“Car Free day”, umunsi wa siporo umaze kwigarurira imitima y’abanya- Kigali (Amafoto)

Yanditswe na Uwishyaka Jean Louis
Kuya 2 Ukwakira 2016 saa 01:07
Yasuwe :
0 0

Umunsi ngarukakwezi wahariwe siporo rusange ku baturage b’Umujyi wa Kigali “Car Free Day”, wongeye kuba kuri iki Cyumweru tariki 2 Ukwakira 2016, aho abawitabira bahamya ko uretse kuba ubafasha kugira ubuzima bwiza birinda indwara zitandukanye, unababera umuyoboro w’ubusabane no kunguka inshuti.

“Car Free day” yabaye bwa mbere mu Rwanda tariki 29 Gicurasi 2016 ariko ku batuye Umujyi wa Kigali ngo ni umunsi waziye igihe kuko ubafasha kwirinda indwara zitandura zisigaye zibasiye abantu ku bwinshi.

Mujawamariya Seraphine, umubyeyi wari ufite ikibazo cy’umubyibuho ukabije, yabwiye IGIHE ko kuva uyu munsi watangira muri Gicurasi atarasiba kuwitabira kandi ko hari byinshi amaze kuwungukiramo ndetse byamufashije gukunda siporo bitandukanye na mbere.

Ati “Ndashimira abantu, abayobozi batekereje uyu munsi, turisanzura tugakora siporo. Ni umunsi mwiza ku giti cyanjye, waramfashije kuko ngira ikibazo cy’umubyibuho ariko kuva natangira kuza muri iyi siporo uragabanuka. Si ku buzima bwiza gusa idufasha kuko turaza tugasabana n’abantu bose tukaba inshuti.”

Umuyobozi wungirije w’Umujyi wa Kigali ushinzwe ubukungu, Busabizwa Parfait, yatangaje ko uyu munsi (Car Free day) uri gutanga umusaruro wari utegerejweho ujya gutangira kuko abaturage bawishimiye cyane kandi bakaba bakomeza kugenda biyongera uko iki gikorwa kibaye.

Ati “Uyu munsi washyizweho kugira ngo ufashe abaturage gukora siporo kandi baragenda barushaho kwiyongera uko wongeye kuba. Abenshi baje uba usanga bashaka gutaha bamaze no kwipimisha indwara zitandura, ibi bikaba byari biri mu ntego tuwutekereza.”

Car Free Day y’uyu munsi yitabiriwe n’abasaga igihumbi baturutse mu bice bitandukanye by’umujyi wa Kigali bagiye biruka n’amaguru buhoro buhoro abandi bari ku magare, bose bahurira ku kibuga cyo mu mbuga y’Ikigo cy’Igihugu cy’Imisoro n’amahoro (RRA) aho bakoze imyitozo ngororamubiri itandukanye.

Nyuma ya siporo ababishaka bapimwaga ku buntu indwara zitandura zirimo nk’umutima, umuvuduko w’amaraso, umubyibuho ukabije n’izindi.

Abitabiriye iyi siporo bavuga ko imaze kubafasha byinshi ku buzima bwabo
Iyi siporo yitabirwa n'ingeri zinyuranye z'abatuye Umujyi wa Kigali
Nelson Mukasa afasha abitabiriye siporo rusange gukora imyitozo ngororamubiri inyuranye
Umurongo w'abashaka kwipimisha indwara zitandura uba ari muremure bashaka kumenya uko bahagaze
Abitabiriye iyi siporo babishaka banapimwa indwara zitandura ku buntu
Busabizwa Parfait ahamya ko intego bari bafite bajya gutekereza iki gikorwa zigenda zigerwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza