Busingye yagaragaje amahitamo rukumbi u Rwanda rufite kuri ruswa ishegesha ubukungu

Yanditswe na Evariste Nsengimana
Kuya 5 Kamena 2018 saa 05:48
Yasuwe :
0 0

Minisitiri w’Ubutabera akaba n’Intumwa Nkuru ya Leta, Johnston Busingye, yavuze ko nta yandi mahitamo u Rwanda rufite ku birebana na ruswa, icyaha gishegesha ubukungu bw’igihugu uretse kuyirwanya kugeza ubwo irangiye burundu cyangwa igacika intege bigaragara.

Yabitangaje kuri uyu wa 4 Kamena 2018, ubwo Polisi y’u Rwanda yatangizaga Icyumweru cyahariwe kurwanya ruswa, mu bikorwa by’Icyumweru cya Polisi 2018.

Minisitiri Busingye yagize ati “Dufite amahitamo amwe gusa ku birebana na ruswa, kuyirwanya n’imbaraga zacu zose tukayirandura burundu cyangwa tukayigeza aho idashobora gukoma mu nkokora iterambere ryacu n’abayishoramo bikabagiraho ingaruka z’intangarugero.”

Yavuze ko umutekano utareberwa gusa mu kuba muke cyangwa nta byaha bikomeye bihari, ahubwo ko n’iyo hari ibyo abantu bita bito, indwara z’ibyorerezo, ubukene, ihohoterwa mu miryango, ruswa n’ibindi, umutekano uba wahungabanye, ashimangira ko mu kuwurinda, Polisi y’u Rwanda ibyitaho byose kandi n’abaturage bakabigiramo uruhare.

Ati “Ni ngombwa ko dushyira imbaraga mu guhindura iyo myumvire, tukihatira gukora akazi kinyamwuga, amategeko akubahirizwa, tuzirikana ko umurongo duhabwa n’ubuyobozi bw’igihugu cyacu ari ukurandura ruswa n’ibindi byaha byose bifitanye isano nayo.”

Imibare y’Urwego rw’Ubugenzacyaha (RIB) yerekana ko kuva muri Mutarama kugera muri Gicurasi 2018 hamaze kwakirwa ibirego 176 kuri ruswa n’ibyaha bifitanye isano nayo. Muri ibyo birego byose hagendeyemo amafaranga 5,746,500Frw n’amadolari ibihumbi umunani.

Umuvunyi Mukuru, Murekezi Anastase, yavuze ko ruswa ari ikimenyetso cy’uko mu gihugu hari imiyoborere mibi, bidahuye n’icyerekezo u Rwanda rufite.

Yagize ati “Ruswa n’akarengane ni ibimenyetso by’imiyoborere mibi, kandi bihabanye na gahunda y’imiyoborere y’igihugu cyacu kuko ishingiye ku myiza [..]Twese dufatanye, duhanahane amakuru y’aho ruswa igaragara, turusheho guteza imbere igihugu cyacu, cyane cyane turushaho kubikangurira urubyiruko.”

Uhereye ibumoso: Umuyobozi Mukuru wa Polisi y’u Rwanda, IGP Emmanuel K. Gasana; Minisitiri w’Ubutabera akaba n’Intumwa Nkuru ya Leta, Johnston Busingye; Umuvunyi Mukuru w’u Rwanda, Murekezi Anastase n’Umushinjacyaha Mukuru, Mutangana Jean Bosco batanze ibiganiro

Umuyobozi Mukuru wa Polisi y’u Rwanda, IGP Emmanuel K. Gasana, yavuze ko u Rwanda rwihaye intego yo kugera ku buyobozi bwiza kandi buzira ruswa.

Yakomeje agira ati “Kurwanya ruswa ntibyagerwaho, ababigizemo uruhare badashyikirijwe inzego z’ubutabera kugira ngo bahanwe, kandi nta rwego rwakora rwonyine hatabayeho kuzuzanya kw’inzego zose, zaba iza Leta, izigenga, imiryango itegamiye kuri Leta n’abikorera ku giti cyabo.”

Yavuze ko mu ngamba zo kurwanya ruswa, Polisi y’u Rwanda yashyizeho ikigo cy’amahugurwa cya Polisi (Ethic Centre), Ishami rya Polisi rishinzwe gukumira no kurwanya ruswa. Mu myaka umunani ishize, hari abapolisi barenga 60 bafatiwe muri ruswa bashyikirijwe ubushinjacyaha, bamwe bakaba baranirukanywe muri Polisi y’u Rwanda.

Inteko Ishinga Amategeko, Umutwe w’Abadepite, iheruka gutora itegeko ryerekeye kurwanya icyaha cya ruswa, cyagizwe icy’ubugome kandi kidasaza, ku buryo uwo kizajya gihama azajya ahanwa mu buryo bw’intangarugero; risimbura iryo mu 2003.

Rigaragaramo ibihano biremereye ku bayobozi n’abacamanza bazagaragarwaho ibyaha bya ruswa, birimo ibyo kwigwizaho imitungo, kunyereza umutungo wa rubanda n’ibindi. Rigaragaza ko umucamanza wese cyangwa umukemurampaka wakiriye cyangwa wasabye indonke, aba akoze icyaha, cyamuhama agahanishwa igifungo kitari munsi y’imyaka 10 ariko kitarenze 12 n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse.

Iryo tegeko risobanura ko ruswa igaragarira mu bikorwa bikurikira: Gusaba, kwakira cyangwa gutanga indonke; gusaba cyangwa gukora ishimishamubiri rishingiye ku gitsina; gufata icyemezo gishingiye ku itonesha, ubucuti, urwango, ikimenyane cyangwa icyenewabo; gukoresha igitinyiro; kudasobanura inkomoko y’umutungo; kunyereza umutungo;gukoresha umutungo wa Leta icyo utagenewe; gukoresha nabi umutungo ufitiye rubanda akamaro;gusonera bitemewe n’amategeko; kwaka cyangwa kwakira amafaranga bidakwiye cyangwa arenze ateganyijwe; gukoresha ububasha uhabwa n’itegeko mu nyungu bwite; kwiha inyungu zinyuranyije n’amategeko.

Ubushakashatsi bw’Umuryango urwanya ruswa n’Akarengane, Transparency International, bugaragaza imiterere ya ruswa mu 2017, bwashyize u Rwanda ku mwanya wa gatatu muri Afurika n’uwa 48 ku Isi mu bihugu birangwamo ruswa nke.

Minisitiri Busingye yagaragaje amahitamo rukumbi u Rwanda rufite kuri ruswa ishegesha ubukungu
Ibi biganiro byitabiriwe n'abantu batandukanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza