Desalegn yagaragaje ko imiyoborere ya Afurika ishobora gutuma kurandura inzara mu 2025 bitagerwaho

Yanditswe na Habimana James
Kuya 26 Ugushyingo 2019 saa 04:19
Yasuwe :
0 0

Hailemariam Desalegn wabaye Minisitiri w’Intebe wa Ethiopia, yavuze ko intego umugabane wa Afurika wihaye yo kurandura ikibazo cy’imirire mu 2025, ishobora kutagerwaho kubera imiyoborere itanoze mu bihugu bimwe bigize uyu mugabane.

Desalegn wanatoranyijwe kuyobora inama y’ubutegetsi y’Ihuriro Nyafurika ku Iterambere ry’Ubuhinzi muri Afurika, AGRA, yabitangaje kuri uyu wa Kabiri ubwo Minisitiri w’Intebe, Dr Edouard Ngirente, yatangizaga ku mugaragaro ko u Rwanda ruzaba icyicaro cy’iri huriro mu myaka itanu iri imbere.

U Rwanda kandi nirwo ruzakira inama y’iri huriro izaba kuva tariki 8-11 Nzeri 2020.

Ishami rya Loni rishinzwe Ubuhinzi n’Ibiribwa ku Isi (FAO), ritangaza ko abatuye isi barenga miliyoni 800 bugarijwe n’ikibazo cyo kubura ibirirwa. Abanyafurika miliyoni zirenga 257 nibo bugarijwe n’iki kibazo, abarenga 90% bakaba ari abatuye munsi y’ubutayu bwa Sahara.

Nubwo iki kibazo cyugarije Abanyafurika, kugeza ubu 60% by’ubutaka bwa Afurika ntibubyazwa umusaruro.

Mu Rwanda ho abafite ikibazo cy’imirire bari kuri 18%, mu gihe abihagije ku biribwa ari 82% nk’uko Minisiteri y’Ubuhinzi n’Ubworozi ibigaragaza.

Hailemariam Desalegn avuga ko Afurika irimo gutera imbere kandi ibyo nta muntu ubishidikanyaho, atanga urugero rw’uburyo igihugu akomokamo, Ethiopia, mu myaka 15 ishize ubukene bwagabanyutse ku kigero gikomeye.

Yavuze ko Ethiopia yashyize ingufu mu buhinzi bukaba aribwo bwafashije kugabanya ubukene.

Yagize ati “Haracyari inzira yo kuganamo, hagomba guhangwa imirimo myinshi kuri uyu mugabane kuko hari ikibazo cy’ubukene cyane cyane mu bakiri bato, tugomba kugira ubuyobozi bwiza, gusa hatagizwe igikorwa Afurika izakomeza kuba umugabane urangwa no kugira abaturage bakennye kandi bashonje.”

“Bimwe mu bihugu bya Aziya na Amerika byari bibayeho nkatwe ariko birimo guharanira kugeza ubukene kuri zero, muri Afurika ho nta kirakorwa, iki ni ikibazo tugomba kurwana nacyo, nk’ubu amasezerano ya Malabo agaragaza ko mu 2025 tugomba kuba nta nzara dufite, ubu dusigaje imyaka itanu gusa, ibi ntabwo tuzabigeraho mu gihe twaba gukomeje gutya.”

Desalegn yavuze ko “Dukeneye kugira imiyoborere myiza ituma ubuhinzi buhinduka, ibihugu byinshi bya Afurika ntabwo bifite iyo myumvire yo guteza imbere ubuhinzi.”

Minisitiri w’Intebe, Dr Ngirente Edouard, avuga ko icyiciro cy’ubuhinzi muri Afurika usanga kigaragaramo umubare w’abantu bakuze cyane, iki kikaba ari igihe ko abakiri bato nabo bashishikarizwa gukora ubucuruzi ariko bushingiye kuri uyu mwuga.

Ati “Ibihugu byacu bikeneye gukomeza gushyira ingufu mu bijyanye n’ikoranabuhanga rikoreshwa mu buhinzi, ibi byakorwa hakoreshejwe nko kuzana abahanga mu by’ubuhinzi kugira ngo bakorane n’abahinzi.”

Minisitiri w’Ubuhinzi n’Ubworozi, Dr Mukeshimana Geraldine, avuga ko u Rwanda ari kimwe mu bihugu byihutishije mu kwihaza mu biribwa muri Afurika, kuko mu 2006 abanyarwanda 48% aribo bari bihagije mu biribwa, nyamara mu myaka 10 bakaba bageze kuri 82%.

Ati “Iki ni ikintu cyo kwishimira ariko ntibikuyeho ko imbaraga zikomeza gushyirwaho, tubona ko tutaragera aho twifuza niyo mpamvu twinjira mu igenamigambi ry’igihugu ngo abanyarwanda bagire amafaranga yabunganira.”

Muri Kamena 2014, abakuru b’ibihugu bigize Umuryango wa Afurika Yunze Ubumwe bahuriye i Malabo muri Guinée Equatoriale, bemeza amasezerano agamije guteza imbere ubuhinzi muri Afurika yiswe ‘Malabo Declaration’.

Bimwe mu byo biyemeje harimo kuba nta nzara y’ibiribwa izaba ikirangwa ku mugabane mu 2025, guhangana n’ubukene binyuze mu guteza imbere ubuhinzi, kongera ishoramari mu buhinzi, gufata neza umusaruro wangirika n’ibindi.

Dr Ngirente yavuze ko abahanga mu by'ubuhinzi bafasha kurandura ikibazo cy'imirire muri Afurika
Hailemariam Desalegn avuga ko Afurika igifite byinshi byo gukora mu kurandura ikibazo cy'imirire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza