Kwamamaza

Camera zigiye kongerwa ku mihanda inyuranye ya Kigali

Yanditswe kuya 28-08-2016 saa 11:21' na Thamimu Hakizimana


Polisi y’u Rwanda igiye kongera camera ku mihanda itandukanye cyane cyane iyo mu Mujyi wa Kigali, mu rwego rwo kurwanya ibyaha n’impanuka zo mu mihanda.

Ibi polisi yabitangaje kuri uyu wa Gatandatu tariki ya 27 Kanama 2016, mu nama rusange yagiranye n’abatwara abagenzi kuri Moto basaga ibihumbi bine, yabereye i Remera nyuma y’umuganda usoza ukwezi bakoreye i Nyandungu.

Umuvugizi wa Polisi ishami rishinzwe umutekano wo mu Muhanda, CIP Kabanda Emmanuel, yabwiye IGIHE ko iyi nama polisi yagiranye n’abamotari igamije kugabanya amakosa yo mu muhanda n’impfu zikomeje guterwa n’impanuka za hato na hato.

Yagize ati “Iyi nama igamije kugabanya amakosa yo mu muhanda, gukomereka ndetse n’impfu ziterwa n’impanuka zo mu muhanda bimaze igihe bigaragara ko biteye inkeke kuko byanagaragaye ko biterwa no kwica amategeko y’umuhanda kw’abamotari batundukanye.”

Uretse kongera Camera zo ku mihanda, uyu muyobozi anavuga ko polisi yanazanye imodoka zidafite ibirango bya Polisi, zizajya zigendwamo n’abapolisi batambaye imyenda y’akazi mu rwego rwo kugira ngo zigabanye amakosa menshi yo mu muhanda akorwa n’abamotari n’abandi batwara ibinyabiziga, rimwe na rimwe akanateza impanuka.

Camera zigiye kongerwa ku mihanda itandukanye cyane muri Kigali, zizaba ziyongera ku zamaze gushyirwa kuri imwe mu mihanda yo muri uyu mujyi nko hagati y’ahabera inama zikomeye hazwi nka Camp Kigali n’ikigo cy’igihugu gikwirakwiza amaraso, zashyizweho muri Gicurasi uyu mwaka ubwo u Rwanda rwakiraga inama mpuzamahanga yigaga ku bukungu bwa Afurika (World Economic Forum).

Izi kandi ziniyongera ku zindi camera zisanzwe mu mahoteli atandukanye, Minisiteri n’ibigo bya Leta n’ibyigenga ndetse n’izindi ziri hirya no hino ku mihanda zikomeje kwifashishwa mu kubungabunga umutekano nka kimwe u Rwanda rwashyize imbere ndetse runashimirwa n’isi yose.

Ikoreshwa rya Camera ku mihanda ntiritangiye vuba aha mu Rwanda kuko muri Gicurasi 2013, ku mihanda inyuranye hashyizweho Camera kugira ngo zikusanye amakuru polisi yajyaga itabona neza ku bibera mu muhanda cyane mu masaha y’ijoro.

Umusaruro watanzwe n’ikoreshwa rya Camera, wagiye ugaragara cyane, ariko twavuga mu imurikagurisha mpuzamahanga ryabaye ku nshuro ya 17, i Gikondo mu Mpeshyi yo muri 2014, aho abantu 15 bafatiwe mu bikorwa by’ubujura bavumbuwe na Camera zashyizweho na sosiyete ya Dynamic Solutions, byanatumye iyi sosiyete ibihemberwa ubwo iryo murikagurisha ryasozwaga.

Gucunga umutekano hifashishijwe Camera byatangiriye mu Budage mu 1942 hagenzurwa ibijyanye n’izamurwa mu kirere ry’icyogajuru V-2.

Inkuru bifitanye isano: Camera, indi ngabo mu gucunga umutekano muri Kigali

Umuyobozi wa Polisi y'Igihugu, IGP Emmanuel Gasana
Abamotari batandukanye bari bitabiriye ibi biganiro

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved