Burera: Imiryango yasenyewe n’amazi yo mu Birunga yahawe ibikoresho by’asaga miliyoni 23 Frw

Yanditswe na N.Kubwimana Janvière
Kuya 24 Gicurasi 2018 saa 12:51
Yasuwe :
1 0

Imiryango 416 yo mu Karere ka Burera mu Mirenge ya Rugarama na Gahunga yagizweho ingaruka n’imvura idasanzwe, yahawe ibikoresho by’ibanze byo kwifashisha mu ngo bifite agaciro ka miliyoni 23 z’amafaranga y’u Rwanda.

Imvura yaguye muri aka gace muri iki cyumweru yasize imwe mu miryango ivuye mu byabo ndetse ibikorwa remezo bitandukanye birangirika bitewe n’amazi menshi yaturutse mu Kirunga cya Muhabura.

Kuri uyu wa Gatatu, Minisiteri y’Imicungire y’Ibiza no gucyura Impunzi (Midimar) ifatanyije n’Umuryango utabara Imbabare, Croix-Rouge batanze imfashanyo irimo ibyo kurya, amahema, ibikoresho by’isuku, ibyo kwiyorosa, ibyo mu gikoni n’ibindi bifite agaciro ka 23, 670,000 Rwf ku miryango 416 yagizweho ingaruka.

Nyuma yo gusura agace kahuye n’ibiza, ahangiritse ikiraro cya Gisizi gihuza Umurenge wa Gahunga wo mu Karere ka Burera n’uwa Kinigi muri Musanze, Minisitiri w’Imicungire y’Ibiza no gucyura Impunzi, De Bonheur Jeanne D’Arc, yasabye abaturage kuyobya amazi ava mu Birunga kugira ngo adakomeza kubasenyera.

Yagize ati “Nibyo koko twabahaye ibikoresho by’ibanze bibafasha birimo ibyo mu gikoni, ibyo kwiyorosa, iby’isuku n’ibindi. Nubwo bidahwanye n’ibyo batakaje ariko hari icyo bibafasha, icyo twabasaba rero ni ugukora uko bashoboye bagahanga n’aya mazi, abacyubaka bagashaka uko bayayobya banacukura imingoti miremire iyafata ntakomeze kwangiza ibyabo.”

Minisitiri w’Imicungire y’Ibiza no gucyura Impunzi, De Bonheur Jeanne D’Arc, yasabye abaturage kuyobya amazi ava mu Birunga kugira ngo adakomeza kubasenyera

Abaturage bahawe imfashanyo basabye ubuyobozi gukomeza kubaba hafi mu guhangana n’amazi kuko imbaraga zabo gusa zidahagije.

Rutaganda Innocent yagize ati “Ibi bikoresho duhawe ni inkunga ikomeye kuri twe kuko nta kintu na kimwe twari twarasigaranye amazi yari yabitembanye kuva mu mirima kugeza mu nzu zacu. Turishimye tubonye ko Leta yacu yita ku muturage kurusha ibindi. Turasaba ubuyobozi gukomeza kutuba hafi kuko aya mazi ni menshi ntabwo imbaraga zacu zabasha guhangana nayo kandi n’imvura iracyagwa badutize imbaraga tubashe kuyakumira.”

Mukamana Thérèse yagize ati “Ni ukuri ndishimye pe! Mbonye icyo kurya, icyo kuryamira no kwiyorosa n’ubwo tutabonye uko dusubira mu nzu zacu ariko ibi biduhaye icyizere ko ku bufatanye n’ubuyobozi bwacu bizakunda. Turacyafite impungenge ko aya mazi yagaruka, turabasaba kudufasha kuyakumira ntakomeze kwangiza ibyacu kuko urebye imbaraga afite yatwara n’ubuzima bwa benshi.”

Iyi mvura idasanzwe yangije inzu 416, izigera kuri zirindwi zirasenyuka, ibiraro 11 birangirika n’imihanda iracika mu gihe imyaka iri ku buso bwa hegitari 223 yangiritse mu Mirenge ya Gahunga na Rugarama muri Burera.

Minisitiri w’Intebe, Dr Edouard Ngirente, aheruka gutangaza ko mu mezi ane gusa kuva muri Mutarama 2018, leta yakoresheje amafaranga arenga miliyoni 340 mu kugoboka abahuye n’ingaruka z’ibiza ndetse ku ngengo y’imari hakaba harateganyijwe amafaranga yo kwita ku bahuye n’ibi bibazo.

Ku wa 16 Gicurasi 2018, Minisitiri w’Ibikorwa remezo, Amb. Gatete Claver, yatangaje ko Guverinoma y’u Rwanda ikeneye miliyari 24 Frw zo gukoresha mu gusana ibikorwa remezo bimaze kwangirika nyuma y’imvura idasanzwe iri kugwa mu gihugu guhera mu mpera z’umwaka ushize.

Indi nkuru wasoma: Burera: Imvura idasanzwe yangije inzu 197 n’Urwibutso rwa Jenoside rwa Rugarama

Imiryango yasenyewe n'amazi yo mu Birunga yahawe bimwe mu bikoresho by'ibanze
Imvura idasanzwe yaguye mu Karere ka Burera yangije byinshi, inakura imiryango 416 mu byabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza