Kwamamaza

Bugesera: Abagore bagaragaweho indwara ya bwaki

Yanditswe kuya 21-09-2016 saa 10:00' na Emma-Marie Umurerwa


Mu Murenge wa Gashora, mu Karere ka Bugesera, haravugwa ikibazo cy’indwara ya bwaki iri kwibasira abana ndetse n’abantu bakuru, nyirabayazana ikaba ubuharike ndetse n’amakimbirane yo mu miryango byiyongera ku kurya indyo ituzuye.

Ubwo Depite Mutimura Zeno na Uwanyirigira Gloriose basuraga abaturage bo mu Murenge wa Gashora ku wa 15 Nzeri 2016 muri gahunda Abadepite barimo yo kuzenguruka igihugu baganira n’abaturage ku nkingi enye zirimo imirire, isuku, abana bacikiriza amashuri n’abayasubijwemo hamwe n’ikibazo cy’amakimbirane yo mu muryango; bagaragarijwe ko muri uyu murenge hari abaturage barwaye bwaki.

Umuyobozi w’Ikigo Nderabuzima cya Gashora, Habimana Landouard, yagaragaje uko ikibazo cy’imirire ndetse n’isuku gihagaze muri uyu murenge, avuga ko mu barwaye bwaki harimo n’abagore batwite.

Ati “Kugeza ubu dufite abana 28 bagaragayeho bwaki, 13 bafite ikibazo cy’imirire mibi, 11 bari mu muhondo, abagore babiri batwite barwaye bwaki. Iyo turebye dusanga ibi bibazo byose biterwa n’ibiba biri mu muryango, aho usanga umwe mu bashakanye atererana undi mu kurera. Ikindi kibitera ni ikibazo cy’imyumvire.”

Depite Uwanyirigira Gloriose, yavuze ko ababyeyi babyara abo badashoboye kurera bikavamo kurwaza bwaki badakwiye kwihanganirwa.

Yagize ati “Mu Itegeko Nshinga rya Repuburika y’u Rwanda ryavuguruwe mu 2015, harimo ingingo ivuga ko umugabo agomba kugira umugore umwe. Mu gihe atabyubahirije, aba yishe itegeko kandi izo ni intege nke z’ubuyobozi ntabwo dushobora gukomeza kwihanganira abantu bateza umutekano muke mu banyarwanda babyara abana batabashije kurera.”

Yakomeje avuga ko ababyeyi bakwiye kubyara bakurikije ubushobozi bwabo aho gushyira umutwaro kuri Leta.

Ati “Kuki tutabanza gutekereza ngo ubushobozi bwanjye buranyemerera kubyara abana bangahe, ese nshobora kubabonera ishuri, imyenda, nkababonera n’icyo barya? Mwagombye kumenya ko umubyeyi ubyara abana adashoboye kurera aba ahemukiye uwo mwana, ntabwo abana baba badutumye ngo tubabyare, kubyara umwana wo kugira ngo aruhe, arware bwaki ni ikibazo gikomeye.”

Umunyamabanga Nshingwabikorwa w’Akarere ka Bugesera, Hakizimana Elie, avuga ko mu nama ndetse no mu Mugoroba w’Ababyeyi, hari amasomo ahatangirwa atuma ibi bibazo byose byakumirwa.

Yagize ati “Kwigisha abaturage bihoraho, ariko muri gahunda zitandukanye mu kazi ka buri munsi, abayobozi b’inzego z’ibanze bigisha abaturage kurya indyo yuzuye, kujyana abana ku ishuri ndetse bagakangurira abagabo gushaka umugore umwe kandi abatarasezerana bagasezerana.”

Uyu muyobozi yakomeje avuga ko mu rwego rwo kurwanya ikibazo cy’imirire mibi muri aka karere, hashyizweho igikoni cy’umudugudu, aho ababyeyi bigishirizwa guteka indyo yuzuye, abafite ikibazo cy’imirire mibi na bo bagakurikiranwa ku bufatanye n’abajyanama b’ubuzima.

Tariki ya 4 Werurwe 2016, ubwo Abadepite bamurikaga Raporo ku ngendo bakoreye mu gihugu hose muri Mutarama uyu mwaka, basanze ruswa itangwa muri gahunda ya Girinka, ikomeje kuba inzitizi mu kugabanya ubukene mu baturage no guhangana n’ikibazo cy’imirere mibi, ibi bikaba imwe mu mpamvu ituma bamwe mu banyarwanda barwara bwaki.

Mu mwaka wa 2015, Ikigo cy’Igihugu gishinzwe Ibarurishamibare mu Rwanda cyagaragaje ko 38% by’abana batarengeje imyaka itanu mu gihugu bafite ikibazo cy’imirire mibi. Ibi bituma bagira imikurire mibi bakagwingira.

Amakimbirane mu miryango ndetse no kurya indyo ituzuye byatangiye gutuma abaturage barwara bwaki
Depite Mutimura Zeno, umwe mu badepite bakanguriye aba baturage kubyara abo bashoboye kurera

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved