Kwamamaza

Depite Nyirasafari na Mureshyankwano bazasimburwa na nde?

Yanditswe kuya 6-10-2016 saa 12:34' na Cyprien Niyomwungeri


Nyuma y’uko kuwa 4 Ukwakira 2016 Abadepite babiri mu Nteko Ishinga Amategeko, Nyirasafari Esperance na Mureshyankwano Marie Rose baherewe inshingano nshya, haribazwa icyo amategeko ateganya ku myanya bari bafite mu Nteko Ishinga Amategeko n’uko bazasimbuzwa.

Depite Nyirasafari yagizwe Minisitiri w’Uburinganire n’Iterambere ry’Umuryango asimbuye Dr.Diane Gashumba naho Depite Mureshyankwano agirwa Guverineri w’Intara y’Amajyepfo asimbuye Guverineri Munyantwari Alphonse.

Bitewe n’uko badashobora kubangikanya imirimo ibiri, aba badepite bagomba kwegura ku mirimo bari basanganywe yo guhagararira abaturage mu Nteko Ishinga Amategeko nkuko byagenze kuri Uwacu Julienne wabaye Minisitiri wa Siporo n’umuco, Kaboneka Francis wabaye Minisitiri w’Ubutegetsi bw’Igihugu, Bwiza Connie weguye ku giti cye na Mukandasira Caritas wari Guverineri w’Intara y’Uburengerazuba.

Itegeko Ngenga rigena imikorere y’Umutwe w’Abadepite mu Nteko Ishinga Amategeko riteganya ko ‘Umudepite weguye ku murimo w’Ubudepite ku mpamvu zinyuranye ashyikiriza Perezida w’Umutwe w’Abadepite ibaruwa y’iyegura rye, akagenera kopi Perezida wa Repubulika. Perezida w’Umutwe w’Abadepite abigeza ku nzego bireba mu gihe kitarenze iminsi itatu y’akazi’.

Riteganya kandi ko iyo ‘Umudepite atakaje cyangwa akuwe ku murimo we w’ubudepite, umwanya we uhabwa ukurikiraho ku ilisiti yatoreweho akarangiza igihe cya manda gisigaye iyo kirenze umwaka umwe’.

Abandi batowe bitanyuze mu buryo bw’amalisiti iyo batakaje cyangwa bakuwe ku murimo w’ubudepite, amatora asubirwamo.

Ibi bisobanuye ko Depite Nyirasafari na Mureshyankwano bakomoka mu ishyaka FPR-Inkotanyi, hazarebwa abakurikiyeho kuri lisiti batoreweho bakarangiza manda yabo yaburaga imyaka ibiri.

Minisitiri Nyirasafari ni muntu ki?

Nyirasafari Esperance yavutse kuwa 13 Nyakanga 1972. Ni umubyeyi w’abana bane wubatse. Afite impamyabumenyi y’icyiciro cya Kabiri cya Kaminuza mu mategeko yakuye mu yahoze ari Kaminuza Nkuru y’u Rwanda, UNR, kuri ubu arimo kwiga icyiciro cya gatatu cya Kaminuza (Masters) muri Kaminuza y’u Rwanda mu bijyanye n’ubutabera mpuzamahanga mpanabyaha n’amategeko y’uburenganzira bwa muntu.

Imirimo yakoze

Yakoze mu mashyirahamwe aharanira uburenganzira bw’abagore, [Profemme na Haguruka], aba umushinjacyaha wa Repubulika mu yahoze ari Gitarama, Umunyamabanga Uhoraho muri Minisiteri y’Ubutabera aho yavuye atorerwa kuba umudepite muri 2013.

Nyirasafari yari amazemo imyaka itatu mu Nteko Ishinga Amategeko, yabarizwaga muri Komisiyo ya Politiki, Uburinganire, ubwuzuzanye bw’abagabo n’abagore mu iterambere ry’Igihugu. Imirimo ye yayifatanyaga no kunganira abantu mu mategeko.

Depite Nyirasafari Esperance

Guverineri Mureshyankwano we ni muntu ki?

Mureshyankwano Marie Rose yavutse kuwa 6 Mutarama 1968, afite imyampabumenyi y’icyiciro cya kabiri cya Kaminuza (A0) mu bumenyi rusange (Social Science).

Imirimo y’ingenzi yakoze

Kuva mu 1992-2001 yabaye umwarimu mu mashuri abanza mu Karere ka Rutsiro, yahavuye ajya kuba umwarimu muri Bumba Complex School kugeza muri 2005. Yabaye umwe mu bagize Njyanama y’Akarere ka Rutsiro, aba umuhuzabikorwa w’Inama y’Igihugu y’Abagore muri Rutsiro.

Kuva muri 2005 yari umudepite mu Nteko Ishinga Amategeko, akaba yari na Perezida wa Komisiyo y’Imibereho y’Abaturage mu mutwe w’Abadepite. Kuri ubu ni Guverineri w’Intara y’Amajyepfo yayoborwaga na Munyantwari Alphonse.

Mureshyankwayo yari Perezida wa Komisiyo y’Imibereho y’Abaturage mu mutwe w’Abadepite

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved