EALA isanga u Rwanda ari ishuri ryo kurwanya Jenoside n’ingengabitekerezo yayo

Yanditswe na Kanamugire Emmanuel
Kuya 14 Nzeri 2016 saa 07:56
Yasuwe :
0 0

Inteko Ishinga Amategeko y’Umuryango wa Afurika y’Iburasirazuba (EALA), yashimye uko ubuyobozi bwiza bw’u Rwanda bwakuye igihugu mu icuraburindi rya Jenoside yakorewe Abatutsi, ivuga ko ari isomo ryiza ibihugu byose bikwiye kureberaho.

Kuri uyu wa 14 Nzeri, abadepite bagize Komisiyo ya EALA bari mu Rwanda mu isuzuma ry’ibijyanye na Jenoside n’ingengabitekerezo yayo n’uko yakumirwa mu karere, bashimangiye ko ibyabaye mu Rwanda bikwiye gusigira isomo ibindi bihugu byo mu karere n’Isi muri rusange.

Iyo Komisiyo igizwe n’abantu icyenda ihagarariwe na Judith Pareno ukomoka muri Kenya, izasura ibihugu byose biri muri EAC ihure n’abafatanyabikorwa batandukanye.

Pareno yavuze ko nyuma y’urugendo rwabo ruzamara amezi atatu ruzabafasha gutanga raporo igaragaza ibyakorwa kugira ngo Jenoside ikumirwe burundu.

Yagize ati “Turashaka gusura ibihugu bigize Umuryango wa Afurika y’Iburasirazuba twumve impamvu nyamukuru za Jenoside, uko abahuye n’ingaruka zayo babyitwayemo, uko babashije kuyirinda, uko twagaragaza ikibazo n’ubutumwa batanga ku bindi bihugu.”

Mu Rwanda bahageze ku cyumweru bakaba bamaze gusura urwibutso rwa Jenoside rwa Kigali, urwa Nyanza ya Kicukiro no kuganira na Komisiyo y’Igihugu yo kurwanya Jenoside (CNLG).

Yahya Maryam Ussi ukomoka muri Tanzania, yashimye ubuyobozi bwiza bw’u Rwanda by’umwihariko Perezida Kagame wunze Abanyarwanda bakaba babanye mu mahoro.

Yagize ati “Ndashima ubuyobozi bw’u Rwanda by’umwihariko Perezida, kugarura amahoro mu gihugu, abantu babaye imfubyi bababaye bakabana neza n’ababahemukiye. Uru rugero rwiza turashaka ko rugera muri EAC yose.”

Mugenzi we Tiperu, Nusura O wo muri Uganda, yongeyeho ko ahari ubuyobozi bwiza Jenoside itabaho. Asanga ibihugu byose birebeye ku miyoborere y’u Rwanda nta Jenoside yakongera kubaho ku Isi.

Mu mirimo yabo, Abadepite ba EALA bazasuzuma ingaruka z’ingengabitekerezo ya Jenoside n’ipfobya ryayo ku mutekano w’akarere, bite ku buryo bwo kuyirwanya, guta muri yombi abayikekwaho, bakore inyigo igaragaza uko amagambo y’urwango, ingengabitekerezo ya Jenoside no kuyipfobya byarwanywa mu karere.

Bazanagaragaza uko EALA n’izindi nzego za EAC zagira imiyoborere ikumira Jenoside.

Mu Rwanda barateganya no kuganira na Komisiyo y’Ubumwe n’Ubwiyunge, Ikigo gishinzwe gukemura amakimbirane (CCM), Umuryango Ibuka, Minisiteri y’Ubutabera n’Ubushinjacyaha.

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244