Kwamamaza

Bugesera: Umugabo arashinja umugore kwahukanira i Kigali akagaruka atwite

Yanditswe kuya 4-10-2016 saa 06:59' na Emma-Marie Umurerwa


Kabayiza Philbert avuga ko umugore we wari umaze iminsi yahukaniye i Kigali kwa bene wabo, yagarutse iwe mu rugo atwite, ingeso agaragaza ko imaze kumurambira kuko bibaye ku nshuro ya kabiri.

Uyu mugabo n’umugore we Mujakazi Jeanette batuye mu Murenge wa Nyarugenge mu Karere ka Bugesera, babyaranye abana babiri b’indahekana,ndetse umugore atwite inda ya gatatu.

Kabayiza avuga ko umwana yemera ari uwa mbere, uwa kabiri ndetse n’inda umugore atwite ngo ntiyemera ko ari abe.

Ikibazo cya Kabayiza n’umugore we Mujakazi, cyagejejwe ku Munyamabanga wa Leta ushinzwe imibereho myiza y’abaturage muri Minisiteri y’Ubutegetsi bw’Igihugu, Dr Alvera Mukabaramba, tariki ya 14 Nzeri 2016, ubwo hatangizwaga ukwezi kw’imiyoborere mu Rwanda.

Mujakazi yasabye ubuyobozi ko bwamufasha kumvisha umugabo we ko agomba kumwitaho ndetse akamwishyurira ubwisungane mu kwivuza.

Yagize ati “Umugabo wanjye yanze kwishyura mitiweli kandi ndatwite, nibaza uko nzajya kubyara bikanyobera.”

Mu kanya nkako guhumbya, Kabayiza yahise ahasesekara ateruye abana babiri b’inkurikirane, avuga ko umugore we yabamusigiye akigendera.

Ati “Uyu mugore yataye abana arahukana. Ikindi kibazo mfite ni uko amaze kwahukanira i Kigali inshuro ebyiri zose akagaruka atwite.”

Uyu mugore yahise ahakana amagambo y’umugabo we avuga ko ibyo yatangaje ari ibinyoma, abana bose ari we bababyaranye.

Yagize ati “Ubushize yaranserereje umwana wa mbere acutse, nakwahukanira iwacu akaza kuhankura, mpitamo kujya kwa mwene wacu i Kigali, nagiye ntwite inda ya kabiri ariko ntabizi. Ngarutse kwipimisha aravuga ngo inda si iye. Igihe cyo kubyara kigeze umwana yavutse asa nawe. Yakomeje kunjujubya, ndongera ndahukana nabwo nagiye ntwite iyi nda, kandi arabizi ko nari nyitwite, none ari guhakana ngo si iye.”

Uyu mugore akomeza avuga ko umugabo we ahora amubwira ko azamwica, akaba yarahisemo kumuhunga akajya gukodesha, akamusigira abana babiri.

Ati “Ndabyara ntampa igikoma byose ninjye wirwariza, iyo mvuze arankubita. Ni umubaji ariko ntajya atunga urugo, nakora ibyanjye agashaka kubintegekaho, ajya mu buraya yageze naho ashaka undi mugore baratandukana.”

Dr Alvera Mukabaramba yasabye ubuyobozi bw’Akarere ka Bugesera gukemura iki kibazo.

Umuyobozi w’Akarere ka Bugesera, Nsanzumuhire Emmanuel, asaba umugore gusubirana abana, umugabo akamufasha kubarera kandi akamwishyurira ubwisungane mu kwivuza.

Kabayiza Philbert n'abana be babiri umugore yamutanye
Mujakazi Jeannette (ufashe indangururamajwi) avuga ko umugabo we atamwitaho

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved