Bugesera:Abakura amarebe mu Kiyaga cya Cyohoha ya Ruguru byabahinduriye ubuzima

Yanditswe na Kanamugire Emmanuel
Kuya 3 Ukwakira 2016 saa 03:44
Yasuwe : XX
118 67

Abaturage bagera ku 1000 bahawe akazi ko kurandurana amarebe mu Kiyaga cya Cyohoha ya Ruguru mu Murenge wa Mareba mu Karere ka Bugesera,bishimira ko byabakuye mu bukene.

Nyuma yo kubona ko ibinyabuzima byo mu kiyaga cya Cyohoha ya Ruguru bigenda bikendera kubera amarebe yari yuzuye mu Kiyaga, mu mwaka wa 2014 Ikigo cy’Igihugu gishinzwe kurengera ibidukikije REMA, cyatangije umushinga wo gukura amarebe muri icyo kiyaga, abahoze bakirobamo bibumbiye mu makoperative atatu bahabwa akazi.

Bamwe mu bahoze baroba muri iki kiyaga kitarakama mu mwaka wa 2000, bavuga ko nubwo akazi bakora gasa n’agakomeye, kababeshejeho neza bo n’imiryango yabo.

Bugingo Joseph, ni umwe mu bibira mu mazi. Yagize ati “Ndi mu bacubira hasi mu Kiyaga nkajya kurandurana amarebe.Ni akazi gasa n’agakomeye,si buri wese wagakora, ariko amafaranga 3000 nkorera ku munsi antungiye umuryango mu myaka ibiri maze ngakora maze kuguramo inka ebyiri, mfite umwana wiga mu mashuri yisumbuye ndamwishyurira; mbese mbayeho neza nta kibazo.”

Nambajimana Leonard, na we avuga ko ari mu bakora aka akazi. Yagize ati “Naguze isambu mu mafaranga nakoreye hano mu kiyaga, naguze n’inka kandi nafunguje na konti muri Sacco.”

Si aba gusa bavuga ko bakijijwe n’amafaranga bakura mu gukura amarebe mu kiyaga, kuko n’abandi twaganiriye bahamya ko hari impinduka ku buzima bwabo, dore ko byatumye babasha kororora amatungo magufi n’amaremare, kwiyishyurira ubwisungane mu kwivuza n’ibindi.

Ntabana Alphonsine, Umuhuzabikorwa w’Imishinga ikorera muri REMA, yatangarije IGIHE ko abakozi bakura amarebe mu Kiyaga cya Cyohoha ya Ruguru bari mu Byiciro bitatu.

Harimo abibira mu mazi bahembwa amafaranga ibihumbi 3000 ku munsi, Abatunda n’abarunda amarebe n’ibindi byatsi bakoreshejwe ubwato bahembwa amafaranga 1500 hamwe n’abakira amarebe ku nkombe bakayazamura bakanayarunda na bo bahembwa amafaranga 1500.

Akomeza avuga ko uretse kuba abaturage bahawe akazi barabashije kwiteza imbere, umusaruro w’amafi na wo wariyongereye, nyuma y’aho mu mwaka wa 2000 ikiyaga cya Cyohoha ya Ruguru cyari cyarakamye burundu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE