Kwamamaza

Ibitaro bya Butaro byahawe imashini zifata ibizamini bya kanseri 1500 ku munsi

Yanditswe kuya 28-10-2016 saa 09:34' na Jean Pierre Tuyisenge


Ku bitaro bya Butaro biherereye mu karere ka Burera, hagejejwe imashini zifashishwa mu gupima Kanseri, zifite ubushobozi bwo gufata ibizamini 1500 ku munsi mu gihe iyari ihari yashoboraga gufata ibizamini 150 gusa ku kwezi.

Ni imashini zabonetse ku bufatanye na Sosiyete y’Abanyamerika yita ku ndwara zivurwa hafashwe igice ku mubiri (ASCP), mu karere ka Afurika y’Uburasirazuba ikaba ishyizwe mu Rwanda gusa, ahandi iboneka ni muri Afurika y’Epfo no muri Botswana.

Umuyobozi Mukuru w’ibi bitaro, Dr. Tharcisse Mpunga avuga ko ije yari ikenewe cyane kuko ngo bajyaga bakira abarwayi benshi nyamara Imashini ibapima ikaba nta bushobozi yari ifite.

Yagize ati “Ibi ni ibikoresho bifite umwihariko kuko bigezweho, bikoresha ikoranabuhanga, bifite ubushobozi bwo gukora ibintu byinshi icyarimwe. Byajyaga bigorana gufata inyama ku murwayi ukayipima, ariko ubu imashini izajya ibikora kandi ikore byinshi mu gihe gito.”

Avuga ko izi mashini zigiye gutuma ibitaro bizamura ubushobozi byari bifite bwo gupima Kanseri, kuko ngo izajya ifata ibizamini 1500 ku munsi, bikazanatuma ireme ry’ibikorwa rizarushaho kwiyongera.

Umukozi muri Sosiyete yatanze izo mashini witwa Irmen Werkhoven, yatangarije IGIHE ko batanze izo mashini kugira ngo umubare w’abavurwa urusheho kwiyongera.

Yagize ati “ iyi ni imashini ifite ubushobozi buhagije bwo gupima Kanseri kandi , irabyihutisha, turabona uyu ari umunsi ukomeye ku buvuzi bw’u Rwanda no mu karere muri rusange.”

Ibitaro bya Butaro bisuzuma, bikanavura indwara ya Kanseri, byakira abarwayi baturuka imihanda yose dore ko iyo uhageze uhasanga abaturutse mu bihugu bitandukanye baje kuyivuza.

Umuhoza Juditte, waje kuhivuriza, yavuze ko yashimishijwe no kumva ko haje imashini nshya zizihutisha ibikorwa byo gupima, kuko ngo kubona ibisubizo by’ibizamini byajyaga bitinda.

Ati “ Nageze hano mu kwezi kwa gatanu, bamfashe ibizamini ariko kugira ngo mbone igisubizo byamaze ibyumweru bitatu, ariko wenda wasanga bigiye kwihuta.”

Ibi bitaro byari bifite imashini nto byifashishaga gusuzuma, bikaba byasabaga ko babanza kohereza ibizamini bakoze muri Amerika, bakazategereza igihe kinini, gusa Dr. Mpunga uyobora ibi bitaro, avuga ko izi mashini zizajya zipima umuntu zikamuha igisubizo mu minsi itarenze itatu. Ni imashini zikoresha ikoranabuhanga zikaba zaratwaye ibihumbi 700 by’Amadolari.

Umuyobozi w'Ibitaro bya Butaro, Dr. Tharcisse Mpunga
Umukozi muri Sosiyete yatanze ibyo bikoresho, Ermen Werkhoven
Imashini nshya izajya ipima Kanseri
Imashini nshya izajya ipima Kanseri
Laboratwari yo ku bitaro bya Butaro
Imashini bakoreshaga mu gupima Kanseri
Ibitaro bya Butaro

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved