Kwamamaza

EAC yihaye amezi atatu yo kumva kimwe amasezerano y’ubucuruzi n’ibihugu by’u Burayi

Yanditswe kuya 9-09-2016 saa 07:11' na Cyprien Niyomwungeri


Umuryango wa Afurika y’Uburasirazuba (EAC), watangaje ko wihaye amezi atatu yo kuganira ku masezerano y’ubufatanye mu bukungu n’Umuryango w’Ubumwe bw’u Burayi, EU.

Amasezerano ‘Economic Partnership Agreement, EPA’ hagati ya EAC na EU, afatwa nk’azoroshya ubucuruzi n’ubufatanye mu iterambere hagati y’iyi miryango yombi, harimo no gukuraho imisoro ku bicuruzwa bikorerwa mu bihugu bigize iyo miryango yombi.

U Rwanda na Kenya byayashyizeho umukono mu cyumweru gishize ariko Tanzania n’u Burundi byatangaje ko bitazayasinya. Uganda yo iherutse gutangaza ko yemeye kuzayasinya.

Mu nama ya 17 idasanzwe y’abakuru b’ibihugu bigize EAC, yatangiye kuri uyu 8 Kanama 2016 i Dar es Salaam muri Tanzania, Perezida John Magufuli uyoboye EAC, yatangaje ko uyu muryango uzakererwa gusinya aya masezerano kuko uzabanza kuyumva kimwe.

Yagize ati “Twihaye amezi atatu yo kuganira byisumbuye ku gusinya amasezerano ya EPA, tuzahura muri Mutarama 2017 tunonosore iki kibazo.”

Byari biteganyijwe ko kuwa 1 Ukwakira uyu mwaka ibihugu byose bigize EAC biba byamaze gusinya aya masezerano, bitakorwa bikabuzwa kohereza ibicuruzwa ku masoko y’i Burayi.

Ahanini Kenya ikeneye cyane ko ayo masezerano ashyirwaho umukono kugira ngo ibashe kugeza ibicuruzwa byayo byiganjemo indabo ku isoko ry’i Burayi itatswe imisoro.

Nkuko Reuters ibitangaza, Perezida Magufuli yavuze ko bazasaba Umuryango w’Ubumwe bw’u Burayi (EU) ukemerera Kenya kugeza ibicuruzwa byayo ku masoko mu gihe bazaba bakiganira kuri ayo masezerano.

Yagize ati “Turasaba EU ntihane Kenya ngo iyikumire ku isoko ry’i Burayi.”

Tanzania yanze gusinya ayo masezerano ishimangira ko nta nyungu EPA izazanira EAC ahubwo izaha isoko rigari ibihugu byo muri EU bifite inganda zateye imbere, ibicuruzwa byabo bikiharira amasoko yo mu karere.

Birashoboka ko izisubiraho nkuko Uganda yabikoze ariko ikibazo kinini gisigaye ku Burundi kuko bwavuze ko aya masezerano atabureba bitewe nuko nta mikoranire bugifitanye na EU bitewe n’ibihano uwo muryango wafatiye iki gihugu kubera imvururu zimaze umwaka urenga.

U Burundi budasinye kuri aya masezerano byagorana ko yubahirizwa kuko ari ngombwa ko ibihugu byose bya EAC bisinya kuri aya masezerano kugira ngo ashyirwe mu bikorwa nk’uko byemeranyijwe urujya n’uruza rw’abantu n’ibicuruzwa.

Ibihugu byo muri EAC byohereza cyane muri EU, Ikawa, indabo, itabi, icyayi, amafi n’imboga, mu gihe ibihugu byo muri EU byohereza muri EAC ibicuruzwa birimo imashini zo mu nganda n’ibyuma binyuranye, imodoka, imiti n’ibindi.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved