Bapfaguseka yitabaje Abadepite nyuma yo kwangirwa n’umuhungu we gushaka undi mugore

Yanditswe na Jean Pierre Tuyisenge
Kuya 22 Nzeri 2016 saa 08:02
Yasuwe :
0 0

Imyaka itatu irashize Bapfaguseka Faustin apfushije umugore, ariko umwe mu bahungu be yamubereye ibamba yanga ko ashaka undi byatumye uyu mugabo atakira Abadepite.

Ubwo itsinda ry’Abadepite n’abandi bayobozi basuraga abaturage bo mu Murenge wa Rilima, Tariki ya 16 Nzeri 2016, bakaganira ku ngingo zitandukanye, bakanafatanya n’ubuyobozi gukemura ibibazo by’abaturage, umusaza Bapfaguseka Faustin yabagejejeho ikibazo cy’uko umuhungu we yanze ko ashaka undi mugore nyuma yo gupfakara.

Bapfaguseka Faustin w’myaka 64, yavuze ko umugore we amaze imyaka itatu yitabye Imana, akaba afite umuhungu wamujujubije amubuza gushaka undi mugore.

Yagize ati “Umugore wanjye amaze imyaka itatu yitabye Imana. Umuhungu wanjye umwe yanze ko nshaka ngo hariya ndi ni kwa nyina ntashaka ko mbana n’undi mugore, kandi kugeza uyu munsi ni we muntu utarampa n’amazi yo kunywa.”

Akomeza avuga ko abana be barindwi yabahaye umunani, akabakorera byose umubyeyi agomba gukorera abana.

Yakomeje agira ati “Abana banjye barindwi nabahaye iminani, bampe agahenge nanjye nshake, uwo nshatse mwandikishe kuri buriya butaka nsigaranye, dusezerane mu mategeko nabo bajye baza mu rugo nk’abana banjye.”

Ndagijimana Eric, Umunyamategeko mu Nteko Ishinga Amategeko, yahumurije Bapfaguseka yifashishije amategeko .

Yagize ati “Itegeko tugenderaho mu Rwanda rigenga umutungo w’abashakanye, impano n’izungura, ryemerera umubyeyi gutanga umunani ku bushake. Ikindi twabwira uyu musaza ni uko kongera gushaka ari uburenganzira bwe mu gihe uwo babanaga atakiriho.”

Yakomeje avuga ko abana be badakwiye kumubuza gushaka cyane ko ngo bakuze.

Ati “Ni uburenganzira bwawe gushaka ahubwo abana nibakubangamira uziyambaze ubuyobozi bugufashe mu bijyanye n’umutekano wawe.”

Umunyamategeko Ndagijimana yakomeje agira inama Bapfaguseka yo kuzirinda gushaka umugore bitanyuze mu nzira z’amategeko.

Abaturage baganira n'Abadepite
Abaturage bo mu murenge wa Rilima bageza ibibazo ku badepite
Depite Nyiragwaneza Athanasie hamwe na Ndagijimana Eric, Umunyamategeko mu Nteko Ishinga Amategeko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244