Kwamamaza

Bugesera: Abarimu bize mu buryo bw’iyakure baratabaza

Yanditswe kuya 30-09-2016 saa 09:49' na Emma-Marie Umurerwa


Abarimu bize kaminuza mu buryo bw’iyakure ‘Distance learning’ basanzwe bari mu mirimo, bavuga ko barangije kwiga bakomeza guhembwa nk’abarangije amashuri yisumbuye, bakifuza ko bahemberwa impamyabumenyi ya kaminuza bafite dore ko ngo bagiye kwiga bashaka ubumenyi n’umushahara wisumbuyeho.

Aba barimo bize amasomo ajyanye n’uburezi mu buryo bw’iyakure mu yahoze ari KIE, barangije bafite imyamyabumenyi zo ku rwego rwa A1, ariko bakomeza guhembwa nk’abarangije amashuri yisumbuye.

Habineza Ananias, umwe muri abo barimu wigisha mu Rwunge rw’Amashuri rwa Dihiro, mu Murenge wa Gashora, mu Karere ka Bugesera, yatangarije IGIHE ko we na bagenzi be bagera kuri 11 muri aka karere bahuje ikibazo.

Yagize ati “Amashuri y’uburezi bw’ibanze bw’imyaka 12 agitangira twari dufite impamyabumenyi yo ku rwego rwa A2, hanyuma tujya kwiga ariko tunakora tuza kurangiza dufite imyamyabumenyi ya A1. Turangije kwiga mu mwaka wa 2014, twasabye Akarere ko batwongeza umushahara, baranga kugeza ubu, twandikiye Intara y’u Burasirazuba, nta gisubizo twabonye. Twize dushyizeho umwete, kuko bari baratwijeje ko agashahara kaziyongera none twarahebye. ”

Akomeza avuga ko nyuma y’igihe kirekire bajya kubaza ikibazo cyabo ku buyobozi bw’Akarere ka Bugesera bakabura igisubizo, bandikiye Abadepite bagize Komisiyo ishinzwe uburezi, umuco, ikoranabuhanga n’urubyiruko tariki 27 Gicurasi 2016.

Depite Mukazibera Agnes, ukuriye Komisiyo y’uburezi mu Nteko Ishinga Amategeko, mu kiganiro yagiranye na IGIHE, yagize ati “Ni abarimu benshi batugejejeho icyo kibazo. Natwe twakigejeje kuri Minisitiri w’Uburezi, icyo turi gukora ni ukugikurikirana.”

“Umukozi ahemberwa umwanya akoramo”

Umunyamabanga Nshingwabikorwa w’Akarere ka Bugesera, Hakizimana Elie, avuga ko umukozi adahemberwa impamyabumenyi afite.

Yagize ati “Umwarimu usanzwe yigisha, ariko akora ku mwanya wa A2, iyo arangije kwiga ntahemberwa impamyabushobozi aba azanye, ahubwo biba bisaba ko yazakora ikizamini habonetse umwanya w’impamyamenyi azanye, hanyuma yatsinda agashyirwa mu kazi hashingiwe kuri iyo agahembwa hakurikijwe amashuri yize.”

Umuyobozi ushinzwe imicungire y’abakozi muri Minisiteri y’Abakozi ba Leta n’Umurimo (MIFOTRA), Ntagungira Alexis, ntabusanya n’umukozi w’akarere ka Bugesera, akemeza ko umukozi ashatse yajya yishakira akandi kazi kajyanye n’impamyabumenyi afite.

Yagize ati “Icyo kibazo cy’abarimu turakizi kandi tubasobanurira uko amategeko ateye. Niba ukora umurimo w’abantu bafite A2, kandi ufite impamyabumenyi ya A1, uhemberwa umwanya ukoramo icyo gihe. Umukozi abishoboye yakwishakira undi murimo ujyanye n’impamyabumenyi afite. Abarimu benshi ni icyo kibazo bagiye bagira, ariko iyo baje batugana tubagira inama, turasaba kandi n’abashinzwe umurimo mu Turere kujya babagira inama.”

Abarimu bize kaminuza bari mu kazi, bagiye kujya bapiganwa nk’abandi

Akomeza avuga ko itegeko rya mbere ryagengaga abarimu mu buryo bwo kubona imirimo, ritavugaga ko abarimu bize bari mu kazi bagaruka bagakora ibizamini kugira ngo bahemberwe impamyabumenyi ya kaminuza.

Ati “Iteka ryo mu mwaka wa 2011 ryavugaga ko umwarimu wize ibijyanye n’ibyo akora, iyo arangije kwiga kandi akenewe atirirwa yongera gukora ikizamini kuri uwo mwanya kubera ko bari bake cyane. Ariko iteka rishya ritarasohoka rivuga ko bazajya bapiganwa.”

REB yiteguye gufasha abarimu bize mu buryo bw’iyakure

Umuyobozi w’Ikigo cy’Igihugu gishinzwe uburezi ‘REB’, Gasana Janvier, yatangarije IGIHE ko ikibazo cy’aba barimu atari akizi ariko ko bazagana iki kigo kibafasha.

Yagize ati “Biriya byo kwiga mu buryo bw’iyakure, umuntu yigaga ibyo akora n’ubundi, ni nacyo cyari kigamijwe kugira ngo abantu bigishe bafite ubumenyi mu myaka bigishamo. Icyo gihe rero bigomba kujyana n’ibyo bagomba kubona amategeko abemerera, niba izo mpamyabumenyi barazibonye, wenda umwaka utangira mu gushaka abakozi, bagombaga gusiga imyanya y’abafite A1 mu Karere kose.”

Akomeza avuga ko niba ubuyobozi bw’Akarere butarashoboye kubafasha, bakwiye kwandikira REB bakayisobanurira ikibazo cyabo ikabafasha kubona igisubizo.

Akarere ngo kababwiye ko nta mwarimu uhemberwa diplome
Aba barimu ngo batakiye intara biba iby'ubusa
Gasana Janvier uyobora REB yasabye abo barimu kumwandikira akabafasha gukemura ikibazo cyabo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved