Cogebanque yasinye amasezerano y’ubufatanye n’Ikigega cy’ingwate cya FAGACE

Yanditswe na Ishimwe Israel
Kuya 1 Ugushyingo 2018 saa 07:49
Yasuwe :
0 0

Banki y’Ubucuruzi ya Cogebanque yasinye amasezerano n’Ikigega Nyafurika cy’Ingwate mu by’Ubukungu (FAGACE), azafasha mu kubaka uruganda rukora imiti mu Rwanda.

Aya masezerano yashyiriweho umukono i Kigali ku wa 31 Ukwakira 2018.

Azafasha APEX BIOTECH Ltd mu mushinga wo kubaka uruganda rw’imiti mu cyanya cyahariwe inganda i Kigali. Ufite agaciro ka miliyoni $18.

FAGACE yishingira ingwate ho 50%. Ni umushinga wa mbere mu buvuzi cyinjiyemo kuko kuva mu 2016 cyashyigikiye irimo iy’ubukerarugendo.

Umuyobozi Mukuru wa Cogebanque, Cherno Gaye, yavuze ko ibigo bito n’ibiciriritse ari izingiro ry’ubukungu bw’igihugu.

Yagize ati ‘‘Imwe mu mbogamizi ibigo by’umwihariko ibito n’ibiciriritse bifatwa nka moteri y’iterambere bihura nayo mu kubona inguzanyo ni ingwate nziza. Binyuze muri aya masezerano bizabona amafaranga abifasha. Hari imishinga myiza wasangaga ba nyirayo badafite ingwate ihagije. Ubu hazakorwa imishinga yisumbuye kandi bizazamura ubukungu.’’

Umuyobozi Mukuru wa FAGACE, Minafou Fanta Coulibaly Kone, yavuze ko batewe ishema no gushyigikira umushinga uzita ku buvuzi mu Rwanda.

Yagize ati ‘‘Kuva mu 2017 dufite gahunda yo gushyigikira umushinga mwiza wa banki. Kuri twe ni iby’agaciro gushyigikira ukora ku buzima bw’Abanyarwanda. Hari inyungu ifatika yo kugira uruganda rufasha abaturage kubona imiti biboroheye ndetse bihura na gahunda ya Made in Rwanda.’’

APEX BIOTECH Ltd ihuriweho n’abashoramari b’Abanyarwanda n’abo muri Bangladesh ni yo iri kubaka uruganda rukora imiti.

Umuyobozi wayo, Dr Farouq A. yatangaje ko bahisemo u Rwanda kubera imiyoborere myiza no korohereza ishoramari.

Yagize ati “Imiti yacu yiganjemo izafasha kwirinda indwara zandura n’izitandura. Hazibandwa kuri Malaria, Sida, igituntu, Hepatite, umutima, imirire mibi n’ibindi.’’

Icyiciro cya mbere cyo kubaka Uruganda rwa APEX BIOTECH kizasozwa mu ntangiriro za 2019.

Yagize ati ‘‘Turi kubaka laboratwari izajya isuzumirwamo ubuziranenge bw’imiti ivanwa hanze mu kwirinda ikoreshwa ry’iri ku rwego ruciriritse.’’

Uru ruganda ruzagabanya ingano y’imiti u Rwanda rukura hanze (ingana na 98%), guhaza isoko rya EAC no guhanga imirimo mishya.

Ni urwa kabiri inyuma y’urw’Abanya-Maroc rwa Cooper Pharma.

Mu 2015/2016, u Rwanda rwakoresheje miliyari 74.2 Frw rugura imiti hanze.

Imikoranire hagati ya Cogebanque ikorera mu Rwanda kuva mu 1999 na FAGACE izagera ku yindi mishinga iri mu nyigo. Iki kigega cyavukiye mu Rwanda mu 1977, gikorana n’ibihugu 14.

Umuyobozi Mukuru wa Cogebanque, Cherno Gaye n’uwa FAGACE, Minafou Fanta Coulibaly Kone, bashyira umukono ku masezerano
Abayobozi bombi bari bafite akanyamuneza nyuma yo gushyira umukono ku masezerano y'ubufatanye mu kubaka uruganda rukora imiti
Abayobozi bombi mu kiganiro n'itangazamakuru
Aya masezerano yashyiriweho umukono ku Cyicaro cya Cogebanque mu Mujyi wa Kigali
Nyuma yo gushyira umukono ku masezerano hafashwe ifoto y'urwibutso
Umuyobozi Mukuru wa Cogebanque, Cherno Gaye, yavuze ko ibigo bito n’ibiciriritse ari moteri y’ubukungu bw’igihugu
Umuyobozi ushinzwe Iyamamazabikorwa muri Cogebanque, Iyamuremye Antoine, ni we wari umuhuza w'amagambo
Umukozi muri ishami rishinzwe iyamamazabikorwa bya Cogebanque, Mukabanana Théonestine (iburyo) mu bitabiriye isinywa ry'amasezerano
Umuyobozi wa APEX BIOTECH, Dr Farouq A. yatangaje ko bahisemo u Rwanda kubera imiyoborere myiza no korohereza ishoramari
Umuyobozi ushinzwe ibikorwa na serivisi muri Cogebanque, Mujyambere Louis De Monfort
Umuyobozi wa Fagace mu Rwanda, Kountangni Alphonse aganira n'itangazamakuru

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza