Ikiziriko, izina rishya rya ruswa mu Bugesera rikaba igitutsi ku bayobozi

Yanditswe na Ishimwe Israel
Kuya 21 Nzeri 2016 saa 12:27
Yasuwe : XX
0

Hari abayobozi b’inzego z’ibanze mu bice bitandukanye by’Igihugu bakunze gutungwa agatoki, abandi bagatabwa muri yombi bakurikiranyweho ruswa muri gahunda zigenewe abaturage ku isonga harimo iya Girinka yashyizweho na Leta y’u Rwanda igamije gukura abaturage mu bukene.

Abaturage bo mu Murenge wa Nyarugenge mu Karere ka Bugesera bavuga ko kugira ngo uhabwe inka muri gahunda ya ‘Girinka Munyarwanda’, wemererwe gusana cyangwa kubaka inzu ubanza guha bamwe mu bayobozi bo mu nzego z’ibanze ruswa bataziriye ’ikiziriko’.

‘Abayobozi bakubaza niba ufite ikiziriko kugira ngo baguhe inka muri gahunda ya Girinka iyo utagifite ihabwa abagifite. Kugira ngo usane inzu cyangwa wubake usabwa ruswa guhera ku bihumbi bitanu kugeza kuri 20.’

Ibi ni ibivugwa na bamwe mu batuye mu tugari dutandukanye mu Murenge wa Nyarugenge mu Karere ka Bugesera.

Umugore umwe uba mu cyiciro cya mbere cy’ubudehe yagize ati “Twari turi mu muganda, abaturage bemeza ko nkwiye kujya mu bazahabwa inka mu budehe, noneho baramfasha nubaka ikiraro. Icyambabaje ni ukuntu Umuyobozi w’Akagari yaje kundeba iwanjye inka benda kuzitanga akansaba ikiziriko kubera ko ntishoboye narakibuze inka bayiha undi wabashije kumuha amafaranga ibihumbi 20.”

Mutiganda Jean Damascène, we yiyemerera ko yahawe inka kubera ko yatanze ikiziriko.

Yagize ati “Bansabye ikiziriko cy’ibihumbi 20, bambwira ko ari amafaranga yo kuzishyura abazapakurura inka mu modoka. Kubera ko nzi agaciro ko gutunga inka, naragujije ndayatanga.”

Nyandwi Justin, Umuyobozi w’Umudugudu wa Nyakabuye mu Kagari ka Kabuye mu Murenge wa Nyarugenge, avuga ko ibyo aba baturage bavuga atari ukuri.

Yagize ati “Ukuntu dutanga inka za Girinka cyangwa izo mu budehe barabikosoye, abaturage basigaye batoranyiriza abakene mu muganda. Abavuga ko basabwa ikiziriko ni imvugo nyandagazi ntabwo aribyo.”

Umunyamabanga Nshingwabikorwa w’Agateganyo w’Umurenge wa Nyarugenge, Karugwiro Antoinette, we avuga ko amakuru y’abaturage bakwa ikiziriko ari mashya kuri we.

Ati “Ibyo ntabyo nzi, hagize n’umuyobozi ubikora yabihanirwa.”

Umunyamabanga Nshingwabikorwa w’Akarere ka Bugesera, Hakizimana Elie, avuga ko mu bihe byashize hari abayobozi bo mu nzego z’ibanze bakaga abaturage ikiziriko ariko ubu bitakibaho.

Yagize ati “Ikijyanye n’ikiziriko ntekereza ko uyu munsi cyabaye amateka naho cyagaragara twakirwanya n’ingufu nyinshi zishoboka ntabwo dushobora kwihanganira ikintu nk’iki.”

Hakizimana yakomeje avuga ko mu myaka yashize gahunda ya Girinka Munyarwanda igitangira, hari bamwe mu bayobozi bagiye bagaragarwaho no kwaka abaturage ikiziriko.

Ati “Bari bafite imyumvire yindi yo kwizamura aho kuzamura inyungu rusange z’abaturage.”

Mu mwaka wa 2006 nibwo Guverinoma y’u Rwanda yatangije gahunda ya ‘Girinka’ ikurikirwa n’izindi zitandukanye hagamijwe gukura Abanyarwanda batishoboye mu bukene, ariko biza gutahurwa ko hari bamwe mu bayobozi zabereye inzira yo kwishakira indoke, mu bikorwa byo kuzishyikiriza ba nyirazo.

Ubwo yasozaga itorero ry’abayobozi b’inzego z’ibanze i Gabiro mu Karere ka Gatsibo tariki ya 19 Werurwe 2016, Perezida Kagame yagarutse ku bibazo bitandukanye bikunze kuranga abayobozi nk’aho barenganya abaturage, atanga urugero kuri gahunda ya Girinka.

Ati “Hari akarere gahunda ya Girinka itarageramo? Hari akarere iyo gahunda itagira ibibazo? Mbwira uti mu karere kanjye cyangwa ako nzi nta kibazo kijya kivuka. Hari ako muzi? Kubera iki? […] Abo baturage mugenda mugafata inka zabo ntimuzibahe, ndabibona aho mba nagiye hose, umuturage aba agira ati ‘ndakennye, ndapfuye, banyimye inka cyangwa ngo bari banshyize ku rutonde ngiyeyo umuyobozi runaka nsanga yarayitwariye’.”

Umukuru w’Igihugu yabajije abayobozi aho bazakirizwa icyo cyaha cyo kuba barambuye inka umuturage utishoboye barangiza “bakabeshya” ko ari abantu b’Imana.

Indi nkuruwasoma : Isinzi y’abayobozi mu mapingu bazira VUP na Girinka

Bamwe mu baturage batuye mu Murenge wa Nyarugenge bemeza ko bajya bakwa ikiziriko
Umunyamabanga Nshingwabikorwa w’agateganyo w’Umurenge wa Nyarugenge, Karugwiro Antoinette avuga ko amakuru y'abarya ruswa ari mashya kuri we
Umunyamabanga Nshingwabikorwa w’Akarere ka Bugesera, Hakizimana Elie yemeza ko ruswa y'ikiziriko yacitse

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza