Col Rugambwa yibukije abayobozi muri Nyagatare kutagambanira ubutaka bwabaye imbarutso yo kubohora u Rwanda

Yanditswe na Hakizimana Jean Paul
Kuya 3 Ugushyingo 2019 saa 04:03
Yasuwe :
0 0

Umuyobozi w’ingabo mu turere twa Nyagatare, Gatsibo, Kayonza na Rwamagana, Koloneri Rugambwa Albert, yavuze ko umutekano igihugu gifite waturutse ku bitambo by’abanyarwanda bamwe bemeye guhara ubuzima bwabo, asaba abayobozi bo mu nzego z’ibanze kwirinda gukorera ku jisho.

Ibi yabivuze kuri uyu wa Gatandatu tariki 02 Ugushyingo 2019, ubwo yitabiraga inama Mpuzabikorwa y’Akarere ka Nyagatare.Iyi nama ikaba yitabiriwe n’abayobozi banyuranye kuva ku Karere kugera ku mudugudugu, yitabiriwe kandi n’abayobozi bo mu nzego z’umutekano, abadepite n’abasenateri bavuka muri aka Karere.

Mu kiganiro yagejeje ku bitabiriye iyi nama cyavugaga ku mutekano, Col Rugambwa Albert yavuze ko amateka yo kubohora u Rwanda hejuru ya 60% ahera mu Karere ka Nyagatare bityo ko abayobozi bo mu nzego z’ibanze baho badakwiye kugambanira u Rwanda, gukorera ku jisho n’andi manyanga yatuma badakora neza.

Yagize ati“ Abantu mutuye Nyagatare by’umwihariko mufite igahango gikomeye n’uru Rwanda, kubera ko abenshi mu babohoye iki gihugu aha niho babanje gukandagira mbere yo kujya ahandi, turibuka abahungu n’abakobwa bato baryamye mu Akagera n’aha hose niyo mpamvu mufite igihango gikomeye n’uru Rwanda mukwiye kuba muhumeka indangagaciro yo kutagambanira u Rwanda no gukorera neza Abanyarwanda.”

Col Rugambwa yabwiye abayobozi bo mu nzego z’ibanze ko kizira kugambanira u Rwanda, abibutsa ko bakwiye kugira indangagaciro zo gukorera umunyarwanda kandi neza.

Yakomeje agira ati “Dukwiye kuba dufite ubushake tudakorera ku jisho, tudakorera kuri banshime. Umunsi tuzabinoza neza tugakora atari ukugira ngo badushime cyangwa atari uko twashyizweho igitutu, tugakora kubera ko bituvuyemo tuzamenya ko u Rwanda rwakomeye.”

Umuyobozi wa Polisi mu ntara y’iburasirazuba ACP Hatari Emmanuel we yavuze ko Akarere ka Nyagatare ari aka gatatu mu gihugu hose mu kugira ibyaha byinshi nyuma ya Gasabo na Rubavu.

Kimwe mu byaha byiganje muri aka Karere ngo ni ibiyobyabwenge birimo inzoga z’inkorano, urumogi n’ibindi bivugwa ko bituruka mu gihugu cya Uganda.

Yavuze ko abaturage bakwiriye kumva inama bagirwa yo kwirinda ibiyobyabwenge kuko mbere na mbere aribo byangiza.

Ati “ Njye nibaza impamvu ikintu bakita ikiyobyabwenge warangiza ukagifata kandi ubizi neza ko ari ikiyobyabwenge, rero nkuko dusobanutse dufite n’ubuyobozi bwiza dukwiye kubirandura mu muryango nyarwanda ndetse no mu rubyiruko.”

Inama Mpuzabikorwa y’Akarere ka Nyagatare yari ifite insanganyamatsiko igira iti “ Umuturage ku isonga, Umusingi w’Iterambere rirambye.”

Umuyobozi w'Ingabo mu Turere twa Nyagatare, Gatsibo, Kayonza na Rwamagana, Colonel Rugambwa Albert yasabye abayobozi bo mu nzego z'ibanze kwirinda gukorera ku jisho
Abayobozi batandukanye barimo n'abo mu nzego z'umutekano bitabiriye iyi nama Mpuzabikorwa
Umuyobozi wa Polisi mu Ntara y'Iburasirazuba, ACP Hatari Emmanuel, yavuze ko Nyagatare ari iya gatatu mu kugira ibyaha byinshi
Depite Uwamariya Odette n'abandi barimo n'abasenateri bavuka muri aka Karere bitabiriye inama mpuzabikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza