Kwamamaza

Dr.Agnes Binagwaho ahugiye ku ki nyuma yo kuvanwa muri Minisante?

Yanditswe kuya 16-09-2016 saa 10:05' na Philbert Hagengimana


Hashize amezi abiri n’iminsi itanu hasohotse itangazo ryashyizweho umukono na Minisitiri w’Intebe, rivuga ko Perezida wa Repubulika yakuye ku mirimo Dr.Agnes Binagwaho wari Minisitiri w’Ubuzima.

Iryo tangazo ryasohotse kuwa 11 Nyakanga 2016. Kuva icyo gihe benshi bibazaga ibindi bikorwa Dr. Agnes Binagwaho arimo, kuko nta n’undi mwanya yari yahabwa haba muri Guverinoma y’u Rwanda cyangwa mu yindi miryango mpuzamahanga, cyane ko agikurwa muri Minisante yatangaje ko yishimiye gukorana na Perezida Kagame “Umuyobozi ufite icyerekezo” kandi ko yize byinshi.

Mu kiganiro na IGIHE, Dr.Agnes Binagwaho yagize ati “Ubu ndi umwarimu muri UGHE” (University of Global Health Equity, UGHE, Kaminuza igamije kugeza ubuzima kuri bose).”

Dr.Agnes Binagwaho yigisha muri UGHE, Kaminuza itanga impamyabumenyi z’icyiciro cya gatatu cya kaminuza(Master’s) mu by’ubuzima kuri bose, iherereye mu Murenge wa Rwinkwavu mu Karere ka Kayonza, aho yigisha buri mpera z’icyumweru ndetse amasomo ye akayatangira i Kigali kuwa kabiri wa buri cyumweru.

Umwanya we wose ubu yabaye awuhariye kuba mwarimu ndetse na byo ngo bimuteye ishema kuko bimuha amahirwe yo gukomeza gukorera igihugu.

Ati “Nari nsanzwe nkorana na bo nk’uko nigishaga muri Kaminuza Harvard mu biruhuko no mu mpera z’icyumweru (Weekend), aho nakoreshaga uburyo bwa E-Learning” (Kwigisha akoresheje amashusho, we ari mu Rwanda abanyeshuri bari muri Leta zunze ubumwe za Amerika).

Umwaka ushize wa 2015 ni bwo hafunguwe iyo Kaminuza ifite imisusire nk’iya Harvard bitewe na gahunda y’imyigishirize n’urwego rw’ubumenyi buhatangirwa, ndetse iyi kaminuza ikaba yarakiriye abanyeshuri ku nshuro yayo ya kabiri, ubu batangiye amasomo.

Dr.Binagwaho akorana n’abandi barimu batandatu bigisha muri Kaminuza ya Harvard, akemeza ko ari amahirwe u Rwanda rufite yo kugira urwego ruhanitse rw’ubumenyi mu birebana n’ubuzima.

Ati “Iyi ni intambwe y’ingenzi u Rwanda ruteye. Hari kaminuza mpuzamahanga nyinshi, kuba rero n’iyi irimo bizagira uruhare rukomeye mu iterambere n’ubukungu, bihindure ubuzima bw’abaturage, ikindi kandi iyi Kaminuza iri mu murongo w’icyerekezo 2020 cya leta, cyo kurwanya ubukene.”

Dr Binagwaho yavanywe ku mwanya wa Minisitiri w’Ubuzima nyuma ya byinshi byayivuzwemo ndetse n’amakosa yagiye ayigaragaramo, kugeza n’aho anatumijwe n’Inteko Ishinga Amategeko ngo atange ibisobanuro, Inteko Rusange igasozwa batanyuzwe.

Dr Agnes Binagwaho imbere y'abanyeshuri ba University of Global Health Equity

Abakoranye na we muri urwo rugendo rwose bafite uko bamuzi gutandukanye ndetse ubwo yari Minisitiri w’Ubuzima, hari ibibazo byagiye bigaragara.

- Kwegura no gufungwa kw’abayobozi b’ibitaro

Ku buyobozi bwe nka Minisitiri w’Ubuzima, abayobozi benshi b’ibitaro barirukanywe, abandi barafungwa, utibagiwe n’abasezeye bakajya kwikorera mu mavuriro yigenga cyangwa bagashinga ayabo.

Turebye nko mu myaka ya 2015/2016, abayobozi b’ibitaro bya Kabutare, Ruhango, Kibogora, Nyagatare, Kibuye n’ahandi batawe muri yombi kubera impamvu zifitanye isano n’imiyoborere itajyanye n’icyerekezo u Rwanda rwihaye. Hari kandi n’Umuyobozi w’ibitaro bya Kinazi biherereye mu Karere ka Ruhango uherutse kwegura kuri iyi mirimo.

- Kwiyongera kwa Malaria

Mu mpera z’umwaka ushize indwara ya Malaria yagarikaga ingogo mu turere ikunda kwibasira cyane mu gihugu. Ubu bwiyongere Minisiteri y’Ubuzima yemeje ko bufitanye isano n’amakosa yakozwe ubwo uruganda NetProtect rwagurishaga iyo Minisiteri inzitiramubu miliyoni eshatu zitujuje ubuziranenge.

Dr. Agnes Binagwaho w’imyaka 62 yavukiye mu Rwanda mu yahoze ari Perefegitura ya Gikongoro (ubu ni Nyamagabe) ariko akurira i Burayi, yigayo ndetse aranahatura. Ni umubyeyi w’abana babiri.

Inkuru bifitanye isano

- Dr Agnes Binagwaho yavanywe ku mwanya wa Minisitiri w’Ubuzima

- Dr.Binagwaho asize inkuru ki mu rwego rw’ubuzima mu Rwanda?


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved