Depite Mukabalisa yasabye urubyiruko kwirinda ibyonnyi bibangamiye amahoro

Yanditswe na Ishimwe Israel
Kuya 21 Nzeri 2016 saa 01:15
Yasuwe :
0 0

Perezida w’Inteko Ishinga Amategeko,umutwe w’Abadepite, Mukabalisa Donathile yasabye urubyiruko gukomera ku mahoro, kuko Abanyarwanda bayabonye nyuma y’igihe kinini bayifuza ndetse bamwe batanga ubuzima bwabo, ari nabyo bituma igihugu gitera imbere.

Mukabalisa yabitangarije mu Nteko Ishinga Amategeko kuri uyu wa Gatatu, tariki ya 21 Nzeri 2016 mu biganiro bijyanye n’umunsi mpuzamahanga wahariwe amahoro, bihuje abayobozi batandukanye n’urubyiruko.

U Rwanda rwabonye amahoro nyuma y’igihe kirekire rwigobotoye abategetsi bayoboye muri Repubulika ya mbere n’iya kabiri, baranzwe n’imitegekere itagamije guharanira amahoro, aho bigishaga urubyiruko urwango ndetse rwaje kwishora muri Jenoside yakorewe Abatutsi mu 1994, yaguyemo abasaga miliyoni.

Nyuma y’aho ariko ngo Abanyarwanda bakunda igihugu batangiye urugamba rwo guharanira amahoro, rwasojwe cyongeye kuyabona ariyo mpamvu buri wese asabwa kuyakomeraho kubera ko basogongeye ku mbuto zayo nkuko Depite Mukabalisa yabitangaje.

Ati " Abanyarwanda dufite ubuhamya bwihariye mu kumenya agaciro k’amahoro [...] twubatse u Rwanda rutekanye kugeza ubwo n’abanyamahanga baza kutwigiraho, ndetse tugera n’aho tujya kuyaharanira mu mahanga."

Yasabye urubyiruko gukomera kuri ayo mahoro bakesha ubuyobozi bwiza burangajwe imbere na Perezida wa Repubulika, Paul Kagame wayaharaniye, abicishije mu kuyobora urugamba rwo kubohoza igihugu.

Depite Mukabalisa yasabye urubyiruko gukomera ku byagezweho, ndetse no kwishimira ko bavukiye mu gihugu gitekanye.

Urubyiruko yarusabye kwirinda ibyonnyi by’amahoro birimo ababyeyi usanga bacengeza mu bana babo inyigisho zirimo ingengabiterezo ya Jenoside n’ibitekerezo bigamije kuyipfobya.

Yakomeje atangaza ko hari abakigerageza kurushora mu bikorwa by’ubuhezanguni n’imitwe y’iterabwoba, ndetse no mu bucuruzi bw’abantu, aho rujyanwa mu bikorwa by’urukozasoni n’ibindi bitabereye ikiremwamuntu.

Ati "Nimuba bazima kuko aricyo duhora duharanira, muzubaka igihugu cyanyu n’ababakomokaho basange ari igihugu cyiza kibabereye."

Minisitiri muri Perezidansi Tugireyezu Venantie yavuze ko iterambere u Rwanda rugezeho uyu munsi rikomoka ku mahoro yagezweho n’Abanyarwanda bayavanye kure.

Yasabye urwo rubyiruko gukomeza guharanira amahoro nk’ababyeyi b’ahazaza h’igihugu n’imbaraga z’uyu munsi n’ejo.

Minisitiri Tugireyezu yabwiye urubyiruko ko bagomba gukosora amakosa yakozwe na bagenzi babo bishoye muri Jenoside yakorewe Abatutsi ndetse no kwirinda kugwa muri uwo mutego.

Mahoro Eric, umwe mu bashinze Umuryango Never Again Rwanda, yavuze ko urubyiruko rwakangukiye guharanira amahoro kimwe n’abandi Banyarwanda muri rusange, ariko ko hakiri intambwe yo gutera, kuko u Rwanda ari igihugu kivuye muri Jenoside, kirimo abaturage bagifite ibikomere yabateye.

Amafoto: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244