Canada: Umunyarwandakazi mu begukanye ibihembo bya Ambasaderi w’Umwaka

Yanditswe na Mukaneza M.Ange
Kuya 14 Werurwe 2019 saa 01:48
Yasuwe :
0 0

Umuyobozi ushinzwe ibikorwa bya Ambasade y’u Rwanda muri Canada, Umutoni K.Shakilla, ni umwe mu bahawe ibihembo bya ambasaderi w’umwaka wa 2019 muri iki gihugu.

Ibi bihembo byiswe ‘Ambassador of the Year Awards’, byatangiwe mu birori byabereye muri Kaminuza ya Ottawa muri Canada. Ni ku nshuro ya kabiri bitanzwe.

Ibi bihembo bihabwa ba ambasaderi n’abakozi muri ambasade bagaragaje ibikorwa by’indashyikirwa, bitegurwa n’Umuryango International Public Diplomacy Council, ishami rya Canada ku bufatanye n’Ishami ryigisha amategeko muri Kaminuza ya Ottawa n’Ihuriro rya ba mbasaderi bahagarariye ibihugu byabo muri Canada.

Abambasaderi n’abandi bahagarariye ibihugu byabo muri Canada 11 nibo bahawe ibihembo mu byiciro bitandukanye birimo dipolomasi, ibikorwa birebana n’umuco no guhanga udushya.

Umutoni ni umwe mu bahawe ibi bihembo, aho yashimiwe umuhate mu gukorera u Rwanda no guteza imbere umuryango w’abahagarariye ibihugu byabo muri Canada, by’umwihariko abaturuka mu bihugu bya Afurika.

Umutoni yavuze ko iyo hataza kubamo ubufatanye hagati ye na bagenzi be bakorana muri ambasade ndetse na Perezida Paul Kagame wamugiriye icyizere, atari kubona amahirwe yo gutsindira iki gihembo.

Ati “ Warakoze kumpa amahirwe yo gukorera igihugu cyacu cyiza cyabashije kuva kure kuri ubu kikaba ari icyitegererezo mu iterambere kibikesha ubuyobozi bwawe”.

Yanashimiye kandi umuryango uhuriyemo abahagarariye ibihugu byabo muri Canada, umugabo we, umubyeyi we na murumuna we bagira uruhare mu gutuma abasha kwita ku kazi ke ka buri munsi kandi ntaburire umwanya abana be bane.

Uretse kuba ashinzwe ibikorwa muri ambasade y’u Rwanda muri Canada, Umutoni ni Umubitsi w’Itsinda ry’abahagarariye ibihugu bya Afurika muri Canada, Umwe mu bagize komite y’abagore bahagarariye ibihugu byabo muri Canada, Visi perezida w’Ihuriro ry’abagore bahagarariye ibihugu byabo muri Canada ndetse akaba n’Umunyamabanga w’ihuriro ry’Abaturuka mu Muryango w’Ibihugu bivuga Igifaransa.

Umutoni yashimiye Perezida Kagame wamugiriye icyizere akamuha kuba umwe mu bahagarariye inyungu z'u Rwanda muri Canada
Umunyarwandakazi ni umwe muri 11 bahawe ibihembo bya Ambasaderi w'Umwaka muri Canada

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza