COVID-19: Uburyo ’House parties’ zasimbuye utubari n’utubyiniro zigatuma amazi arenga inkombe

Yanditswe na Uwimana Abraham
Kuya 29 Mutarama 2021 saa 11:09
Yasuwe :
0 0

Hashize amezi 11 utubari n’utubyiniro bitemerewe gukora mu Rwanda. Ariko se koko ntibikora? Yego rwose ntibikora kuko biba bifunze ariko ku rundi ruhande birakora kandi bigakora cyane mu isura nshya, ku buryo uwibwira ko gukora kwabyo bigaragarira mu kuba ingufuri z’inzugi zifunguye yaba yibeshye.

-  Hahimbwe amayeri atuma abatari bacye barya “show” nubwo bitemewe.
-  Muri House Parties haberamo amahano, amashuka niyo mutangabuhamya!
-  Hari abanywa ibinini bita ko bituma umubiri wabo ugira ubudahangarwa kuri Covid-19.
-  Baba basangirira ku icupa rimwe, abandi basomana n’ibindi...

Ejo bundi hari umusore wahagurutse iwe yahanye gahunda na mugenzi we ko baza guhura bagasangira. Yari yatse uruhushya polisi, ayimenyesha ko ashaka kujya guhaha. Yararomboreje mu minota mike aba ageze kuri mugenzi we hariya Kicukiro, yitwaje n’icupa rya ka manyinya ryo kwica ya ndwara ikunze kuzonga abatari bacye, imwe bita “icyaka”, agapfukamunwa agasiga aho mu modoka, ubundi umuheha utangira kunyarira iryinyo.

Mu minota mike, urugo rwari rwuzuye abandi basore n’inkumi nabo bafite gahunda yo kujya guhaha, barema isoko ritabaho muri urwo rugo rwo hafi ya Ziniya. Bica akanyota, bashikura inyama, batumura imyotsi barangije buri wese na mugenzi we basangira icyumba, ibyakurikiyeho muzabibaze amashuka.

Umwaka ushize mbere y’uko Kigali ishyirwa muri Guma mu Rugo, abasore n’inkumi barabyinnye karahava. Hari umwe waduhaye ubuhamya bw’uburyo mu minsi mikuru yitabiriye ibirori by’inshuti ze ijoro ryose agataha ahagana saa munani z’ijoro ‘yafiningije’ agatama.

Ati “Kandi iwanjye nabwo hari haraye habaye ikirori.”

Ku Bunani, mu Mujyi wa Kigali uwavuga ko ubuzima bwari ubusanzwe ku rubyiruko rwinshi ntiyaba abeshye. IGIHE ifite ingero za benshi mu basore n’inkumi bahuriye mu mihuro, mu birori bikesha ijoro ryose bari kunywa, basinze, bamwe bagira ibyago batashye polisi irabacakira ibaraza mu kigo ngororamuco cyagenewe abakerensa amabwiriza yo kurwanya Coronavirus giherereye muri stade.

Nta kwita kuri Coronavirus, ni indwara y’igihuha kuri benshi itica umusore n’inkumi bakora siporo, bafite Vitamin C ihagije mu mubiri. Hari n’abasore n’inkumi basigaye barayobotse ibinini byitwa Supra Vit by’amagarama 100 binyobwa bishyizwe mu mazi aho ngo “byongera ubwirinzi bw’umubiri ku buryo bikurinda indwara, ntiwakwandura COVID-19”. Muri macye amakuru y’ibinyoma ari hanze aha asigaye ari nyamunsi, kandi disi abayafata nk’ukuri ntibagira ingano!

Umukobwa umwe waganiriye na IGIHE, yaduhaye ubuhamya bwa House Party imwe yitabiriye mu mpera z’umwaka ushize. Ati “Byari byiza pe, twararyohewe”.

Yakomeje agira ati “House Party ziraba n’uyu munsi, upfa kubwira polisi ko ugiye guhaha gusa, ubundi mugahurira ku nshuti ifite nk’inzu, mukajya ahantu mu cyumba ku buryo umiziki utari busohoke. Abantu barabyina, banywa inzoga, shisha, na e-cigarette nyuma igikurikiraho ni ugusangira icyumba. Hari n’abahamara umunsi urenze umwe.”

Uyu muco wo gukora ’house parties’ wayobotswe cyane kuva kuri "Guma mu rugo" ya mbere muri Werurwe 2020, kuko benshi bari basanzwe bamenyereye kujya gusangira no kurira ibirori mu tubari, irya nyuma bakarifatira mu tubyiniro [night club/boîte de nuit] bari bakomwe mu nkokora.

Abo bananiwe kwihangana ngo bubahirize amabwiriza, bimurira utubari n’utubyinuro mu ngo za bagenzi babo, ubundi bakahahurira ari benshi bavuye imihanda yose kandi batubahirije amabwiriza yo kwirinda COVID-19, hari na benshi bagiye batabwa muri yombi n’inzego z’umutekano bafashwe bibereye muri “House parties” barenze ku mabwiriza.

Ubwiyongere bwa COVID-19 buri mu rubyiruko buteye inkeke

Nta kabuza ko imibare y’ubwiyongere bwa COVID-19 iri kugaragara muri iki gihe iri kuva mu rubyiruko rwirengagije nkana amabwiriza yashyizweho yo kwirinda ikwirakwira ry’iki cyorezo.

Kugeza ku wa 28 Mutarama 2021, umubare munini w’abanduye icyorezo cya Coronavirus mu Rwanda ni urubyiruko ruri hagati y’imyaka 20 na 29 aho bangana na 3942 cyo kimwe n’abafite hagati y’imyaka 30 na 39 bangana na 3885.

Ni abantu ubusanzwe bagakwiriye kuba bumva amabwiriza mu buryo bworoshye, kuko batojwe kumvira, bari mu mashuri abandi bayavuyemo vuba ku buryo ingamba nk’izi bazizingatiya nk’abafata mu mutwe mara.

Umukobwa waganiriye na IGIHE yavuze ko ubwo yajyaga muri house party, abo bari kumwe usibye abasore n’inkumi bakiri bato, hari n’abashakanye bakiri bato. Ati “Ni abantu bari hejuru y’imyaka 28 abenshi, hari n’abo twahuriyeyo bamaze iminsi mike bashyingiranywe, ni ba bantu uba usanga birekura.”

Ubusanzwe gusangirira ku icupa rimwe ni umuco umaze gucika mu Rwanda, twari tuwumenyereye iyo mu cyaro mu dusaka, ha handi abantu bahererekanyaga agacuma k’urwagwa cyangwa uruho rw’ikigage n’ibivuzo. Kandi ubwo abo ni ba bahinzi babaga bari kwica icyaka bacyuye umubyizi.

Ubu abasore n’inkumi babyadukanye mu bundi buryo, muri house party nibyo biberamo, barishima bikarangira bageze n’aho basangirira ku icupa rimwe.

Umutangabumya twaganiriye yavuze ko bigoye ko ibi birori bikumirwa keretse hakozwe ikintu cyatuma abasore n’inkumi buri wese adasohoka ngo agire aho atarabukira. Iyi mihuro abayijyamo bemeza ko ariyo yatumye iki cyorezo gikaza umurego ku buryo butari bwitezwe urebye uko ibintu bimeze ubu n’uko byari bimeze mu mezi atatu ashize.

Ati “Niba utanzi, duhuriye ahantu, tumaranye ijoro ryose, ntuzi aho navuye, ntuzi icyo mfite. Mwese muri kurya, muri gusangira ku icupa rimwe, iyo wasinze ntabwo washobora kwigenzura. Ntabwo byashoboka ko bikumirwa keretse ahari bashyizeho amategeko kuri buri rugo, kandi nabyo sinkeka ko byashoboka.”

Minisitiri w’Ubuzima, Dr Daniel Ngamije, aherutse gutangaza ko kuri ubu iki cyorezo kiri no guhitana n’abakiri bato ndetse n’abadasanzwe bafite izindi ndwara.

Ati “Tumaze iminsi tubona abarwayi ba COVID-19 barembye kandi n’imibare y’abitaba Imana yariyongereye cyane, ikibabaje ariko ni uko abo bitaba Imana usanga ari bato kandi nta n’ubundi burwayi basanganywe.”

Ubusanzwe abafatiwe mu birori nk’ibyo barafatwa bakerekwa itangazamakuru, ubundi bagasabwa buri wese kwipimisha ngo harebwe ko nta bwandu bwa COVID-19 afite, ndetse uwateguye ibirori agacibwa amande y’ibihumbi 200 Frw mu gihe buri wese wabyitabiriye acibwa ibihumbi 25 Frw, gusa bashobora gukurikiranwaho n’ibindi byaha bitewe n’ibyo bakoraga.

Kugeza ubu mu Rwanda hari abantu 14,166 bamaze kwandura mu gihe 183 bishwe n’iki cyorezo. Muri aba bose, umubare munini hejuru y’icya kabiri ni abari munsi y’imyaka 40 ari nabo bamaze igihe bahurira muri house parties.

Izi house parties mu gihe zaba zigikomeje, nta kabuza ubwiyongere bw’icyorezo burakomeza kuba bwinshi, bivuze ko igihugu gishobora gukomeza kujya mu bihe bibi by’icuraburindi mu mpande nyinshi; impfu z’abatari bacye, guhomba kw’ibigo by’ubucuruzi, kwiyongera k’ubushomeri n’ubukene, ihungabana ry’umudendezo igihugu gisanzwemo n’ibindi byinshi ariko byashoboka ko bikumirwa. Urubyiruko rurasabwa kuba intangarugero rugahashya iki cyorezo ruharanira no kurengera ubuzima bwarwo.

Ibyari byo byose ibirori ntaho bizajya, ariko iyo amagara yasesekaye, yo ntayorwa. Ushobora kwitabira house party runaka muri iyi weekend, mu byumweru bitatu cyangwa ukwezi tukumva uherekejwe mu nzira igana i Rusororo wazize wa muntu musomanira muri ibyo birori, rya cupa muzahasangirira, bya bintu uzakora wasinze ariko bikarangira utabyibuka neza. Muri macye harahagazwe!

Intambara yo kurwanya Coronavirus iratureba twese, ariko kandi nituyirwana uko bikwiye, nta kabuza, tuzatsinda.

House party zikomeje kuba imwe mu mpamvu zigaragaza kudohoka gukomeye ku ngamba zo kwirinda COVID-19
Umuco wa House party warenze urubyiruko ugera no mu bakuze, hari abafatwa bakerekwa itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .