Busingye yasabye imiryango itari iya leta uruhare mu gukumira ibyaha mu Rwanda

Yanditswe na Evariste Nsengimana
Kuya 4 Ukwakira 2018 saa 03:08
Yasuwe :
0 0

Minisitiri w’Ubutabera akaba n’intumwa nkuru ya Leta, Johnston Busingye, yavuze ko kugira ngo u Rwanda rukumire ibyaha bikwiye ko inzego zose zikorana, ntibifatwe gusa nk’inshingano y’Urwego rw’Igihugu rw’Ubugenzacyaha, RIB.

Yabivuze kuri uyu wa Kane, afungura inama nyunguranabitegerezo yahuje RIB n’abafatanyabikorwa bayo, baganira ku gutanga serivisi zinoze z’ubutabera.

Minisitiri Busingye yavuze ko RIB ifite inshingano zo gukumira, gushakisha no gufata abakora ibyaha ariko itabishobora idafatanije n’izindi nzego zirimo iza leta, izigenga, abaturage n’imiryango itari iya leta.

Uko gukorana ngo niko kuzatuma abaturage bumva banyuzwe no kuba mu Rwanda amanywa n’ijoro, kuko bazaba bafite umutekano uhamye bakesha gukumira icyaha n’ubutabera bunoze.

Busingye yavuze ko Guverinoma y’u Rwanda yashyizeho ingamba zihamye zo gukumira icyaha no kunoza umutekano w’abaturage, ititaye ku kiguzi biyitwara.

Yashimangiye ko ishyize imbere kwihutisha ishoramari, ubukerarugendo, ikoranabuhanga, kurwanya ruswa, kurengera ibidukikije n’ibindi, ariko nta gihugu cyabigeraho kitarwanyije ibyaha.

Yakomeje agira ati “Ndamutse ngize icyo nsaba imiryango itari iya leta, akamaro kayo kagomba kugenda mu murongo umwe n’uw’icyerekezo cy’igihugu maze gusobanura kandi tugakorana kugira ngo tubigereho.”

Umuyobozi Nshingwabikorwa w’Ihuriro ry’ Imiryango Itanga Ubufasha mu by’Amategeko, Kananga Andrews, yavuze ko RIB ari urwego rushya rukeneye gushyigikirwa ngo rwiyubake mu bushobozi rurusheho kunoza akazi ko kurwanya ibyaha.

Ati “Nicyo kibazo gikomeye cyane no kugira ibikoresho bihagije n’abakozi bafite ubumenyi... Dukwiriye kubaha umwanya tukanabashyigikira, kugira ngo igihe gito bamaze babashe kubona ibikenewe, bibafasha gukora akazi neza.”

Umuyobozi mukuru wa RIB, Col. Ruhunga Jeannot, yavuze ko uruhare rw’imiryango itari iya leta n’izindi nzego rukenewe, cyane cyane mu gukumira ibyaha.

Ati “Tudafite ubufasha bw’izindi nzego kugira ngo dukomeza kubirwanya, urumva ko twaba duhangana gusa n’ibyakozwe ariko gukumira ntitubigereho kandi ariyo nshingano nyamukuru.”

RIB ivuga ko ibyaha byifashisha ikoranabuhanga biza ku isonga mu bikeneye gushyirirwaho ingamba zo kubikumira mu Rwanda, kuko bitamenyerewe.

Iyi nama yahuje abafatanyabikorwa ba RIB mu bijyanye n'ubutabera
Minisitiri Busingye yasabye Sosiyete Sivile kugira uruhare mu gukumira ibyaha mu Rwanda
Umushinjacya Mukuru Mutangana Jean (ibumoso) nawe yitabiriye iyi nama
Umuyobozi Mukuru wa Polisi, Emmanuel Gasana (ubanza) na Komiseri Mukuru wa RCS, George Rwigamba muri iyi nama ku gukumira ibyaha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza