Kwamamaza

EALA yasabwe uruhare mu guta muri yombi abakekwaho Jenoside bacyidegembya mu Karere

Yanditswe kuya 15-09-2016 saa 15:40' na Niyonsenga Schadrack


Komisiyo y’Igihugu y’Ubumwe n’Ubwiyunge ( NURC) yasabye abadepite b’Inteko Ishinga Amategeko y’Umuryango wa Afurika y’Iburasirazuba (EALA) bari muri komite ishinzwe kurwanya ingengabitekerezo ya Jenoside no gukumira ipfobya n’ihakana ryayo gusaba ibihugu byabo kugaragaza ubushake mu guca umuco wo kudahana bigata muri yombi Abanyarwanda bakekwaho Jenoside bacyidegembya.

Mu ruzinduko abadepite icyenda bo muri EALA bari kugirira mu Rwanda, kuri uyu wa Gatatu tariki ya 14 Nzeri 2016 basuye Komisiyo y’Igihugu y’Ubumwe n’Ubwiyunge bagaragarizwa ibimaze kugerwaho, intambwe imaze guterwa mu bumwe n’ubwiyunge, basabwa kugira uruhare mu kubishimangira.

Komisiyo y’Igihugu y’Ubumwe n’Ubwiyunge ivuga ko ibintu byose bishobora kugerwaho haramutse hari ubushake bwa politiki ikaba yasabye intumwa za EALA kugaragaza ubushake no kwita ku muco wo guhana.

Umuyobozi Mukuru wa Komisiyo y’Igihugu y’Ubumwe n’Ubwiyunge, Mugaga Johnson, avuga ko hari amakuru y’uko ahari abanyabyaha ba ruharwa nka Kabuga Felicien bivugwa ko yaba aherereye muri Kenya n’abandi bakoze Jenoside mu Rwanda ariko kuri ubu bacyidegembya mu Karere nyamara ibyo bihugu ntibigaragaze ubushake bwo kubafata ngo bashyikirizwe inkiko.

Yagize ati “Mufite abanyarwanda bari mu bihugu byanyu, simvuze ngo mubirukane, twemerewe gutura aho ari ho hose mu Karere ariko abakoze ibyaha ntabwo ibihugu byanyu bikwiye kuba indiri zabo kuko ari bo bakwirakwiza ingengabitekerezo ya Jenoside mu rwego rwo kwikingira. Ntibari gucuruza, nta n’ikindi kintu gifatika baje gukora. Benshi iyo ubabajije icyo bakora muri ibyo bihugu bavuga ko aho bakomoka bahigwa bukware.”

Mugaga yasabye abadepite gushaka aba bantu no kuboherereza ubutabera.

Ati “ Mugomba rero kubamenya, mukabaduha tukabacira imanza. Niyo mwahitamo kuzibacira aho iwanyu byose nta kibazo. Umuntu akwiriye kuba afite icyo ahakora ari umuturage mwiza, uhinga, ucuruza cyangwa ukora indi mirimo ariko umunyabyaha ntimumutunge.”

Pareno Judith, Umunyakenya uyoboye Komite ya EALA ishinzwe kurwanya ingengabitekerezo ya Jenoside, avuga ko we na bagenzi be bakozwe ku mutima n’amateka babonye mu Rwanda by’umwihariko ku rwibutso rwa Jenoside rwa Kigali ku Gisozi.

Yagize ati “ Ibyo twabonye mu Rwanda ku rwibutso rwa Gisozi birababaje cyane, winjiramo ariko usohoka wabaye undi muntu. Ntiwakwiyumvisha ukuntu umuntu yishe akana k’umwaka umwe, birakurwaza ariko nyuma y’ibyo urongera ukabona u Rwanda rwaravutse ubwa kabiri. Igihugu cyashyizeho inzibutso kugira ngo abantu bamenye ko badakwiye kongera kwicana, gishyiraho Komisiyo y’Ubumwe n’Ubwiyunge kugira ngo Abanyarwanda bongere babe umwe.”

Agaruka ku kibazo cy’abanyabyaha bakingiwe ikibaba n’ibihugu bya EAC yagize ati “ Ku bwanjye mpamya ko hari uburyo bugomba gukurikizwa mu gukurikirana bariya banyabyaha batorotse. Iyo urebye mu masezerano Umuryango wa Afurika y’Uburasirazuba,EAC ugenda usinya ubona ko biyemeje kurwanya Jenoside, no guta muri yombi abayikoze baherereye muri ibi bihugu."

Yakomeje atangaza ko " Kubera ko ubu ibihugu bigize EAC bikorera hamwe mu buryo bwo kwita ku mutekano no mu buryo bwa gisirikare hakwiye gukomeza ibyo bikorwa n’amasezerano yashyizweho kugira ngo buri wese wakoze ibyaha abashe guhanwa.”

Ibihugu byo mu karere ka Afurika y’Uburasirazuba na Repubulika Iharanira Demokarasi ya Congo byakunze kugaragaza ubushake buke bwo guta muri yombi abanyarwanda babyidegembyamo kandi barasize bakoze Jenoside mu Rwanda yahitanye abatutsi barenga miliyoni.

Komisiyo y’Igihugu y’Ubumwe n’Ubwiyunge igaragaza ko Abanyarwanda 92.5% bari bafitanye ibibazo by’amakimbirane bamaze kwiyunga.

Mu myaka 22, u Rwanda rwabashije kunga abantu bari barabibwemo amacakubiri kuva ku mwaduko w’abazungu ubwo bigishaga amoko, bigaragaza ko igihugu gifite byinshi byo kwigisha Isi n’Akarere by’umwihariko ahakigaragara imvururu zishingiye kuri politiki.

Umuyobozi Mukuru muri NURC, Mugaga Johnson
Abadepite bishimiye intambwe u Rwanda rumaze gutera mu bumwe n'ubwiyunge
Abadepite bo muri EALA basobanurirwa imikorere ya Komisiyo y'Igihugu y'Ubumwe n'Ubwiyunge
Abadepite ba EALA bagize Komisiyo yashyizweho yo kurwanya Jenoside n'ingengabitekerezo yayo basabwe guta muri yombi abanyabyaha bakidegembya mu bihugu byabo

Amafoto: Mahoro Luqman


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved