Col Baguma yavuze ku nda nini n’ubugwari byaranze Kayumba Nyamwasa

Yanditswe na Evariste Nsengimana
Kuya 30 Kamena 2019 saa 02:26
Yasuwe :
0 0

Mu gihe cy’urugamba rwo kubohora igihugu na nyuma y’aho, abakoranaga bya hafi na Kayumba Nyamwasa ntibasibaga kubona ibimenyetso byerekanaga ko yari afite ikibazo mu ndangagaciro zamurangaga, kuko ahanini wasangaga aharanira inyungu ze bwite ndetse rimwe na rimwe ngo akanarangwa n’ubugwari.

Col Sam K. Baguma, Umuyobozi w’Ingabo mu Karere ka Gicumbi, Rulindo na Burera yagize igihe kitari gito cyo kwitegereza imikorere ya Kayumba Nyamwasa mu gihe cy’urugamba rwo kwibohora ndetse na nyuma yarwo, amubonamo ingeso yo guharanira inyungu ze bwite ndetse no kutagira indangagaciro zo guharanira ubumwe bw’Abanyarwanda.

Ubwo Col Baguma yagezaga ikiganiro kirebana n’urugamba rwo kwibohora ku rubyiruko rwari ruteraniye mu Karere ka Gicumbi kuri uyu wa 28 Kamena, hari umwe wamubajije impamvu hari bamwe mu bagize uruhare mu kubohora igihugu barangiza bagahitamo inzira yo kurwanya abo bafatanyije.

Col Baguma yavuze ko Kayumba Nyamwasa n’abandi bagize uruhare mu kubohora u Rwanda barangiza bagahitamo inzira yo kururwanya, bashyize imbere inyungu zabo bwite, asobanura ko nta n’indangagaciro z’ubunyarwanda bari bafite.

Yavuze ko Kayumba Nyamwasa n’abandi bari kumwe mu rugamba bamaze kubohora igihugu, yahise ajya kubaka inzu nziza mu gihe bagenzi be yarinze ahunga bamwe bagikodesha.

Ati “Bamwe n’ubu ntibarabona inzu yo kubamo kubera kwitanga, kubera ko ataragira ubushobozi ariko ugasanga we ngira ngo icyo yari afite mu mutwe ni ugufata Kigali ibindi utamubaza.”

Yongeyeho ati “Inyungu bwite zirenga za ndangagaciro z’abanyarwanda, zirenga igihugu, zirenga abanyarwanda. Igihe icyo aricyo cyose uzafata inyungu zawe, ukazishyira imbere y’iz’abanyarwanda, ukazishyira imbere y’iz’igihugu cyawe, ntabwo uzaba ufite za ndangagaciro z’abanyarwanda.”

Col Baguma yavuze Kayumba nta kintu kidasanzwe yakoze mu rugamba rwo kubohora igihugu, bityo ko ubwitange n’indangagaciro nta byari bimurimo.

Yatererenye ingabo yari yohereje kurwanya abacengezi

Col Baguma yavuze ko mu gihe cy’abacengezi, bamaze igihe barwanira i Gitarama mu Ndiza, Kayumba yari umugaba mukuru, naho Baguma ayoboye batayo. Ngo Kayumba yajyaga abasezeranya kubageraho ariko ntabikore.

Ati “Icyo gihe yampamagaye ari muri za Shyorongi, kandi nta rugamba rwari Shyorongi. Yagombaga kuba yaje imbere aho abantu barimo kurwanira ariko kubera ubwoba n’inda nini ye ntabwo yashoboraga kuza.”

Yakomeje agira ati “Yahamagaye ari Shyorongi arangije aravuga ngo umwanzi yagiye Ndiza, mwambuke mugeyo, ndashaka ko mumurasa mu gitondo saa kumi n’imwe mube mwamurashe, saa moya ndaba nahageze.”

Ayo mabwiriza barayakurikije barwanya Abacengenzi bagera aho bashaka kubaganza, batabaje Nyamwasa yanga kubaha ingabo zo kubunganira.

Ati “Icyo gihe nari mfite umutwe nyoboye, turwana n’umwanzi asa n’uturusha imbaraga, dushaka gusubira inyuma akadukurikira, turanamubwira [Nyamwasa] tuti ‘umwanzi ni mwinshi, yanga kudutera ingabo mu bitugu.”

Icyo gihe ngo bakoresheje ubuhanga n’amayeri y’intambara bari basanganywe, ku bw’amahirwe umwanzi baramutsinda.

Baguma akeka ko kuba Kayumba atarabasanze ku rugamba nkuko yari yabibasezeranyije, yabaga ari kwishakira ibikoresho byo kubaka inzu ye.

Ati “Ntekerezaga ko ashobora kuba yari i Kigali arimo gushaka fer à béton n’ibindi byo kwiyubakira. Ntabwo yari afite umutima wo kurwanirira igihugu.”

Iyaba byakundaga akazinjira mu Rwanda
Col Baguma yavuze ko Kayumba adakwiye gutera ubwoba urubyiruko kuko nubwo yifuza gutera u Rwanda atabigeraho, ngo anabigerageje yahura n’akaga.

Kayumba uri mu buhungiro muri Afurika y’Epfo yashinze Ishyaka RNC ritavuga rumwe n’u Rwanda. Riherutse kwihuza n’andi mashyaka atavuga rumwe na Leta y’u Rwanda aba mu buhungiro bakora ihuriro bise ‘P5’.

Iryo huriro ryashinze umutwe w’inyeshyamba ukorera mu Ntara ya Kivu y’Amajyepfo muri Repubulika Iharanira Demokarasi ya Congo , ukaba uyobowe na Kayumba Nyamwasa.

Col Baguma yemeza ko nubwo Kayumba afite inyeshyamba, nta bwoba ateye kuko yibeshye akagera ku butaka bw’u Rwanda yahahurira n’akaga.

Ati “Kayumba ajya avuga ngo hari n’ubwo ashaka kuba yaza guhungabanya igihugu, iyaba byakundaga akazinjira.”

Hashize iminsi imitwe y’inyeshyamba irimo uwa Kayumba igabwaho ibitero n’ingabo za Repubulika iharanira Demokarisi ya Congo ndetse benshi mu barwanyi ba Kayumba barahatikiriye.

Kayumba Nyamwasa yakatiwe n’inkiko z’u Rwanda adahari mu 2011 gufungwa imyaka 24 no kwamburwa impeta za gisirikare, biturutse ku byaha birimo kurema umutwe w’iterabwoba, kubangamira umutekano w’igihugu, kurema amacakubiri no gutoroka igisirikare.

Col Baguma yavuze ko Kayumba Nyamwasa yagaragaje inda nini kuva kera
Urubyiruko rutandukanye rwari rwitabiriye ibiganiro
Abayobozi barimo Guverineri Gatabazi JMV (Iburyo) na Minisitiri w'Urubyiruko Rosemary Mbabazi bari bitabiriye
Urubyiruko rwabajije ibibazo bitandukanye byerekeye urugamba rwo kubohora igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza