi zafunguye amarembo yo gusurana zikiga byinshi
Itsinda ryo muri Ethiopia ryahawe ikaze muri EPD
Dr Ivan Twagirashema uyobora EPD ari kumwe n'Umunyamabanga wa leta ushinzwe amazi, amashanyarazi no kuhira imyaka muri Ethiopia
Minisitiri muri Ethiopia yahawe imfashanyigisho y'uko urwego rw'ingufi ruhagaze mu Rwanda
Minisitiri muri Ethiopia Wondimu Tekle n'Umuyobozi wa EPD, Dr Ivan Twagirashema
Phomolo Maphosa, umuyobozi w’Umuryango w’Abaholandi ushinzwe iterambere mu Rwanda (NSV)

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza