Burera: Minisitiri Kaboneka yasabye abaturage guca ukubiri n’ibiyobyabwenge

Yanditswe na N.Kubwimana Janvière
Kuya 13 Ukwakira 2018 saa 06:30
Yasuwe :
0 0

Abaturage b’Umurenge wa Cyanika mu Karere ka Burera, basabwe kwitandukanye n’ibiyobyabwenge kuko ari byo ntandaro y’amakimbirane mu miryango.

Minisitiri w’Ubutegetsi bw’Igihugu Francis Kaboneka, yabibwiye aba baturage ubwo yabasuraga kuwa 12 Ukwakira 2018, bakamubwira ko mu bibazo bibangamiye iterambere ryabo harimo n’ikoreshwa ry’iboyobyabwenge cyane cyane mu rubyiruko.

Minisitiri Kaboneka yasabye aba baturage guca ukubiri n’ibiyobyabwenge banabirinda abana babo kugira ngo batazakura ari abo mu muhanda.

Ati “Ikoreshwa ry’ibiyobyabwenge ni kimwe mu ntandaro y’amakimbirane agaragara mu miryango n’ubukene, turasaba abaturage guca ukubiri n’ibiyobyabwenge mubirinda n’abana banyu.”

Yakomeje agira ati “Nta mubyeyi washimishwa no kubyarira umuhanda, kuko uwabikoresheje akora amahano atuma ubuzima bwe bwangirika agahora abyicuza ubuzima bwe bwose, dufatanye kugira umuryango uzira ibiyobyabwenge”.

Bamwe mu baturage bo muri uyu murenge uhana imbibi na Uganda, bavuga ko gukoresha ibiyobyabwenge bikurura ubukene, byagera mu rubyiruko ho bikaba akarusho.

Mutuyimana Chantal ati “Muri aka gace haracyarimo bamwe bakoresha bakanacuruza ibiyobyabwenge, usanga ari bo bahorana amakimbirane mu ngo zabo, iyo bigeze mu rubyiruko ho ni agahomamunwa, kuko twamaze kubona ko nta n’iterambere ribamo, natwe twahagurukiye kubirwanya dufatanije n’abayobozi bacu”.

Habineza Fabien yagize ati “Ubundi ibiyobyabwenge ni uburozi butera ubukene, hano niho hanyuraga za kanyanga nyinshi n’ubwo byagabanutse kuko bamwe babifatiwemo barahanwa abandi barabireka”.

Akarere ka Burera gakunze kugaragaramo ibibazo by’ikoreshwa ry’ibiyobyabwenge bikunze kwinjiramo biturutse mu gihugu cy’abaturanyi cya Uganda, aho hakunze gufatirwa ibiyobyabweng e bitandukanye nka ; Kanyanga, Sky, urumogi, Chief Waragi n’ibindi.

Kaboneka yanijeje abaturage ko bazakomeza kugerwaho n’ibindi bikorwa by’amajyambere birimo imihanda, amashanyarazi, amazi, n’ibindi bizakomeza kubafasha kwiteza imbere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza