00:00:00 IGIHE NETWORK KN KINYARWANDA EN ENGLISH FR FRANCAIS

Covid-19: Perezida Kagame yavuze ku barajwe muri Stade n’abageni bavugishije benshi

Yanditswe na Philbert Girinema
Kuya 30 Mata 2021 saa 10:48
Yasuwe :
0 0

Perezida Kagame yagarutse ku myitwarire yakunze kuranga abanyarwanda mu bihe igihugu kirimo byo kurwanya Covid-19, avuga ko uru rugendo rureba inyungu rusange, nta muntu n’umwe uri hejuru y’amategeko.

Umukuru w’Igihugu yabigarutseho ubwo kuri uyu wa Gatanu yayoboraga Inama y’iminsi ibiri ya Komite yaguye ya FPR Inkotanyi yabereye ku cyicaro cy’uyu muryango i Rusororo mu Karere ka Gasabo.

Umukuru w’Igihugu yavuze ko mu bushobozi buke igihugu gifite, cyabashije guhangana na Covid-19 mu buryo bwose, bitari ku rwego rw’akarere ahubwo ku rwego rw’Isi muri rusange.

Muri uru rugendo, hari abantu benshi bagiye bafatwa barenze ku mabwiriza yashyizweho yo kwirinda iki cyorezo no kugikumira. Abo barafatwaga bagashyirwa muri Stade hirya no hino mu gihugu, bagasobanurirwa ingamba zo kwirinda, bagasabwa gupimwa, bagacibwa amande hanyuma bakarekurwa.

Umunsi ku wundi ni ko abantu bahimbaga amayeri atuma bashaka uko baca mu rihumye Polisi y’Igihugu, kugeza n’aho hari abageni bafashwe bagashyirwa muri Stade umukobwa yambaye agatimba bigateza amagambo menshi ku mbuga nkoranyambaga.

Perezida Kagame yavuze ko muri uru rugendo rwo kubahiriza amabwiriza yo kwirinda Covid-19, hari abakoraga ibitari byo.

Ati “Abaraye muri stade, abandi ubanza bararaye muri za gereza, hari n’abandi barusimbutse ku mpamvu zindi zitandukanye hari n’abakoraga ibitari byo bamenya ko abantu baje kubafata bakambara iby’ubukwe byarangiza bikajya kuri za mbuga byacitse ngo mutinyuka gufata n’abageni?”

“Ahubwo ngira ngo ikibazo kibazwa cyagakwiye kuvuga ngo ariko n’abageni burya batinyuka kwica amategeko? Usibye ko hari ibyo nasomaga kuri izo mbuga, baje no kumbwira ko abo bantu byitwa ko bafatiwe mu bukwe, ni abantu bagize batya bari mu bindi bumvise ko abapolisi baje, baranyaruka barihinda bajya gushyiramo imyambaro y’ubukwe ariko muzitegereze neza amafoto iyo myenda nta nubwo iteye ipasi, ntabwo babonye umwanya, babihubujeyo gusa.”

Yavuze ko hari n’abandi barenga ku mabwiriza, bajya gufatwa bagahamagara ambulance bigize abarwayi, ndetse n’abayobozi yise ko “batwangiriza” bakarenga ku nshingano bafite bakajya muri ruswa n’ibindi.

Perezida Kagame yavuze imikorere nk’iyo yatuma ntacyo igihugu kigeraho, atanga urugero nko ku nkingo ko mu gihe hatabayeho gukorera mu mucyo, zishobora nazo kwibwa, abantu bakazihereza bene wabo.

Ati “Erega hari n’ushobora kuzifata akazambutsa umupaka akazigurisha abandi, birashoboka iyo hatari imikorere mizima zizagera hano bazipakire mwumve ngo zambutse umupaka zagurishijwe abantu bangahe bashyize mu mufuka wabo cyangwa kuzibona abafite ubushobozi, abayobozi, abajenerali, abaminisitiri mukirebera bene wanyu akaba aribo muziha rubanda bakagwa iyo baguye. Iyo mikorere yaba ari bwoko ki?”

Yakomeje agira ati “Ibi ni ibintu umuntu akwiye kubibutsa buri munsi kugira ngo ibintu bikorwe ari bizima? Ni inde ufite inshingano zo guhora yibutsa buri wese ariko buri wese yiyicariye ategereje ko baza kumwibutsa, niba batamwibukije ntabwo ari bukore ikintu kizima. Gute, kuki? Iyo tuvuga ngo twese iki gihugu ni icyacu, kuki ineza y’icyo gihugu yagomba kuzuzwa n’abantu bake abandi bakikorera ibyo bashatse bibareba bitareba abanyarwanda muri rusange?”

Inama ya Komite Nyobozi yaguye ya FPR Inkotanyi yaganiriwemo ingingo zitandukanye zirimo aho gahunda ya Manifesto ya FPR y’imyaka irindwi (2017-2024) igeze ishyirwa mu bikorwa n’imiterere y’icyorezo cya Covid-19 mu gihugu n’ingaruka zacyo ku bukungu.

Hatanzwe ibiganiro birimo icya Minisitiri w’Ubuzima, Dr Ngamije Daniel, wagaragaje aho u Rwanda rwavuye, aho rwiteze kwakira izindi nkingo zizafasha igihugu gukingira nibura miliyoni 7,8 by’abaturage, anagaragaza ko muri iki gihe uturere tw’Intara y’Amajyepfo aritwo twibasiwe cyane na Covid-19 nubwo hari ibigaragaza ko n’Akarere ka Karongi katangiye kugira ubwandu bwinshi.

Perezida Kagame akaba na Chairman wa FPR Inkotanyi ari kumwe na Visi Chairman, Bazivamo Christophe n'Umunyamabanga Mukuru wa FPR Inkotanyi, François Ngarambe baririmba indirimbo yubahiriza umuryango
Madamu Jeannette Kagame nawe yari yitabiriye iyi nama
Perezida Kagame yavuze ku barenga ku mabwiriza yo kwirinda Covid-19, ashimangira ko nta muntu uri hejuru y'amategeko ahubwo akwiriye gukurikizwa uko bikwiye
Iyi nama yari yitabiriwe n'abanyamuryango ba FPR barenga 650
Perezida Kagame akaba na Chairman wa FPR Inkotanyi, yasabye abayobozi gushyira inyungu z'abanyarwanda bose imbere y'ibindi
Umukuru w'Igihugu yabwiye abanyarwanda ko bakwiriye kwirinda kumera nk'isenene ziryana kandi ziri buruhukire zose mu isafuriya bakazikaranga
Rwiyemezamirimo mu bijyanye n'ikoranabuhanga ryifashishwa mu kwishyurana, Rugambwa Bobson, washinze Ikigo cyitwa M Vend cyakoze ikoranabuhanga rifasha ibigo by'itumanaho n'amabanki mu kwishyurana binyuze kuri telefoni
Visi Chairman wa FPR Inkotanyi, Bazivamo Christophe, ubwo yatangaga ibitekerezo muri iyi nama
Minisitiri w'Ubuzima, Dr Ngamije Daniel, atanga ikiganiro kijyanye n'intambwe imaze guterwa mu kurwanya Covid-19
Abantu bose bari bitabiriye iyi nama bari bambaye udupfukamunwa nk'uburyo bwo kwirinda ikwirakwira rya Covid-19
Perezida Kagame yasabye abayobozi bari bitabiriye iyi nama guhora batekereza inshingano bafite aho kuzibutswa
Umuyobozi Mukuru w'Urwego rw'Igihugu rushinzwe Iterambere, RDB, Clare Akamanzi ubwo yagarukaga ku ngamba zigamije kuzahura ubukungu bwashegeshwe na Covid-19
Urubyiruko rwari rwitabiriye iyi nama, rwahawe umwanya wo gutanga ibitekerezo
Perezida Kagame yasabye abanyarwanda kwirinda guhora basunikira ibibazo byabo ku banyamahanga, ahubwo bo bakabanza kureba intege nke bagize mu byo banyuzemo
Bapfakurera Robert agaragaza umusanzu w'abikorera mu kuzahura ubukungu bwazahajwe na Covid-19
Umukuru w'Igihugu yasabye urubyiruko kwigira ku biganiro nk'ibi ubundi bagakora amahitamo yabo
Iyi nama yabereye mu cyumba cya Intare Arena i Rusororo
Urubyiruko rwo mu muryango wa FPR Inkotanyi rwari rwitabiriye iyi nama
Minisitiri w'Imari n'Igenamigambi, Dr Uzziel Ndagijimana, agaragaza ibimaze kugerwaho muri manifesto ya FPR Inkotanyi y'imyaka irindwi
Minisitiri w'Ubucuruzi n'Inganda, Beata Habyarimana, agaragaza ibiri gukorwa mu kuzahura ubucuruzi
Minisitiri w'Ikoranabuhanga na Inovasiyo, Ingabire Paula, asobanura ibiri gukorwa mu gukwiza internet mu gihugu hose
Lydia Nzayo uyobora Singita Lodge atanga ubuhamya ku rugendo rwe nk'umukobwa wakuriye mu mahanga ariko akiyemeza kugaruka gukorera mu gihugu cye
Rwiyemezamirimo Twahirwa Dieudonné yagejeje ku bari bitabiriye iyi nama urugendo rwe mu buhinzi bw'urusenda rumaze kumuhesha isoko mu mahanga

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .