Dosiye ya Dr. Francis Habumugisha uregwa gukubitira umukobwa mu ruhame yageze mu Bushinjacyaha

Yanditswe na Akayezu Jean de Dieu
Kuya 8 Nzeri 2019 saa 05:53
Yasuwe :
0 0

U Bushinjacyaha bw’u Rwanda, ku wa Gatanu bwakiriye dosiye ya Dr Francis Habumugisha, umushoramari akaba na nyiri Goodrich TV, ukurikiranyweho icyaha cyo gutuka no gukubitira mu ruhame umukobwa yakoreshaga.

Mu minsi ishize Kamali Diane yanditse kuri Twitter ubutumwa buherekejwe n’amashusho yafashwe na kamera yo mu nyubako, avuga ko Dr. Habumugisha yamukubitiye mu ruhame, abimenyesha Urwego rw’Ubugenzacyaha, RIB, ariko ngo “hashize amezi abiri atarahanwa.”

Uyu mukobwa yabwiye IGIHE ko ayo mashusho yafashwe ku wa 16 Nyakanga 2019 ubwo bari mu nama mu nyubako ya M. Peace Plaza aho Goodrich TV ikorera. Icyo gihe ngo umukobwa bakorana yarimo avuga ku makosa y’abayobozi barimo Dr Francis, uyu mugabo akeka ko Kamali ari gufata amashusho niko guhaguruka amwuka inabi.

Ati “Twari kumwe mu nama n’abandi, arahaguruka anyambura telefoni, ankubita urushyi aranantuka. Yatekereje ko nari ndimo gufata amashusho.”

Kamali avuga ko ikibazo cye kirimo gukurikiranwa kandi icyo yifuza ari uguhabwa ubutabera.

Ku wa Kane w’iki Cyumweri nibwo Dr Habumugisha yatawe muri yombi, dosiye ye ishyikirizwa Ubushinjacyaha ku munsi ukurikiyeho.

Umushinjacyaha Mukuru, Mutangana Jean Bosco yabwiye IGIHE ko bashyikirijwe dosiye kugira ngo ipererereza rikomeze bityo hatangwe ubutabera.

Yakomeje ati “Gukubita umuntu mu ruhame harimo no kumutesha agaciro kandi bihabanye n’umuco wacu, ndetse ni ingeso mbi. Amategeko abereyeho gukosora abantu bitwara batyo kugira ngo uwakorewe icyaha agirire icyizere ubutabera, kuko bugomba kumurengera bumusubiza icyubahiro mu gihe uwakoze icyo cyaha akurikiranywe. Kubaza ibyo wakoze ni imwe mu nkingi zikomeye igihugu cyacu cyubakiyeho.”

Igihe iki cyaha kiramutse kimuhamye, ingingo ya 121 mu Itegeko riteganya ibyaha n’ibihano muri rusange ivuga ko umuntu wese ubishaka, ukomeretsa undi, umukubita cyangwa umusagarira ku buryo bwa kiboko bubabaje, aba akoze icyaha.

Iyi abihamijwe n’urukiko ahanishwa igifungo kitari munsi y’imyaka itatu ariko kitarenze imyaka itanu n’ihazabu y’amafaranga atari munsi y’ibihumbi 500 Frw ariko atarenze miliyoni 1 Frw.

Iyo icyaha cyakorewe umwana, umubyeyi, uwo bashyingiranywe cyangwa umuntu udashoboye kwitabara kubera imiterere ye ku mubiri cyangwa mu bwenge, ahanishwa igifungo kitari munsi y’imyaka itanu ariko kitarenze imyaka umunani n’ihazabu y’amafaranga atari munsi ya miliyoni imwe ariko atarenze miliyoni 2 Frw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza