Burera: Mu byumweru bibiri mu rugo rumwe hapfuye batatu, hakekwa amarozi

Yanditswe na Uwishyaka Jean Louis
Kuya 1 Ugushyingo 2016 saa 07:56
Yasuwe : XX
0

Mu rugo rw’uwitwa Nkinzehiki Apollinaire ruherereye mu Mudugudu wa Kamonyi, mu Kagari ka Nyanamo, mu Murenge wa Rugengabare ho mu Karere ka Burera, hapfuye abantu batatu barimo abana babiri na nyina aho bikekwa ko barozwe n’umugore baturanye.

Abaturage bo muri aka gace baganiriye na IGIHE, bavuga ko umwana w’umukobwa w’imyaka 17 wo muri urwo rugo ariwe wabanje gupfa akurikirwa na nyina wapfuye ku tariki 23 Ukwakira 2016, nyuma hakurikiraho umuhungu we w’imyaka 19 wapfuye ku wa Gatandatu w’icyumweru gishize tariki ya 29 Ukwakira.

Bavuga ko urupfu rw’aba bantu rwatewe n’uburozi bahawe mu kigage n’umugore baturanye.

Kimwe mu byo abo baturage bashingiraho bemeza ko uwo mugore ari we wabaroze, ngo ni uko n’umugabo we amushinja ko ari we wabikoze.

Umwe yagize ati “ Nyine muzi ko mu cyaro tugira ibintu byo guturana (guhana ibintu), uwo mugore nawe rero ni uko yashyiriye urwo rugo baturanye ikigage yashyizemo uburozi, umugabo we ahita ahinjira ashaka kumubuza kunywaho ariko abura uko abigenza aramureka, ku buryo yaje kuremba nijoro ahita amwijyanira i Gisenyi ku bavuzi ba Kinyarwanda barabumurutsa.”

Yakomeje avuga ko nyuma y’uko uwo mugabo yumvise ko ku muturanyi we hamaze gupfa abantu batatu ngo yahise atangira gushinja umugore we ko ariwe wabahumanyije bitewe n’uko na we yamujyanye ku baganga ba Kinyarwanda kubumurutsa.

Nyuma y’uko abaturage bo muri ako gace bamenyeye ko aba bantu batatu bishwe n’uburozi, ngo barashatse kwihorera ngo bice uwo mugore ariko inzego z’ubuyobozi n’iz’umutekano zihita zihagoboka zirahamukura.

Umunyamabanga Nshingwabikorwa w’Umurenge wa Rugengabare, Nzamukwereka Manasseh, na we yemeje aya makuru.

Yagize ati “ Nibyo Batatu ni bo bamaze gupfa kandi bapfuye bakurikirana ndetse ni ikibazo gikomeye kuko n’abandi bana batatu bo muri urwo rugo twahise tubajyana mu bitaro bya Butaro niho barwariye kuko na bo bararembye cyane.”

Yakomeje avuga ko iperereza ryatangiye gukorwa kugira ngo hamenyekane icyaba cyishe aba bantu ndetse ngo bategereje icyo ibisubizo bya muganga bizatanga kuko hari n’imirambo bahise bajyana ku bitaro bya Butaro ngo isuzumwe.

Umugore bivugwa ko waroze aba banyakwigendera ubu afungiye kuri sitasiyo ya Polisi ya Rusarabuye mu Karere ka Burera.

Gusa amakuru ari kugera ku IGIHE aravuga ko hari n’undi mwana urembye cyane ushobora na we gupfa.

Icyaha cyo kuroga giteganywa mu ngingo ya 144 y’igitabo cy’amategeko ahana ibyaha mu Rwanda, aho isobanura ko kuroga ari uguha umuntu ibintu bishobora kwica bwangu cyangwa bitinze, hatitawe ku byakoreshejwe cyangwa uko byahawe nyir’ukubigirirwa n’inkurikizi zabyo. Kuroga bihanishwa igifungo cya burundu.

Biravuga ko aba bantu barogewe mu kigage bazaniwe n'umuturanyi wabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE