Dr Gahutu yikomye Minisitiri w’Uburezi ku ifungwa rya Kaminuza ya Rusizi

Yanditswe na IGIHE
Kuya 20 Werurwe 2017 saa 12:53
Yasuwe :
0 0

Perezida wa Kaminuza Mpuzamahanga ya Rusizi,Dr Gahutu Pascal, yandikiye Minisitiri w’Intebe avuga ko ifungwa ryayo by’agateganyo ritakurikije amategeko ahubwo ko Minisitiri w’Uburezi ubwe ari we ubiri inyuma.

Mu ibaruwa Dr Gahutu yanditse kuwa 11 Werurwe 2017, yasabye kurenganurwa avuga ko Minisitiri w’Uburezi yahereye ku kibazo cy’amakimbirane yari hagati y’abanyamigabane b’iyi kaminuza asa n’uwitiriye kaminuza umuntu umwe (Dr Gahutu) nyamara iri mu maboko y’abantu benshi.

Dr Gahutu avuga ko Minisitiri w’Uburezi yagiye yanga kubonana na we imbonakubone ngo bagirane ibiganiro ahubwo inshuro nyinshi agaha umwanya uruhande bari bahanganye.

Muri iyi baruwa, Dr Gahutu yagarutse ku ifungwa rye muri Gashyantare uyu mwaka, ubwo yari akurikiranyweho gukoresha inyandiko mpimbano no kurigisa umutungo wa Kaminuza avuga ko Minisitiri w’Uburezi ari we wabigizemo uruhare akamuhimbira ibyaha mu gihe nta bimenyetso bigaragara byari bihari, ndetse ifatwa n’ifungwa rye rikaba ritarubahirije amategeko.

Dr Gahutu watawe muri yombi tariki 8 Gashyantare 2017, yagejejwe imbere y’urukiko kuwa 22 Gashyantare 2017, aburana ku ifunga n’ifungurwa by’agateganyo.Ku wa 24 Gashyantare 2017 nibwo urubanza rwasomwe umucamanza ategeka ko Dr Gahutu afungurwa akazakurikiranwa ari hanze.

Kaminuza Mpuzamahanga ya Rusizi ngo yakomeje kubahiriza ibisabwa amashuri makuru na kaminuza uhereye igihe yemererwaga gukorera mu Rwanda nubwo igenzura ryakozwe Gahutu anenga ko ritujuje ibisabwa ryatumye ihagarikwa.

Gahutu avuga ko iri genzura ryari rifite ikindi rihishe ndetse ibyo ryagaragaje binyuranye n’ukuri kw’ibiyikorerwa muri Kaminuza.

Yasabye Minisitiri w’Intebe ko ibyo byose byagenzurwa hagamijwe kurengera abanyeshuri bashobora kuburira serivisi z’uburezi hafi y’aho baherereye bakajya mu bihugu bituranyi ndetse n’abarimu bashobora gutakaza akazi kabo.

Kaminuza Mpuzamahanga ya Rusizi yemerewe gukorera mu Rwanda kuwa 20 Werurwe 2015.

Iyi Kaminuza yakunze kuvugwamo ibibazo byo kutumvikana hagati y’abanyamigabane bayo ahanini bishingiye ku micungire y’umutungo.

Igenzura ryakozwe muri za kaminuza n’amashuri makuru ku bijyanye n’ireme ry’uburezi, ibikorwaremezo n’ibindi rigiye gutuma hari izindi kaminuza zishobora gufatirwa ibyemezo amwe mu mashami yazo akaba yafungwa nk’uko byabaye kuri Kaminuza ya Gitwe mu minsi ishize.

Dr Mugisha Sebasaza Innocent, uyobora Inama Nkuru y’amashuri makuru na za Kaminuza mu Rwanda (HEC), mu ntangiriro za Gashyantare yabwiye IGIHE ko hari gukorwa raporo ku myanzuro y’iri genzura izajya ahagaragara mu minsi mike.

Mu kiganiro n’abanyamakuru gikurikira Umwiherero w’abayobozi bakuru b’igihugu Minisitiri w’Uburezi yavuze ko harebwe ku nzego uburezi bwashoboye kuzamukamo n’ibyo bugomba kongeramo imbaraga, hemezwa ingingo eshatu zatuma ireme ribasha kuzamuka, hakarengwa ubwitabire bw’abanyeshuri gusa.

Kuri uyu wa 20 Werurwe hateganyijwe ikiganiro n’abanyamakuru aho Minisiteri y’Uburezi iri busobanure gahunda yo guhagarika by’agateganyo zimwe muri porogaramu z’amasomo n’ibikorwa by’amashuri makuru yigenga amwe n’amwe.

Kaminuza Mpuzamahanga ya Rusizi yakunze kumvikanamo amakimbirane hagati y'abayishinze bapfa imicungire y'umutungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244