CNLG yasabye ko igifungo cya burundu Rukeratabaro yakatiwe kigumaho

Yanditswe na Evariste Nsengimana
Kuya 11 Nzeri 2018 saa 09:36
Yasuwe :
0 0

Ubujurire bwa Theodore Rukeratabaro, ukurikiranweho ibyaha bya Jenoside yakorewe Abatutsi bwatangiye kuburanishwa kuri uyu wa Mbere mu rukiko rw’ubujurire rwa Svea i Stockholm muri Suède.

Rukeratabaro wamenyekanye ku izina rya Tabaro muri Kamena 2018 yakatiwe gufungwa ubuzima bwe bwose nyuma yo guhamwa n’ibyaha bya Jenoside. Gusa ntiharamenyekana igihe kumva ubujurire bwe bizamara.

Umwe mu barokotse Jenoside yakorewe Abatutsi mu 1994 mu Murenge wa Winteko mu Karere ka Rusizi yabwiye The New Times ko icyifuzo kimwe bafite ari uko igifungo cya burundu yakatiwe mbere kigumaho.

Rukeratabaro w’imyaka 50, ngo ni we wateguye ndetse ashyira mu bikorwa Jenoside mu murenge ubu uzwi nka Winteko muri Rusizi. Akurikiranyweho ibyaha bya Jenoside n’ibyaha byibasiye inyokomuntu, byose yakoze muri Jenoside yakorewe Abatutsi mu 1994.

Egide Mutabazi w’imyaka 42, ngo azi neza Rukeratabaro kuko bakinnye kera ari abana ndetse banigaga ku kigo kimwe. Avuga ko igifungo cya burundu kigumyeho aribwo ubutabera bwaba bukoze akazi neza.

Ati “Nk’umuntu warokotse muri Winteko, icyifuzo cyanjye ni uko igihano Rukeratabaro yari yahawe mbere cyagumaho.”

Rukeratabaro yahungiye muri Suède mu 1998, ahabwa ubwenegihugu mu 2006 ahinduye amazina, yitwa Tabaro kugira ngo ahunge ubutabera.

Mu 1994 Rukeratabaro yari umu-gendarme wanagize uruhare rukomeye muri Jenoside mu Murenge yavukagamo wa Winteko, Nyakanyinya na Mibirizi aho Abatutsi benshi bari bahungiye.

Muri Kamena ubwo urukiko rwamukatiraga gufungwa ubuzima bwose, Komisiyo y’Igihugu yo Kurwanya Jenoside, CNLG yashimye ubutabera bwa Suède.

Umunyamabanga Nshingwabikorwa wa CNLG, Dr Jean Damascène Bizimana yagize ati “Ubwo Rukeratabaro yahanishwaga igifungo cya burundu ku wa 27 Kamena 2018, CNLG yasohoye itangazo rishimira ubutabera bwa Suède.”

“Rukeratabaro ni umwicanyi ruharwa, wishe Abatutsi mu yahoze ari perefegitura ya Cyangugu, muri Winteko, muri sitade ya Kamarampaka i Nyakanyinya na Mibilizi. Yagenderaga bikomeye ku mahame y’ishyaka CDR n’umuyobozi waryo Martin Bucyana.”

Dr Bizimana ashima Suède kuba yubahiriza amasezerano yo mu 1948 yo gukumira, no guhana icyaha cya Jenoside, yatowe n’Inama Rusange ya Loni ku wa 9 Ukuboza 1948. Yatangiye gushyirwa mu bikorwa ku wa 12 Mutarama 1951.

Dr Bizimana yunzemo ati “Ayo masezerano avuga ko buri gihugu gifite inshingano zo kujyana imbere y’ubutabera umuntu wese ukoze Jenoside aho ariho hose. Ubu ni uburyo bwiza bwo kurwanya umuco wo kudahana no kwerekana ko Jenoside ari icyaha mpuzamahanga.”

Impapuro zo guta muri yombi Rukeratabaro zoherejwe muri Suède ku wa 12 Nzeri 2014. Rukeratabaro yahoze atuye mu mujyi wa Örebro muri Suwede.

Mbere y’uko aburana mu mizi mu rukiko rwa Stockholm, muri Nzeri umwaka ushize abacamanza babanje kuza mu Rwanda gukusanya ibimenyetso.

Uru rubanza ni urwa gatatu Suède iburanishije nyuma ya Stanislas Mbanenande waburanye mu 2014, na Berinkindi Claver waburanishijwe mu 2017 bombi bakatiwe gufungwa burundu nyuma yo guhamwa n’ibyaha bya Jenoside.

Umunyamabanga Nshingwabikorwa wa CNLG, Dr Jean Damascène Bizimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza