Dr Rose Mukankomeje wayoboraga REMA agiye gusubizwa mu rukiko

Yanditswe na Philbert Girinema
Kuya 25 Kanama 2016 saa 01:34
Yasuwe :
0 0

Dr Rose Mukankomeje wayoboraga Ikigo cy’Igihugu gishinzwe kurengera Ibidukikije,REMA, agiye gusubizwa imbere y’ubutabera kugirango atangire kuburanishwa mu mizi ku byaha akurikiranyweho birimo ubufatanyacyaha mu kumena ibanga ry’akazi.

Dr Mukankomeje kuwa 14 Mata 2016 yari yaburanye ku ifungwa n’ifungurwa ry’agateganyo, Urukiko Rukuru rutegeka ko akurikiranwa ari hanze mu gihe hategerejwe itangira mu mizi ry’urubanza.

Ubushinjacyaha bw’u Rwanda buvuga ko tariki ya 29 Mata 2016, bwatanze idosiye y’ikirego cye mu Rukiko rw’Ibanze rwa Kagarama kugirango atangire kuburanishwa mu mizi.

Umuvugizi w’Inkiko, Emmanuel Itamwa, yabwiye IGIHE ko uru rubanza ruzatangira kuburanishwa tariki ya 27 Nzeli 2016.

Ibihe by’ingenzi bya Mukankomeje imbere y’ubutabera

Tariki ya 21 Werurwe 2016 nibwo hamenyekanye amakuru y’itabwa muri yombi rya Dr Rose Mukankomeje wari Umuyobozi wa REMA akurikiranyweho ibyaha bishingiye ku kiganiro yagiranye kuri telefoni na Bisamaza Prudence wakorwagaho iperereza ku byaha bya ruswa no gushaka gufunguza abayobozi b’Akarere ka Rutsiro.

Ubushinjacyaha bumurega ibyaha bitatu birimo ubufatanyacyaha mu kumena ibanga ry’akazi, kuba gatozi mu gusibanganya ibimenyetso no kuba gatozi mu gusebya inzego za leta.

Kuwa 30 Werurwe nibwo yatangiye kuburana ku ifungwa n’ifungurwa ry’agateganyo Urukiko Rwisumbuye rwa Nyarugenge rutegeka ko afungwa iminsi 30 ariko ahita ajuririra iki cyemezo mu Rukiko Rukuru.

Umwanzuro ku bujurire bwe wasomwe kuya 14 Mata 2016 hanzurwa ko arekurwa akazajya yitaba ubushinjacyaha ku rwego rwa Nyarugenge buri wa Gatanu w’icyumweru mu gihe cy’amezi atatu.

Yahise ategekwa gushyikiriza ubushinjacyaha ibyangombwa byo kujya mu mahanga kugeza urubanza ruciwe bwa nyuma.

Yategetswe kandi kutarenga Umujyi wa Kigali adahawe uburenganzira; kuguma mu nzu ye iri mu mu Murenge wa Kagarama mu Karere ka Kicukiro, yashaka kwimuka akabimenyesha urwego urubanza rwe ruzaba rugezeho.

Ikindi yategetswe harimo gukoresha telefoni asanganywe, mu gihe cy’amezi atatu ndetse akirinda ibintu byose byabangamira idosiye ye.

Dr. Mukankomeje n'Umwunganizi we Mudahemuka Tharcisse bwa mbere ubwo yitabaga urukiko

Inkuru bifitanye isano

- Dr Rose Mukankomeje uyobora REMA yatawe muri yombi

- Dr Rose Mukankomeje yahakanye ibyaha byose aregwa

- Urukiko rwategetse ko Dr Rose Mukankomeje afungwa iminsi 30 y’agateganyo

- Humviswe ubujurire bwa Dr.Mukankomeje ku ifungwa ry’agateganyo

- Urukiko Rukuru rwategetse ko Dr. Rose Mukankomeje arekurwa


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza