Kwamamaza

Depite Gahondogo yagaragaje impungenge atewe n’abakobwa bishyingira

Yanditswe kuya 16-10-2016 saa 11:08' na Prudence Kwizera


Depite Athanasie Gahondogo avuga ko atewe impungenge n’ubuzima bw’abana b’abakobwa baterwa inda, ndetse n’abishyingira bityo agasaba ababyeyi n’ubuyobozi kugira ubufatanya mu guhangana n’icyo kibazo kigacika burundu.

Yabigarutseho kuwa 15 Ukwakira 2016, ubwo yifatanyaga n’abaturage bo mu Murenge wa Kibirizi, mu Karere ka Gisagara kwizihiza Umunsi Mpuzamahanga wahariwe umugore wo mu cyaro.

Muri uyu murenge imiryango 69 yabanaga itarasezeranye yarashingiranwe imbere y’amategeko.

Mu ijambo yagejeje ku baturage, Depite Gahondogo, yagarutse ku kibazo cy’inda zitateguwe ziterwa abana b’abakobwa ndetse n’abandi bakomeza kwishyingira.

Yagize ati “Umwana w’umukobwa iyo atwaye inda imburagihe ishuri ararireka kandi na wa mwana nta buryo afite bwo kumurera, araza akamuterera nyirakuru nawe udashoboye.”

“Nishimiye ko imiryango yabanaga mu buryo budakurikije amategeko yasezeranye, ariko nabonye abasezeranye bakiri urubyiruko, bariya bose babyirutse nyuma y’uko dutoye Itegeko Nshinga muri 2003, kandi twirirwa tubyigisha, kuki bakomeza kubana badasezeranye?”

Yashimiye ko umugoroba w’ababyeyi wagize uruhare runini mu gutuma imiryango ibana mu buryo budakurikije amategeko isezerana, asaba ko bashyira ingufu no mu gukumira abana b’abakobwa bishyingira.

Ati “Umugoroba w’ababyeyi wagize uruhare mu kubashishikariza gusezerana, ndagira ngo noneho nsabe umugoroba w’ababyeyi ko wajya ubashishikariza gusezerana mbere yo kubana, nibwo tuzaba turi muri wa murongo mwiza wo gukurikiza gahunda z’ubuyobozi bwiza.”

Abana bagwingiye benshi ni abakomoka ku nda zitateguwe

Depite Gahondogo yavuze ko aho abagize Inteko Ishinga Amategeko bagiye basura basanze abana benshi bagwingiye ari abakomoka ku nda zitateguwe ziterwa abana b’abakobwa.

Yatanze urugero rwo mu Murenge wa Gishubi nawo wo mu Karere ka Gisagara, avuga ko yasanze abana bavutse muri ubwo buryo barerwa na ba Nyirakuru.

Ati “Nigeze kuba ndi mu Murenge wa Gishubi, dukora igikoni cy’Umudugudu, hanyuma dukora n’umugoroba w’ababyeyi tuza gusanga abana benshi bafite ikibazo cy’imirire mibi bafitwe n’abakecuru batakibyara, hanyuma bangaragariza ko abo bana babyawe n’abakobwa babo barangiza bakababasigira”.

Ubuyobozi bw’umurenge wa Kibirizi, butangaza ko kugeza ubu hamaze kubarurwa imiryango 175 ibana itarasezeranye, kandi ibarura rigikomeza ngo yose imenyekane, hashakwe n’uburyo bwo kubigisha ibyiza byo kubana mu buryo bwemewe n’amategeko.

Umunyamabanga Nshingwabikorwa w’Umurenge wa Kibirizi, Jack Rushemesha Kabogora, yabwiye IGIHE ko nyuma y’umuganda rusange usoza ukwezi Ukwakira hari imiryango igera kuri 78 izasezerana kandi ari igikorwa kizakomeza na nyuma y’iyo taliki higishwa n’abandi kugira ngo nabo basezerane.

Ubuyobozi bw’Akarere ka Gisagara butangaza ko hari gukorwa ibarura rusange ngo hamenyekane imiryango yose ibana itarasezeranye, kugira ngo yigishwe ndetse ifashwe no gusezerana.

Uyu mwaka wa 2016, insanganyamatsiko y’Umunsi Mpuzamahanga w’Umugore wo mu Cyaro, iragira iti “Twubake Umuryango ubereye Umwana”.

Depite Gahondogo yagaragaje impungenge atewe n’abakobwa byishyingira n’abaterwa inda zitateguwe
Imiryango yabanaga mu buryo bunyuranije n'amategeko yasezeranye
Umunyamabanga Nshingwabikorwa w’Umurenge wa Kibirizi, Jack Rushemesha Kabogora asezeranya imiryango yabanaga itarasezeranye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved