Disi Dieudonné yasabye ubutabera ku mibiri y’abavandimwe be bazize Jenoside yaburiwe irengero

Yanditswe na Thamimu Hakizimana
Kuya 5 Ugushyingo 2019 saa 02:49
Yasuwe :
0 0

Disi Dieudonné wamamaye mu gusiganwa ku maguru yasabye ubutabera ku mibiri y’abavandimwe be bishwe muri Jenoside yakorewe Abatutsi mu 1994 yataburuwe ikaza kuburirwa irengero.

Muri Jenoside, umuryango wa Disi Didace uvukamo na Disi Dieudonné, warahizwe ndetse bamwe mu bavandimwe be baricwa bahorwa uko bavutse.

Mu gihe imyaka isaga 25 ishize ibaye hari ahakigaragara ahari imibiri itarashyingurwa mu cyubahiro.

Umuryango wa Disi Didace na wo nyuma yo gutohoza bamenye ko hari abavandimwe babo bishwe bakajugunywa mu bwiherero.

Aya makuru yamenyekanye mu 2018 ubwo mu baturanyi babo bagiranaga ikibazo umwe akabwira undi ko ashobora kumutema akamujugunya mu bwiherero, akiruka amuhunga avuga ko adashaka ko amugira nk’uko bagize abo mu muryango wo kwa Disi Didace.

Bavuga ko abana babiri bo kwa Disi bari bahungiye iwabo barimo Uwayezu Danny wari ufite imyaka icyenda na Ufiteyezu Uwayezu Raymond w’imyaka irindwi; bahamaze iminsi baza kwicwa bajugunywa mu bwiherero ndetse bukomeza gukoreshwa.

Ayo makuru akimenyekana inzego z’ibanze zatangiye kuyakurikirana ngo haboneke imibiri ine ariko biza gutangazwa ko nta yabonetse.

Bamwe mu barokokeye Jenoside mu Murenge wa Kibirizi, mu Karere ka Nyanza, basaba ko abagize uruhare mu ibura ry’imibiri y’ababo yari yataburuwe bakurikiranwa n’ubutabera.

Disi Dieudonné yabwiye IGIHE ko ayo makuru akimenyekana inzego z’ubuyobozi n’iz’umutekano n’abaturage batangije gushaka ukuri kw’ayo makuru.

Yagize ati “Mu 1994 ubwo Jenoside yakorerwaga Abatutsi, hari abana b’iwacu babiri bagerageje kujya mu rugo rw’umuturanyi, baje kwicwa bajugunywa mu musarani bakomeza kuwukoresha. Mu mpera za 2018 nibwo bivuyemo habayeho ubushyamirane muri urwo rugo.”

Disi ashimangira ko ubuyobozi bw’Umurenge wa Kibirizi n’abaturage bagiye gushakisha iyo mibiri muri urwo rugo babona igera kuri ine.

Yagize ati “Habaye igikorwa cyo kureba ayo makuru umwana yavuze baragenda barataburura ku buryo gitifu yemeza ko imibiri bayisanze muri metero esheshatu na zirindwi, hanyuma ageza ijambo ku baturage abasaba kuyitwara bayijyana ku Murenge wa Kibirizi.”

Yakomeje avuga ko yaje gutungurwa no kumva Umunyamabanga Nshingwabikorwa w’Umurenge wa Kibirizi, Habineza Jean Baptiste, avuga ko amakuru ahabanye n’ay’imibiri yabonetse.

Habineza we yemeza ko muri ubwo bwiherero bahabonye umubiri w’umuntu umwe gusa n’imyenda myinshi.

Ati “Imibiri bavuga ubwo bwiherero twagiye kubureba dukuramo umubiri umwe w’umuntu mukuru rwose uhambiriye ariko dukuramo n’imyenda myinshi muri make n’uko bimeze.”

Yakomeje avuga ko uwo mubiri w’umuntu umwe wagaragaye mu bwiherero ukiri ku Murenge wa Kibilizi anashimangira ko nta byinshi yabivugaho kuko byamaze kugera mu butabera.

Umuvugizi w’Urwego rw’Ubugenzacyaha RIB, Marie Michelle Umuhoza yabwiye IGIHE ko bakiriye ikirego gishinja Habineza icyaha cyo gupfobya Jenoside.

Ati “Ikirego turagifite, twakibonye tariki 5 Ukwakira uyu mwaka, abarega bashinja uwo gitifu icyaha cyo gupfobya Jenoside.”

Kuri ubu hatangijwe iperereza ku cyaha gishinjwa Habineza ndetse riracyakomeje.

Disi Dieudonné yasabye guhabwa ubutabera ku mibiri y’abavandimwe be bazize Jenoside yaburiwe irengero nyuma yo gutabururwa mu musarani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza