00:00:00 IGIHE NETWORK KN KINYARWANDA EN ENGLISH FR FRANCAIS

Eng. Niyonzima Steven wayoboraga Rwanda CPCIC yitabye Imana

Yanditswe na Muhonzire Sylvine
Kuya 19 Nzeri 2021 saa 02:56
Yasuwe :
0 0

Eng. Niyonzima Steven wari umuyobozi w’Ikigo cya Leta gishinzwe ibijyanye no kurengera ibidukikije, Rwanda Cleaner Production and Climate Innovation Centre (CPCIC), ndetse wari umwe mu bagize inama y’Ubutegetsi y’Ikigo cy’Igihugu cyo Kubungabunga Ibidukikije (REMA) yitabye Imana kuwa 17 Nzeri 2021.

Rwanda CPCIC ibinyujije ku rukuta rwayo rwa Twitter, yatangaje ko Eng. Niyonzima yazize uburwayi, akitaba Imana ari kumwe n’umuryango we hamwe n’inshuti.

Eng.Niyonzima yabaye umuhuzabikorwa w’ikigo gishinzwe kugenzura imikorere y’inganda itangiza ibidukikije, Rwanda Resources Efficient and Cleaner Production Centre (RRECPC) kuva cyashingwa mu 2008 kugeza ubwo gihujwe n’Ikigo cyo guhanga udushya mu guhangana n’imihindagurikire y’ibihe (Climate Innovation Centre), mu 2019 bigakora CPCIC yari abereye umuyobozi.

Rwanda CPCIC, yatangaje ko yari umuyobozi ukunda abantu cyane nabo bakamukunda ndetse ko yahoraga afite inyota yo gufasha buri wese ubikeneye.

Yagize iti “Eng. Steven yari umugabo w’intangarugero wakundwaga na bose kandi agakunda buri wese. Yahoraga yishimiye gufasha. Mu mirimo ye yaranzwe no guteza imbere imikorere itangiza ibidukikije no guhanga udushya mu bijyanye n’ibikorwa bibungabunga ibidukikije.”

Bakomeje bagira bati “Uruhare yagize mu guharanira iterambere ry’ubukungu bw’u Rwanda habungabungwa ibidukikije ni runini. Asize umurage uzahoraho iteka. Mu gihe tumwunamira, twiyemeje kutazatatira igihango adusigiye. Twifatanije n’umuryango ndetse n’inshuti ze. Imana imuhe iruhuko ridashira.”

Eng. Niyonzima Steven yari inzobere mu bijyanye no kubungabunga ibidukikije no gukwirakwiza amazi meza, ndetse ni umwe mu batangije porogaramu ya RCEP mu Rwanda, yari igamije gukoresha ingufu zitangiza ikirere.

REMA nayo ibinyujije ku rukuta rwa Twitter yifatanyije n’umuryango we n’inshuti, imushimira uruhare yagize mu kubungabunga ibidukikije mu Rwanda ndetse itangaza ko umurage asize uzasigasirwa iteka.

Eng. Niyonzima Steven yitabye Imana azize uburwayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .