Burera: Abaturage bateranyije amafaranga yo kwiyubakira ivuriro ubuyobozi buyashyira mu bindi

Yanditswe na Umutoni Rosine
Kuya 3 Mutarama 2018 saa 10:33
Yasuwe :
0 0

Abaturage bo mu Kagari ka Kamanyana, Umurenge wa Cyanika, Akarere ka Burera, bagaragaje ko babajwe no kuba barateranyije amafaranga yo kwiyubakira ivuriro, ubuyobozi buyajyana mu bimina byo kugurizanya muri mituweli ntiryubakwa.

Abo baturage bagaragaza ko batagira ivuriro hafi, bagategesha amafaranga ageze ku bihumbi 10 kuri moto bajya kwivuza cyangwa bakajya kuri riri hafi yabo muri Uganda.

Bajya guteranya amafaranga yo kwiyubakira ivuriro, bahereye ku y’ubudehe miliyoni 5,400,000 yari yagenewe Akagari ka Kamanyana, bongeraho umusanzu w’amafaranga 1000 kuri buri muturage utuye mu midugudu icyenda igize aka kagari kugira ngo babashe kubaka ivuriro.

Siko byaje kugenda, ayo mafaranga ntiyakoze icyo yari agenewe, uretse ikibanza cyasijwe no gushyiramo fondasiyo, inyubako yari yaratangiye ntiyakomeza kubakwa.

Imirimo yo kubaka iri vuriro yari yatangiye muri Gashyantare 2013 iza guhagarara muri Werurwe 2014.

Umwe muri aba baturage waganiriye na TV1 yagize ati "Ikibanza bakiguze miliyoni n’amafaranga ibihumbi 400 hasigara miliyoni enye ku yo Leta yari yaduhaye y’Ubudehe. Babonye zishobora kuba nkeya kugira ngo ibitaro byuzure, twebwe nk’abaturage batubaza amafaranga. Ingo zose zirenze ibihumbi 10 zo mu Kagari ka Kamanyana zatanze amafaranga 1000 ku buryo habonetsemo miliyoni zirenga 10 Frw. Twibaza impamvu batatwubakira ibyo bitaro kandi twaratanze amafaranga."

Ubuyobozi bw’Umurenge wa Cyanika bwo buhakana ko ayo mafaranga yanyerejwe, bukavuga ko ikosa ryabayeho ryakozwe n’ubuyobozi bw’Akagari bwahinduye umushinga ugeze hagati, amafaranga yari agenewe kubaka ivuriro bukayashyira mu bimina byo kugurizanya.

Umunyamabanga nshingwabikorwa w’uyu Murenge, Kayitsinga Faustin, yagize ati "Ntabwo aribyo ariya mafaranga ntabwo yariwe kuko buri mudugudu wagombaga kugira amafaranga y’ubudehe ibihumbi 600 ; ni imidugudu icyenda bihwanye na miliyoni eshanu magana ane. Hanyuma abaturage batanze imisanzu y’ibihumbi 326, bivuze ko yose hamwe ari miliyoni eshanu n’ibihumbi 726 Frw. Baguzemo ikibanza cya miliyoni eshatu andi akomeza kuzamura iriya nyubako."

Uyu muyobozi yakomeje avuga ko kugira ngo inyubako y’ivuriro yuzure yagombaga gutwara amafaranga y’u Rwanda miliyoni 11 Frw.

Yakomeje ati "Igice cya kabiri cy’ubudehe cya 2011 ntabwo yayigiyeho ngo iriya nyubako ishobore kurangira ari naho uwari umunyamabanga nshingwabikorwa w’Akagari yimukiye mu kandi kagari, uwamusimbuye ahindura umushinga bayashyira mu mushinga wo kugurizanya mu bimina bya mituweli. Habayeho ikosa ryo guhindura uriya mushinga."

Uyu murenge uvuga ko urimo gukora ubuvugizi ku karere kugira ngo ibikorwa byo kubaka ivuriro bisubukurwe.

Imirimo yo kubaka ivuriro yaradindiye muri Burera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza