Charly & Nina na The Ben batahiye aho mu bihembo bya AFRIMA 2019

Yanditswe na Uwiduhaye Theos
Kuya 24 Ugushyingo 2019 saa 02:40
Yasuwe :
0 0

Charly & Nina na The Ben bari bahagarariye u Rwanda mu bihembo bya All Africa Music Awards[AFRIMA] bitangirwa muri Nigeria ntabwo babashije kwitwara neza mu byiciro bari barimo.

Itangwa ry’ibi bihembo ryabaye ku mugoroba wo kuri uyu wa Gatandatu tariki 23 Ugushyingo 2019 ahitwa Eko Convention Centre i Lagos muri Nigeria.

Abatsindiye ibihembo batangajwe mu byiciro 36 bari barimo baturutse mu bice bitandukanye mu bihugu byose bya Afurika.

Ibi bihembo byatangwaga ku nshuro ya Gatandatu, Charly na Nina bahatanaga mu cyiciro cya Best African Duo, Group cyangwa Band.

Bari bahatanye na B2C Kampala Boyz na Kika Troupe bo muri Uganda, Dream Boyz na Nelson Freitas bo muri Angola, Jano Band yo muri Ethiopie, Mi Casa yo muri Afurika y’Epfo na Toofan yo muri Togo.

Bari bahanganye kandi n’abahanzi bo muri Tanzania bo muri WCB Wasafi barimo Diamond Platnumz & Mbosso & Lavalava mu ndirimbo yabo bise Jibebe ndetse na Sauti Sol yo muri Kenya mu ndirimbo bise ‘Extravaganza’ bahuriyemo Bensoul, Nviiri the Storyteller, Crystal Asige na Kaskazin akaba ari nabo begukanye igihembo muri iki cyiciro.

Charly & Nina indirimbo yabo yahatanaga ni iyitwa ‘Komeza Unyirebere’ ndetse bari bari mu Nigeria banitabiriye itangwa ry’ibi bihembo.

Charly ari mu bashyikirije abahanzi ibihembo aho yatanze icya Best Female n’icya Best Male Inspirational Artist.

The Ben yari ahatanye mu cyiciro cya African Fans’ Favourite ahanganye na Davido wo muri Nigeria, Ferre Gol na GIMS & Maluma bo muri RDC, Kuami Eugene wa Ghana, Magasco wa Cameroon, Skiibii na Reekado Banks bo muri Nigeria n’abahanzi bo muri Wasafi barimo Diamond Platnumz, Mbosso na Lavalava mu ndirimbo bise ‘Jibebe’ igihembo cyegukanywe na Mohamed Ramadan wo mu Misiri mu ndirimbo ye yise ‘Mafia’.

The Ben indirimbo ye yari ihatanye niyo yise ‘Fine Girl’ yakoreye muri Nigeria, igakorwa na Krizbeatz ukomeye mu batunganya indirimbo muri iki gihe.

Mu bindi byiciro abahanzi nka 2 Face Idibia wo muri Nigeria na Awilo Longomba bahawe ibihembo bahabwa icyubahiro nk’abahanzi b’abanyabigwi mu muziki wa Afurika.

Umuhanzikazi Neza Patricia Masozera[Neza] ni we Munyarwanda wenyine wabashije gushyirwa muri ibi bihembo bya AFRIMA akanatsinda, ubwo mu 2017 yatwaraga igihembo cy’umuhanzi ugaragaza icyizere muri Afurika.

Reba urutonde rwuzuye rw’abegukanye ibi bihembo hano

Abahanzikazi Charly na Nina bari bari kumwe na Orezi(uri iburyo) banakoranye indirimbo bise Lazizi
Charly & Nina na Dj Pius wabaherekeje ubwo batambukaga ku itapi itukura
Charly na Nina bitabiriye itangwa ry'ibihembo bya AFRIMA 2019
Charly na Nina ntabwo babashije kwegukana igihembo muri Afrima 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza